Tiaku 5
5
Haga 5
Eiweꞌeg Wo O Hekat Rakaria
1-Eiweꞌeg wo o hekat rakaria. Eiweꞌeg wo o woꞌopoꞌoro i poꞌoro i teꞌen neꞌi haria pupi e Tupana. Koitywy yt pya hin i eiwoꞌokakꞌi hamuat hap eꞌat e Tupana. Yt pya hin i kyn kyn eiꞌe hap eꞌat ehepiat hoꞌopot hap wuatꞌi eꞌat piat hamuat e katupono eiwemoekat kahato miitꞌin maꞌat hap kaipyi e Tupana. 2Mekewat eꞌat pe ti aru eimisoknug ni hokpyp neꞌi raꞌyn topyhuꞌat e Tupana. Ehesokpe sok koꞌi nupiꞌa yat no raꞌyn topyhuꞌat yne yne aru e Tupana. 3Ehekat ikahuria rakat ahyt aru yt kan hamo i raꞌyn topyhuꞌat iꞌytyk tutuꞌu yne raꞌyn hawyi e. Mekewat eꞌat ehekat ikahu miitꞌin mipugha wo raꞌyn topyhuꞌat nem neꞌi pote e. Saꞌawyꞌi imehit rakat yn ehekat maꞌato mekewat eꞌat pe iꞌytyk kahato rakatno raꞌyn topyhuꞌat ikamhig saꞌag nakatno raꞌyn topyhuꞌat e. -Kat pote kahu yt eweimoꞌẽ i ehekat koꞌi nimo te uruepe iꞌatuꞌe ti aru ehepe ewyriaꞌin hatek takaria. Kat pote yt ehegyiꞌat hin i uruepe nimo iꞌatuꞌe aru ehepe ihakyꞌeꞌi rakaria. -Miꞌi hawyi ehekat koꞌi iꞌytyk kaipyi ti aru taꞌatukuap meremo raꞌyn yt ehegyiꞌat hin i kahato hap e Tupana -Uiwatno yn neran e haria pe. -Ehekat ahyt topyhuꞌat aru aria wato miꞌu wo e Tupana. Miꞌi hawyi eipe ekat wuk hap pe eweikupteꞌen aat kaꞌap eiꞌapiheg hamuat wuatꞌi eꞌat pe e Tupana aru hatek takaria pohari haria pe. 4-Saꞌawyꞌi eimikoi eropat haria iꞌatupotpap kahato eiko nug hamuat pykai maꞌato yt kat i ewetum iꞌatuepe. -Pywo ti rat mukiꞌite aru atum eipotpap saꞌup eweiꞌe pykai yt kat hin i ewetum iꞌatuepe. Yt ehegyiꞌat i hap kape araꞌakasa yne raꞌyn Uito e aru Tupana yt imoꞌẽ i haria pe. Iꞌatuesyꞌat kahato ehemiitꞌin e. Yt iꞌatuesokpe hin i rakaria miꞌiria. Iꞌatuehakyꞌeꞌi kahato teꞌerepotpap aat kaꞌap pykai yt kat hin i ewetum e. Saꞌawyꞌi kak iꞌatuꞌe kak iꞌatuꞌe ahetiat -Tupana yt urupoi i urupoꞌoro haria urukaꞌiwaria hekat rakaria iꞌatuꞌe uhepe e. Yt taꞌatumoꞌẽ hin i uruepe urupotpap hap saꞌup iꞌatuꞌe irane toꞌokakꞌi popuo uhepe ihakyꞌeꞌi rakaria e Tupana. 5Yt ehegyiꞌat hin i eipe e aru ehepe katupono eiwemowepiit hap yn ewetunug eheineꞌen hap turan e. Kat koꞌi kat koꞌi eimikyꞌesat oktan eweiꞌatunug atunug kahato. Eiꞌyat wakuat pe ienuk hap yn ewetunug. Eimiꞌu ikahu kahato maꞌato eiweran eweiꞌatumoꞌok kahato. Yt kat i ewetum hesyꞌat sese rakaria pe e Tupana aru ihakyꞌeꞌi rakaria maꞌat haria pe. Aikotã saꞌawyꞌi eihũria eweiꞌatumokyt kahato awati wo iꞌatuꞌuka hamuat iꞌu hamuat hap ewy kahato eiperia tukupteꞌen ikap kahato rakaria wo e aru Tupana yt hegyiꞌat rakaria i pe. Ikap kahato rakaria wo koitywy eweikupteꞌen eihũria ewy e. Eikap ti waku kahato aria miꞌu wo pote mesup taꞌyn waku pe eweikupteꞌen kahato maꞌato uimiꞌapiheg wuatnuaria wo e Tupana miꞌiria pe yt taꞌatupoi hin i taꞌatupotpap nug haria hawyi. 6-Saꞌag nug haria ti eipe katupono miitꞌin wakuat kuasa haria wo eweikupteꞌen areꞌe aru ehepe e Tupana. Iꞌatuekat kyewi -Eweiꞌatuꞌuka miꞌiria eweiꞌe yn esuraraꞌin me wakuap yn taꞌatunug pykai e. Eweiꞌatuꞌuka yt kat i saꞌag iꞌatuꞌe i ehepiat pykai e aru Tupana yt hegyiꞌat i rakaria hekat rakaria pe.
7Uiwyriaꞌin waku aiperupꞌi poꞌog poꞌog watoineꞌen Iesui ekatup haype miitꞌin aimoweukaꞌi pykai. Aikotã aikopiat aimikoi wahekatup hepama hap ewy. Saꞌawyꞌi watikoi hawyi iꞌaman hap wahekatup imoẽtyt hamo. Miꞌi hawyi wahekatup i iꞌaman tuereto hap imotag hamo. Perupꞌi popuo wahekatup haat hap kape imoꞌapuhup hamuat kape. Miꞌi hap ewy waku wahekatup Iesui uut hap. 8-Yt pya hin i ti Iesui uut hap waku watoꞌe yn aiwoꞌope aiwemoesaika hamo. Yt naku i watoiat huut hap mohey hap katupono tuut aru Aikaꞌiwat. Waku wahekatup huut hap aiwemowepiit hap wywo. 9Uiwyriaꞌin yt naku i watoꞌoehay petek petek hekatup haype katupono woꞌoehay petek petek haria pe ti aru -Yt nakuaria i eipe e aru Tupana. Yt pya hin i aikaꞌiwat uut hamuat uwe waku uwe yt naku i toꞌe hamo. Yt pya hin i Aikaꞌiwat uut hap aikotã okenꞌypy og me hap ewy yn ni toineꞌen meke -Areke teran e hat ewy toineꞌen.
10Uiwyriaꞌin yt naku i ti watiwaure aipyꞌa pe saꞌawyꞌi wuat Tupana ehay moherep haria piat hoꞌopot hap koꞌi. Taꞌi nimo te ti taꞌatuhoꞌopot potꞌi kahato miitꞌin mikyryꞌi taꞌatuetiat imohey hap wywuat hap. Taꞌi yt iꞌatuwẽpohep hin i ti Tupana e hap moherep hap ete miitꞌin tiꞌatusatyꞌi satyꞌi pykai. Miꞌi tupono waku watunug miꞌiria ewy. 11Miꞌiria saꞌawyꞌi tokokaꞌat raꞌyn hoꞌopot hap sakpo. Miꞌi tupono koitywy Tupana miꞌatuewaku koꞌi wo tukupteꞌen eimiꞌatumotypot no raꞌyn tukupteꞌen. Watikuap taꞌyn ti aikotã nimo ahaꞌaseꞌi Io hoꞌopot potꞌi kahato hap maꞌato yt toiwaure hin i Tupana mohey tepiat hap. Imohey motꞌi hap poꞌog iwato hoꞌopot hap kai. Miꞌi pote hoꞌopot kahato hap sakpo tokosap aseꞌi Io. Miꞌi pote Tupana mipoitynug wo raꞌyn topyhuꞌat. Uiwyriaꞌin Tupana tikuap kahato ahepiat hoꞌopot hap. Taꞌi Aikaꞌiwat aikyꞌe kahato tohatyꞌu kahato ahepiat hoꞌopot hap.
12Ahehay pywo piat hap yn Tupana tikyꞌesat. Karãpe iraniaꞌin me -Atunug aru watoꞌe pote waku watunug aiꞌe hap ewy hap. Yt naku i aheso -Atunug aru aiꞌe hap ete. Maꞌato aheso hap neꞌi pote Tupana aiꞌapiheg e. Iꞌewyte ti yt naku i Tupana set watipehik -Atunug aru e hap ete. Yt naku i watoꞌe -Yt atunug i aru uiꞌe hap ewy pote waku Tupana uiꞌauka watoꞌe. Poꞌog waku -Atunug aru mehin mana watoꞌe hawyi waku watunug aiꞌe hap oktan poꞌog waku are. Iꞌewyte yt naku i miitꞌin set watipehik pywo aiꞌe hap moheg hamo. Maꞌato Tupana tikyꞌesat pywo piat yn ahehay hap -Atunug aru aiꞌe hap ete.
13Ahatek pote watemoehamanaꞌi hawyi waku wahẽtup Tupana kape aikawiatno hamuat hap. Maꞌato toineꞌen ahehãite hap aiwepiit hap yn ahete pote waku watuwehum Tupana ete aiwepy hap wywo.
14Wẽtup ok iꞌahuu aipyꞌasetpiat pote waku mekewat iꞌahuu rakat tiꞌatukay kay tuwewawi Iesui mohey haria apykok haria koꞌi taꞌatuhẽtup Tupana kapiat hamo iꞌahuu kosap hamuat hap. Miꞌi hawyi ikap takat mohag wo waku taꞌatupag iꞌahuu rakat ete. Miꞌi hawyi waku taꞌatuhẽtup -Tupana etimoehãite kahato mesuwat iꞌahuu rakat esaika hap mywo Esaꞌyru Iesui motypot hamo waku iꞌatuꞌe itote iꞌahuu rakat moehãite hamuat. 15Miꞌi tã taꞌatunug Iesui mohey hap mywo pote ti aru ipoĩꞌam naꞌyn teꞌyni pyi ihãite raꞌyn topyhuꞌat iꞌahuu rakat. Iꞌewyte iminug saꞌag kaipywiat iꞌahuu pote Tupana timoweityk taꞌyn iminug yt naku i saꞌag hap koꞌi. 16Miꞌi pote waku wahenoi aiwoꞌope aiminug saꞌag koꞌi iꞌewyte waku wahẽtup kahato Tupana kape aiwyriaꞌin kawiatno hamuat. Wahẽtup aipyꞌa pyi pote aiwoꞌopoityro kahato hap ewy topyhuꞌat ahete aiwoꞌokyꞌe hap ewy aiwoꞌope. Miꞌi hawyi toineꞌen kahato aimoehãite kahato hap Tupana kaipywiat hap. Aipyꞌa hãpyk kahato Tupana wywo hawyi meremo tutum aimiẽtup niatpo kahato rakat pykai. Meremo tutum waku miẽtup koꞌi. 17Saꞌawyꞌi mekewat Tupana ehay moherep hat Eria aiꞌewywuat miit kahato maꞌato tohẽtup kahato tepiat imohey kahato hap mywo yn -Tupana etipyhyp to iꞌaman myẽꞌym anu 6 ewaty hap atikyꞌesat e. Miꞌi hawyi hẽtup ewy Tupana tunug itote. 18Miꞌi hawyi tohẽtup i raꞌyn -Etum i ro iꞌaman e hawyi iꞌaman kahato i raꞌyn hap Tupana tunug iꞌe hap ewy. Miꞌi hawyi itote ihãite kahato i raꞌyn iꞌatumikoi koꞌi.
19Uiwyriaꞌin toĩ wẽtup ok wẽtup ok tuereto aipyꞌasetpiaria wemig Tupana po piat haria taꞌatuminug saꞌag kyewiat haria. Waku miꞌiria watekyi ahehay wo teꞌeraꞌaipok Tupana ewowiat hamo. 20Uwe uwe yt nakuat i nug hat porerokosap Tupana kapiat iminug saꞌag myi miꞌi hat tihep wẽtup ok miit woꞌoꞌapiheg hap kaipyi iminug saꞌag ahyt po pyi toiporenotem Tupana piat iehakyeraꞌat hamo. Uiwyriaꞌin yt eweiwaure ro miꞌi tã nug hamo yt waure wo teiꞌo. Uito Tiaku ti mekewat Iesui ywyt sese.
Currently Selected:
Tiaku 5: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.