1 Peteru 2
2
Haga Typy 2
Waku Tupana Ehay Yn Kyꞌesat Haria Wo Watoineꞌen
1Pyno uiwyriaꞌin waku watoineꞌen Tupana mepytꞌin no ipakup i rakaria ewy kurin nakaria ewy. Aikotã mihy sym haria ewy watukupteꞌen katupono Tupana mimoherep pakup i koꞌi raꞌyn aito. Miꞌi tupono waku watoiat yne aiminug koꞌi saꞌawyꞌi wuat yt naku i hap koꞌi. Mekewat miitꞌin maꞌat hap koꞌi mekewat miitꞌin mohit hap koꞌi mekewat typy sehay nug hap koꞌi mekewat iraniaꞌin ekat kyꞌesat hap koꞌi mekewat sehay saꞌag nug hap koꞌi mekewat miitꞌin ekat kyꞌesat hap koꞌi uhehayꞌywyi hap koꞌi waku watoiat yne aikotã watoiat ahesokpe yt ikahu i rakat hap ewy waku watoiat. 2Kat pote Tupana sakiꞌytꞌin Tupana saꞌyruꞌin sok aito miꞌi pote waku watikyꞌesat kahato Tupana ehay aikotã aimepyt hit tikyꞌesat kahato mihy hap ewy. Pyno watuꞌu kahato Tupana ehay hawyi ahehãite aikap aipiit hesaika aimotag hap topyhuꞌat aikotã aimepyt pakup mihy ete itag hap ewy. 3Pyno watikuap kahato miꞌu ete aimotag hap. Miꞌi hap ewy wahãꞌãg Aikaꞌiwat egyiꞌat hap ete aikyꞌe hap ete. Miꞌi hawyi watikuap taꞌyn iwese kahato rakat he kahato rakat Aipotypot Iesui hap. 4Uiwyriaꞌin saꞌawyꞌi mesuwarotiaria ipun kahato haria Aikaꞌiwat taꞌatumimohey wuatnuat. Aikotã miitꞌin tikat nu ikahu rakat taꞌatuꞌyat nug hamuat hap ewy. -Wẽtup waku wẽtup yt naku i watikat nu turan. Miꞌi hap ewy saꞌawyꞌi wuaria taꞌatupugha mekewat nu -Yt naku i meimewat nu aiꞌyat nug no iꞌatuꞌe. Miꞌi yt kan hamo i aiꞌyat haꞌawy nug hamo iꞌatuꞌe. Miꞌi hap ewy ti Iesui topyhuꞌat Tupana miꞌairo aiꞌyat nug nu kawiat hamo. Maꞌato miꞌi Nu hekat kahato rakat mekewat aiꞌyat wuat -Poꞌog waku torannia kai mesuwat Nu eꞌyat nug hamo e Tupana. Uimiꞌairo kahato mesuwat Nu e Tosaꞌyru Iesui etiat. Waku etopag mesuwat Nu saꞌawyꞌi wuat eꞌyat nug hamo e Tupana ahepe. 5Iꞌewyte aitoria Iesui mohey haria watopyhuꞌat nu koꞌi ewy Tupana yat nug hamuat hap ewy. Pyno iꞌatu kahato nu Tupana yat nug hap wẽtup nu uito wẽtup nu en wẽtup nu eipe hap ewy. Tupana yat nu koꞌi aito hap ewy watopyhuꞌat. Iꞌewyte ti aito Tupana epaꞌi koꞌi ewywuat watoineꞌen katupono ahehay kuap Tupana wywo aikotã saꞌawyꞌi wuaria taꞌatuꞌatuꞌuka taꞌatuhũria hawyi taꞌatuwuk Tupana mowepiit hamo. Miꞌi hap ewy watunug mesup. Watimohey Iesui Aipotypot hawyi Tupana mowepiit haria wo watopyhuꞌat Tupana hũ Aikaꞌiwat pote. Miꞌi aihũ watum Tupana pe imowese hamuat imowepiit hamo aikotã paꞌi koꞌi ewy aito. 6Mio tã Tupana toꞌe saꞌawyꞌi tehay moherep haria wẽ pyi miwan me. Mio tã e -Toineꞌen uhetama pe tawa Ierusarẽi me yityꞌok Siãu note ahaꞌawynug uimotypot yat sese mekewat Nu wato tote mekewat Nu uimiꞌairo tote mekewat Nu ikahu rakat rote mekewat Nu hekat rakat rote ahaꞌawynug uimotypot yat sese e. Saꞌawyꞌi sese atopag mekewat Nu yityꞌok Siãu tote. Iraniaꞌin yt tikyꞌesat i mekewat Nu maꞌato uwe uwe ikyꞌesat uwe uwe imohey mekewat miit topyhuꞌat iheg kahato rakat aikotã mekewat Nu totiat eꞌyat iheg nakat kahato hap ewy. Uwe uwe inug toꞌyat mekewat Nu tote miꞌi pote yt karãpe i taꞌat iꞌatuꞌyat. 7Ikahu kahato mekewat Nu watoꞌe imohey haria aito pote. Maꞌato iraniaꞌin yt imikyꞌesat nug neran i haria -Yt kan hamo i mekewat Nu iꞌatuꞌe. Yt naku i watunug aiꞌyat itote iꞌatuꞌe. Miꞌi hawyi taꞌatuꞌatoiat mekewat Nu maꞌato Tupana yt totiat hin i. Miꞌi pote pyno -Mekewat Nu iraniaꞌin miꞌatoiat wakuat kahato rakat Uimepyt ewywuat e. Iraniaꞌin miꞌatoiat wo topyhuꞌat maꞌato Miꞌi tote atunug uimotypot yat koro e kat pote atipuẽti mekewat Nu poꞌog hãpyk takat torannia kai e Tupana. 8Karãpe toineꞌen nu muap tote hawyi wataꞌat tuereto mekewat nu ete aimopyꞌahak kahato. -Yt naku i mekewat nu aipuꞌap tote watoꞌe maꞌato iheg me toineꞌen. Miꞌi hap ewy kahato iraniaꞌin yt Iesui mohey i haria tukupteꞌen Tupana e hap Iesui etiat pe. Taꞌatupuẽti mekewat sehay wakuat hawyi iꞌatumopyꞌahak hap topyhuꞌat -Yt naku i iꞌatuꞌe.
9Maꞌato aito ti aikotã wẽtup ywania Tupana miꞌairo wẽtup ywania ewywuat koꞌi aito. Kat pote Tupana saꞌyruꞌin sakiꞌytꞌin aito. Miꞌi pote Tupana aiꞌairo tepaꞌi koꞌi wo maꞌato yt mesuwarotiat paꞌi koꞌi ewywuat i. Katupono aito morekuaria ewy watopyhuꞌat Tupana wanetup hawe. Aitoria aikotã wẽtup tama piaria ewywuat Tupana eꞌyi kaꞌiwaria aito. Aiwanetup hap koꞌi yt mesuwarotiaria minug koꞌi mesuwarotiaria wanetup hap koꞌi ewy hin i. Miꞌi pote -Eiperia yt miit ewy i iꞌatuꞌe ahepe. Miꞌi pote Tupana motypot hap yn watikyꞌesat mesuwarote. -Waku kahato uruetupana watoꞌe iraniaꞌin me. Saꞌawyꞌi urutukupteꞌen aikotã iꞌypyryp we hap ewy. Maꞌato mesup urutukupteꞌen hẽtyhot puo hap ewy. Saꞌawyꞌi Tupana yt heremo hin i uruepe. Koitywy heremo hap ewy urupyꞌa pe uruimohey pote. 10Saꞌawyꞌi watoineꞌen aikotã piku piku koꞌi ewy yt iꞌywot i yt ity i rakaria ewy. Gaꞌapy piat hewyry rakaria ewy yt uwe ywania ewy i ahewyry. Maꞌato watomohey Aikaꞌiwat Iesui hawyi Tupana ainug tosakiꞌytꞌin sese tosaꞌyruꞌin sese wo raꞌyn. Miꞌi hawyi Tupana ywania wo watopyhuꞌat. Saꞌawyꞌi yt uwe i aikyꞌe haria -Yt kan hamo i eipe iꞌatuꞌe ahepe. Maꞌato koitywy Tupana mikyꞌe koꞌi kahato aito. Ahehakyeraꞌat raꞌyn Tupana yt ahewaku pykai hin i aikyꞌe. Miꞌi pote Tupana etama puaria aito watopyhuꞌat.
Waku Wuatꞌi Eꞌat Pe Iesui Mohey Haria Sese Wo Watoineꞌen
11Uito ti Peteru. Uimikyꞌeria sese eipe. Miꞌi pote atikyꞌesat kahato ewetunug uimikyꞌesat ewy. Atikyꞌesat kahato eweiꞌatoiat yne ehewaire hap kyꞌesat hap koꞌi eipiit mikyꞌesat saꞌag koꞌi. Karãpe wẽtup ok ehãꞌãg hawyi -Yt atikyꞌesat i eweiꞌe. Taꞌi aimikyꞌesat saꞌag koꞌi aipyꞌa piat toineꞌen aat kaꞌap hawyi meiũran yt kat i Tupana kyꞌe hap toineꞌen aikai kat pote mekewat aimikyꞌesat saꞌag koꞌi tuꞌuka kahato Tupana mikyꞌesat hap wywo aipyꞌa pe. Mesuwat rotiaria ewy yt naku i watopyhuꞌat kat pote atipy piaria aito pote. Ahewyry mesuwarote wen maꞌato ahetama sese yt mesuwarote i. Miꞌi pote yt naku i iraniaꞌin mikyꞌesat ewywuat watunug saꞌag iꞌatuwywo. 12Iraniaꞌin teꞌerahaꞌat kahato ahowawi sio pywo pe watomohey sio yt hap kape. Miꞌi pote aheineꞌen hap mesuwarote aikotã Iesui ewy hãpyk kahato rakat ewy waku watopyhuꞌat are. Uiwyriaꞌin waku watunug hãpyk kahato iꞌatuehamo. Miꞌi pote meiũran hoꞌopot hap eꞌat putꞌok e iꞌatuete hawyi meremo taꞌatumohey aikotã aito hap ewy. Miꞌi hawyi Tupana motypot hap ete aikotã aiꞌewy tukupteꞌen hãpyk kahato watunug wakuat pote. Mesup iꞌatumikyryꞌi hamo watoineꞌen watomohey Iesui pote -Yt naku i nug haria iꞌatuꞌe maꞌato yt pywo pe i. Katupono aikotã wẽtup ywania miꞌiria tukupteꞌen yt Tupana ywania hin i yt aiꞌe hap ewywuat i miꞌiria. 13Pyno watoineꞌen mesuwarote turan waku watunug aikaꞌiwaria piat aipoꞌoro hap oktan ahetuꞌisa piat aipoꞌoro hap oktan aiꞌakag koꞌi piat aipoꞌoro hap oktan. Miꞌi watunug pote aiꞌakag sese atipy piat motypot haria wo watoineꞌen. -Waĩ yt etunug neiꞌo iꞌatuꞌe pote pyno -Waku watoꞌe. -Miꞌi tã o etunug iꞌatuꞌe pote pyno -Waku morekuaria watoꞌe. 14Morekuaria ti Tupana miꞌairo koꞌi tukupteꞌen. Iꞌatuesuraraꞌin iꞌewyte Tupana miꞌairo koꞌi tukupteꞌen. Miꞌiria tukupteꞌen yt naku i nug mupiat monik hamuat mesuwat yi totiat. Iꞌewyte waku nug haria motypot hamuat. Miꞌi hamo taꞌatuꞌairo mesuwarotiaria morekuaria tuꞌisaria aipowyro hamuat. 15Mesuwat rotiaria yt iweꞌeg i rakaria i ihay saꞌag nakaria aimohit reran taꞌatuehay wuat rakaria maꞌato watiꞌatunug wakuat kahato yne miitꞌin kape hawyi yt iꞌatuehay saꞌag kuap i poꞌog ahete. Miꞌi hap ewy Tupana tikyꞌesat kahato. 16Pyno pywo pe ti aitoria Iesui mohey haria watukupteꞌen aikotã yt kat i aipyhyp hap ewy kat pote Tupana eropat haria watukupteꞌen Tupana mikyꞌesat watunug iꞌe hap ewy pote. Yt naku i watoꞌe morekuaria pe -Pyno yt poꞌog i atunug emikyꞌesat ewy katupono miꞌi hawyi ti aru Tupana mikyꞌesat ewy yn atunug yt naku i watoꞌe. Yt naku i watoꞌe aikaꞌiwaria pe -Uito Iesui eropat hat mesup pote yt atunug i poꞌog emipoꞌoro ewy naku i watoꞌe ahetuꞌisaria pe. 17Waku watiꞌatumotypot yne mesuwarotiat miitꞌin. Yt naku i watimohit mesuwarotiaria miitꞌin. Waku iꞌewyte watiꞌatukyꞌe kahato yne Iesui mohey haria aikotã wẽtup yat piaria ewy waku watukupteꞌen. Waku watoꞌokyꞌe aikotã watikyꞌe aheywytꞌin aheinytꞌin aheykeꞌetꞌin aikywytꞌin aikypyꞌytꞌin ahekiꞌitꞌin watikyꞌe hap ewy. Waku watimotypot kahato aheTupana yne aikyꞌe hap wywo. Waku tyryꞌwatoꞌe aipyꞌa pe Tupana pupi. Iꞌewyte waku watiꞌatumotypot kahato mesuwarotiat aiporekuaria are.
18Uiwyriaꞌin toineꞌen aikaꞌiwaria ahetuꞌisaria aiporekuaria mesuwarotiaria iwese kahato rakaria. Iꞌewyte toineꞌen yt iwese hin i rakaria. Toineꞌen wakuaria iꞌewyte toineꞌen yt nakuaria i. Miꞌi pote worohoꞌonapin eipe. Waku ewetunug eikaꞌiwaria ehetuꞌisaria eiporekuaria mikyꞌesat ewy sio iwese rakaria sio yt sio ipyꞌahak takaria sio yt hap. Pyno waku watopyhuꞌat iꞌatueropat haria wo iꞌatumotypot hanuaria wo aito Tupana eropat haria aito pote. 19Karãpe iraniaꞌin mesuwarotiaria aimohit kahato taꞌatuehay wo aiꞌapiheg kahato yt kat i watunug saꞌag pykai ahatyꞌi hatyꞌi kahato taꞌatuwẽpyi miꞌi hawyi yt watipoepyk hin i iꞌatuewowi. Yt kat watoꞌe i. Watimohey te ti Tupana. Miꞌi hawyi miꞌi hap watunug pote Tupana -Waku kahato eipe e ahepe. 20Karapeĩ watunug yt naku i hawyi suraraꞌin morekuaria aiꞌapiheg kahato aiminug saꞌag saꞌup taꞌatuium kahato ahepe. Miꞌi hap eꞌat pe yt wahoꞌowesat kuap i kat pote yt naku i nug haria aito pote. Maꞌato karãpe morekuaria esuraraꞌin koꞌi aiꞌapiheg yt kat i watunug saꞌag pykai Iesui mohey haria aito pote miꞌi turan yt watiꞌatuwesat i pote yt watuwemopyꞌahak i. Waku watuwehum yn Tupana kape aiꞌapiheg turan. Miꞌi watunug pote Tupana motypot hap sese topyhuꞌat ahepe -Waku kahato eiperia e Tupana ahepe. 21Aikaꞌiwat Aipotypot Iesui saꞌawyꞌi hoꞌopot kahato miitꞌin iꞌatumikyryꞌi kahato tuwete. Yt kat i tutunug saꞌag pykai taꞌatuꞌahyk taꞌatuꞌauka maꞌato yt kat i toꞌe saꞌag iꞌatuepe. Yt toiꞌatupoepyk hin i miꞌi tã taꞌatunug pykai kat pote toimoherep teran ahepe aikotã waku watunug aiꞌapiheg haria pe hap. Toikyꞌesat kahato watunug tominug hap oktan toikyꞌesat. Miꞌi hap kape aikay kay aikotã topiat hoꞌopot hap ewy hamuat hap kape. 22Pywo pe ti rat Aikaꞌiwat yt kat saꞌag hin i tutunug pykai taꞌatuꞌauka. Yt wẽtup sehay saꞌag tutunug towẽ pywiat pykai i taꞌatuꞌahyk ahyk Aikaꞌiwat are. 23Taꞌatumohit kahato Aikaꞌiwat Iesui taꞌatuehay saꞌag wywo maꞌato yt kat i toiꞌatuwesat saꞌag. Yt toiꞌatupoepyk hin i saꞌag wywo. Taꞌatuꞌahyk ahyk Iesui turan hoꞌopot kahato tepiat turan yt kat e hin i iꞌatuepe -Meiũran worohoꞌoꞌahyk eipe yt e i maꞌato toꞌe Tupana pe -Atikuap Papai aikotã aru uhewaku hap etimoherep wuatꞌi ehamo. Ewẽ pyi yn waku uwe waku uwe yt enoi hamo. En yn etikuap e Iesui Toꞌywot pe. 24Pywo ti rat Aikaꞌiwat Iesui tuut irane kat pote yne aiminug aiꞌapiheg saꞌag koꞌi yne miitꞌin mesuwarotiaria minug saꞌag koꞌi topyhuꞌat Aikaꞌiwat piit pe. Mekewat ariaꞌyp tote tohoꞌopot kahato topiit ete. Tupana miꞌapiheg wo topyhuꞌat. Tuwepyi Aikaꞌiwat yne Tupana piat aiꞌapiheg hap aiminug saꞌag koꞌi u hamo tuut. Miꞌi hawyi aiꞌapiheg hap yne topyhuꞌat Iesui piit ete mekewat ariaꞌyp posak tote. Ipiit ete yne topyhuꞌat Tupana kaipywiat aiꞌapiheg hap koꞌi aiꞌahyk ahyk hap tutuꞌu yne. Haty kahato tuete. Miꞌi hawyi aimoehãite hamuat hap topyhuꞌat. Haty hap yne tutuꞌu yne hawyi ikuꞌuro aheiam me. Aikuꞌuro hap tutuꞌu yne. Miꞌi pote aito watoineꞌen ikuꞌuro rakaria ewy iwywo mekewat aiminug saꞌag ete. Yt ahesaika i poꞌog aito watoineꞌen. Aikotã ikuꞌuro rakat yt wahãꞌãg kuap i yt naku i nug hamo hap ewy. Miꞌi hap ewy watopyhuꞌat mesup. Maꞌato wakuat yn sake i watunug kuap mesup kat pote watuwẽtem guꞌuro pyi Aikaꞌiwat wywo hap ewy. Miꞌi hawyi waku nug haria wo watopyhuꞌat iwywo. 25Maꞌato saꞌawyꞌi aitoria watukupteꞌen aikotã aihũria miꞌapykok koꞌi ewy piku piku koꞌi ewy aikotã aihũria Kuteiru koꞌi hoꞌowasat gaꞌapy piat hap ewywuaria watukupteꞌen saꞌawyꞌi. Maꞌato mesup aitoria Aikaꞌiwat Koro hũria wo watukupteꞌen. Miꞌi ti aiꞌapykok hat akag. Miꞌi upi ti watuwat atipy kape Ahepaꞌi Koro Miꞌi Miit Iesui pote are.
Currently Selected:
1 Peteru 2: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.