1 Peteru 3
3
Haga Myẽꞌym 3
Waku Yne Uheineꞌen Hap Turan Iesui Mohey Haria Sese Watoineꞌen
1Pyno waku watunug morekuaria mikyꞌesat ewywuat. Iꞌewyte waku etunug eꞌaito mikyꞌesat ewywuat uheinytꞌin are. Eꞌaito toineꞌen pote etunug o imikyꞌesat ewywuat. Maꞌato eꞌaito yt Iesui mohey hat i pote iꞌewyte waku etunug imikyꞌesat ewy. Miꞌi tã etunug mote meremo etekyi Iesui mohey hap kape. Kat pote teꞌerahaꞌat kahato ewese hap kape maꞌato yt ehenoi hin i Tupana ehay tope pykai. Eheineꞌen hap ikahu rakat kaipyi topyhuꞌat Iesui mohey hatno saꞌawyꞌi yt tutunug neran hin i Tupana ehay pykai are. Miꞌi pote waku etunug eꞌaito eꞌakag wo uheinytꞌin are. 2Waku etum epiit eꞌaito pe yn yt kat i ewaire waire hap wywo. Miꞌi hawyi waku etimotypot kahato eꞌaito. Miꞌi hap kape tehaꞌat hawyi meremo ehekyi kuap Iesui kape. 3Miꞌi hawyi waku ewepainug hap koꞌi eipyꞌa pe eiwese hap wywo ewepiit hap wywo eiwanetup hawe. Waku pe eweikupteꞌen Tupana mikyꞌesat ewywuat. Iꞌewyte eweikupteꞌen hekat rakat ewy mekewat ewepainug hap wuatꞌi eꞌat piat hap ewy. Waku ewetopag wahi koꞌi eimokahu hamuat eiwanetup hap ikahu rakat. Iꞌewyte eipyꞌa piat ikahu hap ewywuat are. Iraniaꞌin haryporiaꞌin mesuwarotiaria teꞌeruwanetup taꞌatukahu hap kape yn taꞌatupiit kape yn teꞌeruwanetup. 4Taꞌatukyiꞌat taꞌatuekat ikahu kahato rakat mekewat mehit rakat hekat rakat kawiat uru kawiat saity koꞌi hawyi taꞌatupag yne taꞌatuꞌasap taꞌatupiit koꞌi ete uru imehit rakat yn taꞌatupag. Teꞌeruwepainug kahato wen maꞌato taꞌatupiit ete yn. Maꞌato eipe waku poꞌog ewetunug eipyꞌa pe ehekat ikahu hap eiwanetup hawe eiwese hap eiwepiit hap koꞌi. Miꞌi ewetunug mote ikahu rakat sese wo eweikupteꞌen Tupana wanetup hawe. Hekat rakaria sese wo eweikupteꞌen Tupana wanetup hawe Tupana mikyꞌesat ewy ewetunug mote. 5Iꞌatu kahato saꞌawyꞌi wuaria haryporiaꞌin Tupana mohey haria wakuap nug kahato haria are. Miꞌiria inug kahato taꞌatueꞌaito mikyꞌesat ewywuat. Taꞌatueꞌaito eropat haria kahato miꞌiria tukupteꞌen. Miꞌiria teꞌeruwepainug kahato Tupana mohey hap wywo. 6Saꞌawyꞌi sese ahehary mana Sara tunug yne ahaꞌaseꞌi pot Aparãu mikyꞌesat ewy. -Uikaꞌiwat en e teꞌaito pe. Pyno waku haryporiaꞌin eweikupteꞌen ehehary pot koꞌi ewywuaria wo. Pywo ti rat ewetunug eheꞌaito mikyꞌesat ewy ewetunug wakuat pote yt uwe i pupi i eweikenꞌẽ aru are. Yt kowoꞌi kowoꞌi hin i eiwanetup hap topyhuꞌat kat pote eikaꞌiwat eheꞌaito topyhuꞌat pote. 7Iꞌewyte worohoꞌonapin neran yne eipe mehinꞌin. Toineꞌen eharyꞌi pote mio tã areꞌe ehepe -Eiweꞌeg wo o yt eiweꞌeg i hap pupi are. Ereineꞌen eharyꞌi wywo aikotã iweꞌeg nakat ewy are. Etimotypot ro eharyꞌi are. Epiit poꞌog hesaika eharyꞌi kai pote etipowyro eharyꞌi epiit wywo. Pyno wẽtup miit ewywuat eweikupteꞌen mote waku eweiwat atipy kape eiwoꞌokyꞌe hap wywo eiwoꞌowese hap wywo eiwoꞌogyiꞌat hap wywo are. Waku woꞌomowepiit haria wo eweikupteꞌen. Miꞌi ewetunug mote karãpe ehehay Tupana kape eheharyꞌi wywo hawyi meremo Tupana eiwesat eipe wẽtup miit wanetup hap ewy eweikupteꞌen mote.
8Pyno mesup ahenoi teran uiwenapin hap yne Iesui mohey haria pe. Mio tã are aikotã wẽtup miit ewy waku eweikupteꞌen eiwanetup hawe. Waku woꞌokyꞌe kahato haria wo eweikupteꞌen are. Waku eipyꞌa pe eiwoꞌokyꞌe eiwoꞌope are. Waku eiwoꞌokyꞌe Iesui mohey haria pote aikotã eheywytꞌin eheykeꞌetꞌin eheinytꞌin kyꞌe hap ewywuat are. Aikotã eikywytꞌin eikypyꞌytꞌin ehekiꞌitꞌin kyꞌe hap ewy wẽtup mepytꞌin sok ewy waku eiwoꞌokyꞌe are. Karãpe hoꞌopot hap putꞌok e wẽtup ok Iesui mohey hat ete hawyi etipowyro o miꞌi. Iꞌewyte karãpe iraniaꞌin hatek pote etipowyro miꞌi eipyꞌa pyi ikyꞌe hap wywo. Waku eweikupteꞌen eiwese kahato iraniaꞌin etiat rakaria wo. Waku eweiꞌe iraniaꞌin Iesui mohey haria pe -Wẽtup yn aimimohey uhyt mana eweiꞌe o are. Ereke uhyt mana mimi eweiꞌe. Eraꞌapyk o eweiꞌe. Miꞌi hawyi hegyiꞌat rakaria wo aru eweikupteꞌen Iesui mohey hap wywo are. 9Karãpe Iesui mohey haria iraniaꞌin yt iꞌatuwese i ehete hawyi waku eweikupteꞌen iwese rakaria wo. Yt eweipoepyk teiꞌo iraniaꞌin tunug saꞌag ehetiat pote. Taꞌatunug saꞌag hawyi -Waku eweiꞌe emohit miꞌiria pote. Etiꞌatumotypot miꞌiria uhytꞌiꞌin manaꞌin. Miꞌi tã ewetunug mote Tupana mipoityro koꞌi wo eweikupteꞌen. Yne Tupana ekat topyhuꞌat eiwatnuat atipy pe. Miꞌi tã ewetunug mote -Worohoꞌopoityro eipe e Tupana ahepe. 10Uiwyriaꞌin eweikupteꞌen mesuwarote iwese kahato rakaria wo iwepiit sese rakaria wo eweikupteꞌen are. Maꞌato eheineꞌen hap mesuwarotiat iꞌewyte wepiit hap ikahu sese hap koꞌi eweikyꞌesat pote eiwenapin ihay nug hap ete iraniaꞌin wywo. Eweimuꞌe ro ehẽku sehay wakuat nug hamo are. Karãpe ehẽku ihay teran saꞌag nug hap ete pote -Waĩꞌeweiꞌe o ehẽku pe. Karãpe ehẽku timohit reran iraniaꞌin mote -Waĩꞌeweiꞌe o ehay saꞌag nug hap ete. 11Waku eweimuꞌe ehẽku sehay iwese rakat nug hamuat hap ete miitꞌin wywo. Miꞌi hawyi eimowepiit hap mesuwarotiat eweipuẽti Tupana kaipyi are. Yt naku i aiwẽ pyi ahehay haiug nakat yt iwese rakat i yt hẽꞌẽ i rakat. Waku watuwemuꞌe sehay miitꞌin mowepiit hamuat e hap nug hamuat ete are. Waku watiꞌatoiat yne aiminug saꞌag koꞌi aimikyꞌesat koꞌi aiminug saꞌawyꞌi wuat hap ewy. Miꞌi hawyi waku watikat aat kaꞌap woꞌowese nug hamuat hap. Aikotã watimohan miat yne ahesaika hap wywo hap ewy. Miꞌi hap ewywuat yne ahesaika hap wywo watimohan aiwoꞌomowepiit hap are. 12Taꞌi uiwyriaꞌin Tupana tikuap kahato uwe uwe topyhuꞌat waku nug hat waku wanetup hat iwese rakat. Miꞌi hat kape Tupana ewaure kaꞌa tuwehik kahato. Tupana tikuap kahato mekewat miit miẽtup koꞌi. Mekewat miit ihay hawyi meremo Tupana tiwesat. Maꞌato iraniaꞌin yt naku i nug haria ete Tupana yt tuwehum hin i iꞌatuewowi maꞌato topyhuꞌat yt naku i nug haria ewanikap mo are. 13Watunug Tupana mikyꞌesat ewy pote waku mekewat watimohan kahato inug hamo kat pote yt uwe i mesuwarotiat aimaꞌat kuap hat topyhuꞌat.
14Uiwyriaꞌin karãpe mesuwarotiaria yt iꞌatuwese i kahato ahete waku nug haria aito pote waku watuwemowepiit mesuwarote. Yt naku i watokenꞌẽ iꞌatupupi. Yt naku i aiwanetup hap kowoꞌi kowoꞌi miꞌiria pupi. 15Waku poꞌog watimotypot Tupana aipyꞌa pe. Miꞌi hawyi waku watikat sehay wakuat aiwanetup hawe yne miitꞌin wesat hamuat hap. Karãpe putꞌok e wẽtup ok ahowawi hawyi toꞌe ahepe -Kat pote etimohey Iesui. Miꞌi hawyi waku watimoherep iꞌatuepe aimimohey Iesui ahehay perupꞌi puo yt kat i -Uito poꞌog eikai aiꞌe hap wywo. Maꞌato aikotã paa e haria ewy waku watiꞌatuekyi miitꞌin aimimohey Iesui kape. 16Uiwyriaꞌin waku watoiat yne aiminug koꞌi aiwanetup saꞌag hap koꞌi. Miꞌi hawyi waku ahewyry yt kat i haty aipyꞌa piat wywo aiwanetup hawiat aiminug saꞌag wywo. Miꞌi hawyi karãpe iraniaꞌin iꞌatuꞌe saꞌag kahato ahete iꞌatueso hap kaipyi yt kat i aiwemoti hap topyhuꞌat kat pote watikuap yt kat i saꞌag watunug pote. Watikuap Aikaꞌiwat Iesui mikyꞌesat ewy watunug mesuwarote pote. 17Pyno Tupana tikyꞌesat tuereto hoꞌopot ahepiat hap waku nug haria aito pote. Miꞌi hawyi mesuwarotiaria ahaty hatyꞌi haria wo tukupteꞌen. Karãpe hoꞌopot hap toineꞌen waku nug haria aito pote miꞌi pote waku watuwehum Tupana kape. Maꞌato karãpe aito Iesui mohey hat pykai watunug saꞌag mote mesuwarotiaria ahaty hatyꞌi hawyi haty sese hap topyhuꞌat kat pote yt watuwehum kuap i Tupana kape. 18Saꞌawyꞌi Aipotypot Aiporekuat Iesui miitꞌin mikyryꞌi hamo topyhuꞌat mesuwarote aikotã aikotã taꞌatunug saꞌag tuwete waku rakat pykai taꞌatuꞌauka. Maꞌato yt kat i saꞌag tutunug pykai tohoꞌopot kahato. Maꞌato aiminug saꞌag upi tohoꞌopot. Iesui hãpyk kahato rakat maꞌato ikuꞌuro yt hãpyk i rakaria mohãpyk hamo. Ikuꞌuro muap nug hamo Toꞌywot Tupana kapiat muap nug hamuat. Koitywy toineꞌen muap Tupana kapiat Iesui hoꞌopot hap kaipyi. Yt hãpyk i sese rakat toimohãpyk kuap taꞌyn. Pyno ipiit ikuꞌuro ariaꞌyp posak ete maꞌato miꞌi hawyi Tupana Paꞌãu timoieineꞌen Aikaꞌiwat. 19Ikuꞌuro ariaꞌyp posak ete hawyi Iesui toto aikope miitꞌin paꞌãu sem tukupteꞌen hap kape aikope miitꞌin paꞌãu sem tukupteꞌen iꞌatupyhyp hap kape toto. Miꞌi tote toimoherep iꞌatuepe tehay ikahu rakat tokuꞌuro hawyi. 20Iꞌatu kahato miit itote yt naku i nug haria. Miꞌi haria kape toto. Aikope tukupteꞌen Nuꞌe mimuꞌeria. Saꞌawyꞌi Nuꞌe tiꞌatumuꞌe miꞌiria. Tutunug mekewat yara wato koro turan toiꞌatumuꞌe maꞌato yt taꞌatumohey i. Tupana tiꞌatukyꞌesat kahato miꞌiria tuwewawiat hap. Toiꞌatuekyi kahato Nuꞌe ehay wo maꞌato yt taꞌatumohey i. Miꞌiria kape Iesui toto tokuꞌuro hawyi aikope tukupteꞌen ikuꞌuro rakaria hap kape. Miꞌi hawyi toimoherep iꞌatuepe mekewat sehay wakuat. Katupono saꞌawyꞌi mesuwat yi tote Nuꞌeꞌin yn Tupana miehakyeraꞌat koꞌi topyhuꞌat. Mekewat yara wato pe tukupteꞌen 8 ok yn Nuꞌeꞌin koꞌi. Miꞌi hawyi iꞌaman iwato tiꞌatuꞌuka yne mesuwarotiaria maꞌato mekewat Nuꞌe minug yara wato tiꞌatuehakyeraꞌat 8 ok takaria katupono mekewat yara wato pe tukupteꞌen Nuꞌeꞌin mekewat yꞌy wato yowa tote. 21Miꞌi hap ewy kahato ahetꞌok hap topyhuꞌat. Yꞌy piat wateke aikotã Iesui ikuꞌuro hap ewy. Watuwẽtem yꞌy pyi hawyi aikotã Iesui tuwẽtem guꞌuro pyi hap ewy watoineꞌen. Maꞌato mekewat yꞌy yt aikoho kuap i aipit pit ok hap aiminug saꞌag koꞌi maꞌato ahetꞌok hap watunug hawyi yt kat i haty hap aiwanetup hawe kat pote Tupana mikyꞌesat ewy watunug aikotã Nuꞌe ewy yꞌy sakpo watuwat aheꞌyara puo hap ewy. 22Mesup taꞌyn Aheykeꞌet Iesui teke raꞌyn atipy pe. Koitywy taꞌapyk Tupana po sese kai taꞌapyk. Miꞌi tote Tupana mimotypot no topyhuꞌat -Koitywy Uhaꞌyru woronug En wuatꞌi miitꞌin Akag wuatꞌi porekuaria Akag wuatꞌi atipy piaria akag wo woronug En e Tupana Tosaꞌyru pe. Yne esaika hap atum epe e Tupana Tosaꞌyru pe Iesui pe.
Currently Selected:
1 Peteru 3: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.