1 Timoteu 2
2
Haga Typy 2
Waku Wahẽtup Tupana Kape Yne Morekuaria Powyro Hamo
1Timoteu enapin sese hap ahenoi teran kahato epe. Pyno waku wahẽtup kahato Tupana pe wuatꞌi miitꞌin powyro hamuat hap -Tupana etum o ihakyꞌeꞌi rakaria pe iꞌatumiꞌu iꞌatuesokpe iꞌatuꞌyat waku watoꞌe motꞌi haty wo hum hap kape. Tutum hawyi -Waku kahato En Papai etum naꞌyn uimiẽtup ewy waku watoꞌe Tupana pe Timoteu. 2Iꞌewyte waku wahẽtup Tupana pe -Etiꞌatupowyro o uruporekuaria uruꞌakag koꞌi mesuwarotiaria. Urupowyro kahato urutukupteꞌen hap ete hamo meiũpe waku wahẽtup. Etiꞌatupowyro uruieineꞌen hap wẽtup ehay yn hamuat. Yt karãpe i saꞌag uruete hamuat yt wẽtup ok i urupyhyp pyhyp wakuat nug hap ete emikyꞌesat nug wuatꞌi puat hamo. Etiꞌatupowyro morekuaria tuꞌisaria waku kahato wahẽtup Tupana pe. 3Mio tã wahẽtup pote watimowepiit kahato Tupana ahehakyeraꞌat hat. 4Katupono toikyꞌesat kahato miitꞌin torannia tomiehakyeraꞌat nuaria tehay pywuat sese hap kuap hanuaria toikyꞌesat. 5Wẽtup yn Tupana maꞌato yt uwe i miit ihay kuap iwywo katupono saꞌag nug haria yn pote maꞌato wẽtup miit ihay kuap iwywo. Aikaꞌiwat Iesui ihay kuap iwywo katupono miit sese yt saꞌag nug hat i pote. Miꞌi ikuꞌuro woꞌowese nug Tupana wywo hap. Koitywy imohey hap upi ahehay kuap Tupana wywo. 6Putꞌok e raꞌyn ahehakyeraꞌat hap eꞌat hawyi Aikaꞌiwat ikuꞌuro raꞌyn aikawiatno hamo tuweium naꞌyn ahepe. Miꞌi kape wataꞌakasa raꞌyn hawyi watikuap kahato wuatꞌi ywania Tupana tiꞌatukyꞌesat kahato tomiehakyeraꞌat no hap watikuap taꞌyn. 7Yt uheso i ti pywo sese ti. Saꞌawyꞌi ti uimuꞌe Tupana mesuwat sehay wo Tosaꞌyru etiat -Etimoherep to mesuwat uhehay wuatꞌi yt Iuteuria i iraniaꞌin ywania pe e. Uwe mesuwat uhehay pywuat mohey haria ti aru uimiehakyeraꞌat no tukupteꞌen e uhepe saꞌawyꞌi Tupana.
8Timoteu atikyꞌesat kahato miitꞌin torannia iꞌatuehay Tupana kapiat hap atikyꞌesat uito. Atikyꞌesat miꞌiria Tupana watnuaria wo yn hap. Atikyꞌesat miꞌiria tukupteꞌen yt woꞌoweukaꞌi hap mywo i maꞌato woꞌowese hap yn atikyꞌesat yt kat i saꞌag hap iꞌatuwywo. Iꞌatuehay toꞌoꞌewyꞌewy wẽtup ehay yn hap atikyꞌesat.
9Haryporiaꞌin atikyꞌesat kahato eweikupteꞌen Iesui mohey haria kahato. Waku weꞌeg sese rakaria wo eweikupteꞌen. Waku eiwepainug hap ehesokpe hãpyk kahato rakatno Iesui motypot hap eiwanetup hawe. Waku eiꞌasap iꞌewyte ehewahi ehesokpe imotypot hap wywo yn ehete. Eiweꞌeg wo o mekewat -Uito poꞌog hekat rakat eiꞌe hap eiwepainug hap pupi. Maꞌato waku ikahu rakatno o eweikupteꞌen imotypot ehepiat hap oktan. 10Waku poꞌog maꞌato eiwepainug eiwanetup hawe eiwese sese hap wywo iꞌewyte waku eweiwepainug waku nug hap wywo -Uito Iesui mohey hat sese eiꞌe hap enoi hamuat. 11Karãpe ewaꞌatunug aiwoꞌomuꞌe hamo turan waku eweimuꞌe kahato yt kat i mekewat sehay hap wywo. Waku eiwewaure kaꞌa kahato woꞌomuꞌe hat kape. Eweikupteꞌen perupꞌi puo eiꞌatunik takaria wo eweikupteꞌen itote. 12Yt atikyꞌesat i eipe ihainiaꞌin akag wo eweikupteꞌen. Iꞌewyte yt naku i ihainiaꞌin muꞌe hat akag wo eweikupteꞌen. Poꞌog waku iꞌatumimuꞌeria wo hewaure kaꞌa kahato rakaria wo eweikupteꞌen. 13Katupono saꞌawyꞌi Tupana tunug ihainia ti irokirẽ haryporia. Eiꞌyian me mimi Atãu tutunug hawyi mana Ewa tutunug. 14Iꞌewyte saꞌawyꞌi mana Ewa ti ipun Tupana piat ainapin hap. Toiꞌaparap miꞌi saꞌawyꞌi ahiag ehay upi pote. 15Miꞌi pote toineꞌen mesup ehete mekewat Tupana eiꞌapiheg hap mekewat haty kahato hap eimepyt tuwemoherep hap turan. Koitywy Iesui tiꞌatuehakyeraꞌat teran yne eipe haryporiaꞌin. Toikyꞌesat eipe tomiehakyeraꞌat wuaria hawyi woꞌokyꞌe haria hawyi weꞌeg kahato haria eipe hap toikyꞌesat are.
Currently Selected:
1 Timoteu 2: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.