1 Timoteu 3
3
Haga Myẽꞌym 3
Aikotã Waku Tupana Motpap Haria Airo Hamo
1Timoteu uwe uwe ipotpap kahato Iesui mohey haria apykok hamo miꞌi hat ti poꞌog wuatꞌi motpap kawiat kyꞌesat hat are. Aikotã hãpyk woꞌomuꞌe hat ipotpap. Miꞌi ti waku toꞌairo hawyi tutunug kuap hãpyk yn. 2Maꞌato eweꞌeg wo o miꞌi wuat airo hap ete Timoteu katupono yne miit mikuap hãpyk yn nakat waku etiꞌairo. Wẽtup ok wywo yn iharyꞌi rakat etiꞌairo. Yt naku i etiꞌairo kowoꞌi kowoꞌi wanetup haria. Waku -Yt uipo hep i Tupana potpap hap ete e hat etiꞌairo. Maꞌato waku wy emiꞌairoria paa e haria miitꞌin napin turanuat hanuaria teꞌeropyhuꞌat. Waku iraniaꞌin -Wakuat yn nug haria miꞌiria iꞌatuꞌe emiꞌairoria etiat. Iꞌewyte etikat o -Waku eweikupteꞌen uiꞌyat pe e hat waku etiꞌairo. 3Yt naku i mahy se kuap hat iꞌewyte marakꞌa yt naku i. Waku miitꞌin ete iperupꞌi kahato rakat woꞌowese hap etiꞌairo. Yt naku i kareꞌen kyꞌesat hap kape yn iwanetup hat. 4Waku watiꞌairo toꞌyat piaria poꞌoro perupꞌi tuwat hat. Waku imepytꞌin mimotypot imepytꞌin miehay mohey kahato. Miꞌi haria yn waku etiꞌairo eiꞌapykok hanuaria wo. 5Maꞌato yt toiꞌapykok kuap i tomepytꞌin miꞌi hap pote ti yt aikotã kuap i Tupana mepytꞌin apykok kuap hamo paĩ. 6Pyno iꞌewyte Iesui mohey pakup i haria neꞌi yt naku i aiꞌapykok hamo aiꞌakag wo katupono meremo i teꞌeruwemowato teran hap kaipyi teꞌeruwemaꞌat neꞌi aikotã saꞌawyꞌi wuat sese ahiag -Uito poꞌog e hat tuwemaꞌat neꞌi hap ewy ti Iesui mohey pakup i hat neꞌi aiꞌapykok hamo. 7Yt Iesui mohey haria yn i mimotypot maꞌato yne miitꞌin mimotypot etiꞌairo. Yne miitꞌin mimotypot etiꞌairo pote yt wẽtup ok pupi i tuwemoti. Miꞌi pote ahiag yt timaꞌat kuap i wy.
8Timoteu waku etiꞌairo aipyꞌasetpiaria waku rakaria aipowyro hanuaria. Miitꞌin mimotypot kahato yn waku etiꞌairo. Mahy u poityꞌi rakaria neꞌi yt naku i etiꞌairo. Ahekat nuat kyꞌesat hap kape yn wanetup hat yt naku i maꞌato hegyiꞌat rakat yn waku. 9Waku etiꞌairo yt waureꞌe hin i Iesui ehay tomimoherep tepiat imohey hat mekewat tomikuap oktan wakuat nug hat waku etiꞌairo. 10Maꞌato watiꞌairo aheropat hanuaria hawyi waku wahãꞌãg waku sio yt hap kuap hamo. Waku kahato ipotpap hap hawyi waku topyhuꞌat aheropat hamo maꞌato yt naku i ipotpap hawyi yt naku i. 11Iharyꞌi waku rakat yn waku. Iꞌewyte yt naku i iharyꞌi marakꞌa poityꞌi rakat neꞌi. Waku iharyꞌi iweꞌeg kahato rakat sehay pywuat piat yn ihay rakat. 12Waku aheropat haria wẽtup kahato yn iharyꞌi. Iꞌewyte waku tosaꞌyruꞌin tosakiꞌytꞌin toꞌyat piaria poꞌoro kuap kahato perupꞌi puo hat. 13Uwe topyhuꞌat aipowyro wakuat motpap wuat miꞌi hat ti aru topyhuꞌat wuatꞌi mimotypot kahato rakatno. Miꞌi hawyi karãpe -Uito Aikaꞌiwat Iesui mohey kahato hat iꞌatuꞌe aimuꞌe turan yt teꞌeruwemoti hin i iraniaꞌin woꞌokyryꞌi hap pupi miitꞌin mimotypot koꞌi miꞌiria pote.
14Timoteu mesuwat uimiwan atipoꞌoro ewowi uhehatꞌat kahato haype. Miꞌi tupono areto teran kahato ewowi uhehay ewywuat hamo. 15Maꞌato yt areto i pote yt uhewyry kuap i ewowi pote meikowat uimiwan atipoꞌoro ewowi aikotã waku etunug itote hap kuap hamo. Miꞌi uimiwan kaipyi waku etiꞌatunapin itotiaria aikotã waku aiwoꞌowese haria wo watukupteꞌen aito Iesui mohey haria. Taꞌi aito ti Tupana saꞌyruꞌin wo Tupana sakiꞌytꞌin wo aito watukupteꞌen wẽtup piit yn aito Tupana yat apyꞌyha iũtikag ewywuat aito katupono Tupana ehay mohey haria aito. 16Tupana mienoi Iesui etiat watikuap kahato maꞌato yt karãpe i watikuap yne yne. Tupana yn ikuap sese hat. Miꞌi hawyi ikuap hat sese tuwemoherep taꞌyn ahowawi. Mio tã toꞌe ahepe Iesui etiat -Meiũ ti pywuat sese e. Miꞌi Miit kape atipy piaria teꞌeraꞌakasa yne. Miꞌi ti imoherep taꞌyn kat ywania puo kat ywania puo miꞌi hap tuwemoherep taꞌyn tehay wo. Miꞌi hawyi ti iꞌatu kahato raꞌyn imohey haria mesuwat yi tote. Miꞌi hawyi Tupana tioto i raꞌyn atipy kape i are.
Currently Selected:
1 Timoteu 3: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.