Tiaku 4
4
Haga 4
Henoi Raꞌyn Aikope Pyi Aiwoꞌowuuka Hap
1Koitywy ahenoi teran ehepe kat kaipyi kat kaipyi aiwuꞌuka hamuat aiwoꞌoehay poepyk hamuat hap tuwemoherep hap koꞌi. Pyno ahenoi ehepe -Uiat uipo pe atikyꞌesat ewat ekat aiꞌe hap saꞌag kaipyi ti watuꞌuka. -Uimikyꞌesat yn waku watunug e hap kaipyi watuꞌuka. Miꞌi hap kaipyi yt aiwoꞌowese i hap toineꞌen. 2-Atikyꞌesat ewat uiatno watoꞌe iraniaꞌin me maꞌato -Yt atum i iꞌatuꞌe ahepe hawyi -Pyno yt etum i pote yt uiwese i aru watoꞌe aipyꞌa pe aiwyriaꞌin me. Miꞌi hawyi watoꞌoꞌauka teran iraniaꞌin ete iꞌatuekat kyewi. Yt naku i miꞌi tã are. Poꞌog waku wahẽtup hẽtup Aiꞌywot Tupana pe aimikyꞌesat koꞌi are. Yt kat i aimikyꞌesat koꞌi toineꞌen aipo pe katupono yt wahẽtup Ahekat nug hat Tupana pe i pote e. 3Miꞌi hawyi aimikyꞌesat Tupana pe wahẽtup tuereto wen maꞌato yt tutum i aimiẽtup katupono yt tomikyꞌesat ewy i wahẽtup pote. Aimikyꞌesat ewy saꞌag neꞌi wywo yn wahẽtup wote aimowepiit hamuat kape yn wahẽtup pote yt tutum kuap i aimiẽtup.
4Aikotã aheharyꞌi ete aipohari hap ewy yt ikahu hin i miꞌi hap ewy kahato yt ikahu hin i typy ahetupana pote. Yt naku i typy ok mikyꞌesat ewy watunug Tupana mikyꞌesat wakuat iꞌewyte mesuwarotiaria mikyꞌesat ewywuat yt naku i nug haria mikyꞌesat ewywuat pote. Yt ikahu hin i miꞌi tã watoineꞌen are. Tupana ewanikaptia mikyꞌesat ewy watunug mote Tupana ewanikaptia wo watoineꞌen. Uwe uwe mesuwarotiat yt naku i nug haria seko saꞌag wo tuwewyꞌinug miꞌi hat Tupana ewanikap mo topyhuꞌat. 5Eweꞌeg wo e Tupana saꞌawyꞌi wuat pupi -Uiwatno yn worokyꞌesat e ahepe. Maꞌato wẽtup tupana eweimohey hawyi uhehayꞌywyi kahato tupanaria ete e Tupana Paꞌãu ahepe. 6-Atiꞌatumoesaika kahato waure wuat gupteꞌen haria pe. Miꞌiria pe atum neꞌen kahato wakuap miꞌiria pe maꞌato iraniaꞌin me -Uito poꞌog e haria ewanikap wo areineꞌen e Tupana ahepe. Uhegyiꞌat hap poꞌog atum paa e haria pe e Tupana ahepe. 7Tupana tikyꞌesat aiꞌe hap -Tupana atikyꞌesat emiit sese wo waku watoꞌe aiperupꞌi popuo e. Uiꞌywot uimoesaika kahato uiminug saꞌag koꞌi akit hamo waku watoꞌe. Tupana etiꞌakit o ahiag uiꞌokpe totiat watoꞌe waku. Uimoesaika epaꞌãu wo ahiag sopo hamo ehay wo -Motoro uiꞌyatypepyi ahiag me e hamo waku wahẽtup Tupana pe. Miꞌi hawyi waku watoꞌe -Tupana etisopo ro ahiag uhãꞌãg hat mesuwe waku watoꞌe. Miꞌi hawyi ahiag topopy raꞌyn meremo aiꞌyatypepyi Tupana pupi.
8Pyno karãpe watikyꞌesat watukupteꞌen Tupana wywo miꞌi pote waku watuwat Tupana kape aimikyꞌesat ẽtup hamo. Aiwanetup hap kaipyi aipyꞌa pyi ahehay hawyi tuut ahowawi aimikyꞌesat ewy. Miꞌi hawyi aikotã watuwei aipit pit potiat hap ewy raꞌyn yꞌy pe waku miꞌi hap ewy waku watoꞌe Tupana pe -Uiꞌywot uikoho Esaꞌyru suu wo uimiꞌaparap saꞌag koꞌi waku watoꞌe. Uipo ti iminug yt naku i hap koꞌi pote uipo ipit pit hap ewy. Miꞌi pote etikoho uipo yt naku i nug hap hep hamo waku watoꞌe. Uiꞌywot atipy piat pe uiwanetup hap uipyꞌa piat typy sehay potiat uipiit yt naku i topyhuꞌat. Miꞌi pote etikoho kahato uhepiat iꞌaparap hap koꞌi yne waku watoꞌe Tupana pe. 9Waku paa watoꞌe Tupana pe aiminug saꞌag upi aikotã haty kahato hap aipyꞌa pe hap ewy aikotã aiwy sese ikuꞌuro hawyi haty hap ewy waku aiwak hap aipyꞌa pe hawyi -Tupana sakpoꞌe atunug saꞌag watoꞌe. Yt ikahu hin i atunug eete. Miꞌi tupono uimoti te kahato rat uipyꞌa pe waku watoꞌe aiwak popuo. Tupana uhepiat emaꞌat hap koꞌi yt ikahu hin i uipyꞌa pe uiwanetup hawe. Ahatyꞌu kahato yt kat i hin i uiwepiit hap toineꞌen. Uimoti hap yn toineꞌen uikai waku watoꞌe yt kat i aimikyryꞌi hap wywo. 10-Ehamo Tupana aremoti kahato uipyꞌa pe paa e hap wywo watoꞌe. Pywo pe pote Tupana mimotypot sese koꞌi watopyhuꞌat wuatꞌi eꞌat pe wuatꞌi ehamo.
Aiwoꞌokyꞌe Hap Yn Waku
11Uiwyriaꞌin yt naku i ahehay saꞌag wẽtup ok ete iraniaꞌin ete katupono Tupana toꞌe miwan me -Eiwoꞌokyꞌe ro eiwoꞌope e. Miꞌi pykai watimohit neꞌi wẽtup ok iraniaꞌin ehamo pote -Yt naku i meiẽwat miit watoꞌe pote Tupana woꞌonapin hap pun hanuaria wo watoineꞌen katupono yt iꞌe hap ewy hin i watunug mote. Uiwyriaꞌin yt naku i watimohit wẽtup ok ahehay yt naku i rakatno. -Etiꞌatumotypot ro iraniaꞌin e Tupana saꞌawyꞌi miwan me. Karãpe watiꞌatusatyꞌi satyꞌi miitꞌin ahehay wo hawyi watiꞌaparap kahato Tupana piat ainapin hap yt watimotypot i aiwy pote. Miꞌi hawyi watimohit Tupana piat ainapin koꞌi katupono aiꞌe hap aiwenapin hap saꞌag yn watunug. Poꞌog waku watunug ainapin hap sese Tupana iweꞌeg sese rakat piat ainapin hap. Yt naku i eweiꞌatumohit wẽtup ok miit e Tupana pote. 12Tupana yn aikuap sese sio waku aito sio yt hap katupono Tupana yn ni ikuap aiwanetup hap wakuap koꞌi sio yt nakuap i koꞌi. Miꞌi tupono kat poteĩ pyno -Yt naku i en watoꞌe wẽtup ok miat pe yt watikuap i kahato ipyꞌa piat pykai. Tupana yn ikuap wakuat sio yt hap. Miꞌi yn ikuap ainug koꞌi. Miꞌi pote Tupana yn ahehakyeraꞌat kuap iꞌewyte Tupana yn ni aiꞌapiheg kuap. Miꞌi pote yt naku i watoꞌe wẽtup ok etiat -Yt kan hamo i mekewat miit. Yt naku i kahato miꞌi tã watoꞌe katupono yne miitꞌin Tupana mikyꞌe koꞌi tukupteꞌen. -Wuatꞌi miitꞌin torannia ahekat koꞌi ewy tukupteꞌen e Tupana ahepe. Miꞌi pote yt eweimohit reiꞌo uhekat koꞌi e Tupana yt miitꞌin motypot i haria pe.
13Waku aiweꞌeg wo kahato ahehay pupi -Uimikyꞌesat yn atunug neran e hap pupi -Pyno mukiꞌite uimikyꞌesat ewy uiwepyi areto wẽtup tawa kape hawyi itote areineꞌen motꞌi hawyi itote atunug uiko iwatoꞌin nakat uimikyꞌesat oktan hawyi uhekat kahato raꞌyn areineꞌen itote aiꞌe hap pupi waku aiweꞌeg wo. -Pywo ti rat uiꞌe hap ewy atunug aru uimikyꞌesat oktan hawyi uiwepyi arepotpap kahato itote hawyi atiꞌatunug iwato kahato uhekat koꞌi hawyi areineꞌen hekat kahato rakatno itote uito. Taꞌi uimikyꞌesat ewy yn aru atiꞌatunug e hap pupi waku aiweꞌeg wo uiwyriaꞌin. 14Katupono yt watikuap hin i aikotã mukiꞌite aiporeꞌihotꞌok hap pykai i aikotã aru watoineꞌen sio are. Tupana yn miꞌi tã kuap hat iꞌewyte yt watikuap hin i karania eꞌat rẽ aheineꞌen hamuat hap koꞌi. Taꞌi aikotã hunete yꞌy heꞌyhig am hawyi atposake hawyi yt kat i raꞌyn toineꞌen itote. Miꞌi hap ewy kahato aheineꞌen hap topyhuꞌat mesuwarote. Taꞌi aheineꞌen porap i hawyi aikuꞌuro raꞌyn meremo hap ewy watoineꞌen mesuwat yi tote uiwyriaꞌin. 15Miꞌi pote poꞌog waku watoꞌe aipyꞌa pe -Tupana atunug neran emikyꞌesat ewy poꞌog waku watoꞌe. Tupana etum uhepe ehesaika hap uipowyro hamuat. Miꞌi pote ti aru areto motpap nug hamo poꞌog waku watoꞌe aipyꞌa pe. 16Yt naku i kahato watuwemowato kahato ahehay wo -Atunug kuap yne aiꞌe hap ete uiwyriaꞌin. Yt naku i watoꞌe -Uito poꞌog yne miitꞌin kai aiꞌe hap ete. Yt naku i aito watopyhuꞌat aiwehay pyi. Yt naku i -Uito poꞌog ekai e hatno watopyhuꞌat.
17Uimimuꞌeria karãpe watikuap kat som waku Tupana tikyꞌesat watunug hap hawyi maꞌato yt watunug i imikyꞌesat ewy hawyi watiꞌaparap kahato Tupana pe yt watunug i imikyꞌesat pote. Yt nakuaria i wo watopyhuꞌat yt kat i hin i watunug pykai. Miꞌi tã hap atikyꞌesat eweikuap taꞌyn uiwyriaꞌin are.
Currently Selected:
Tiaku 4: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.