Mak 15
15
Olketa tekem Jisas go long Paelat
(Matiu 27:1-2, 11-14; Luk 23:1-5; Jon 18:28-38)
1Nao long eli moning yet, olketa hedprist an olketa tisa blong Lo an olketa nara bikman an evri memba long Kansol, olketa miting fo mekem wanfala plan nao. Olketa taemap han blong Jisas an olketa lidim hem an givim hem go long han blong Paelat. 2Nao Paelat hemi askem Jisas olsem, “?Waswe, so yu nao yu King blong olketa Jiu?”
An Jisas hemi ansarem hem olsem, “Yu seleva nao yu talem olsem ya.”
3Nao olketa hedprist olketa talem plande samting moa agensim Jisas. 4So Paelat hemi askem Jisas olsem moa, “?Waswe nao yu no ansarem olketa? !Yu lukim, plande samting nao olketa gohed fo talem agensim yu!”
5Bat Jisas hemi no talem enisamting nomoa. So Paelat hemi barava sapraes tumas long diswan nao.
Paelat jajem kes blong Jisas
(Matiu 27:15-26; Luk 23:13-25; Jon 18:39—19:16)
6Nao long evri Fist blong Pasova, olketa pipol save askem Paelat fo letem wanfala man fo goaot from prisin. 7An long taem ya, samfala man nao olketa stap long prisin bikos olketa bin mekem wanfala bikfala faet agensim gavman, an olketa kilim wanfala man i dae. An wanfala long olketa nao nem blong hem Barabas. 8Nao olketa pipol kam long Paelat an askem hem fo duim diskaen wei wea hemi save duim oltaem. 9So Paelat hemi askem olketa olsem, “?Waswe, yufala laekem mi fo letem disfala King blong yufala olketa Jiu nao fo hemi go fri?” 10Hemi tok olsem bikos hemi save finis wea olketa hedprist nao olketa tekem kam Jisas long hem, from olketa joles tumas long hem.
11Bat olketa hedprist olketa gohed fo talem olketa pipol fo askem Paelat fo letem Barabas nao fo go fri. 12So Paelat hemi askem olketa moa, “?Sapos olsem, wanem nao bae mi duim long man ya, wea yufala sei hemi King blong yufala olketa pipol blong Jiu?”
13Nao olketa singaot gobaek olsem, “!Nilam hem long kros!”
14So Paelat hemi askem olketa moa, “?Watkaen samting nao hemi duim wea hemi rong?”
Bat olketa singaot bikfala moa olsem, “!Nilam hem long kros!”
15Nao Paelat hemi wande fo mekem olketa pipol fo hapi, so hemi letem Barabas fo go fri nao. An hemi talem olketa soldia fo wipim Jisas, an bihaen, hemi givim hem go long olketa fo nilam hem long kros.
Olketa soldia mekfan long Jisas
(Matiu 27:27-31; Jon 19:2-3)
16Nao olketa soldia tekem Jisas go insaet long eria long midol long bikfala haos blong Paelat. An taem ya nomoa, olketa kolem olketa nara soldia fo kam wea olketa stap long ples ya. 17Nao olketa mekem hem fo werem longfala red kaleko.#15:17 “longfala red kaleko” “kraon” Tufala samting ya hemi somaot dat man hemi king. An olketa mekem moa wanfala kraon long wankaen rop wea hemi garem plande nila long hem, an olketa putum long hed blong Jisas. 18Bihaen ya, olketa gohed fo salutim hem an tok long hem olsem, “!Yu nao King blong olketa Jiu!” 19An olketa hitim hed blong hem wetem stik an olketa spit long hem moa, an olketa nildaon long frant blong hem olsem fo mekhae long hem. 20An taem olketa mekfan long Jisas finis, olketa tekemaot longfala red kaleko ya from hem, an olketa mekem hem fo werem moa olketa kaleko blong hem seleva. Bihaen, olketa tekem hem go nao fo nilam hem long kros.
Olketa nilam Jisas long kros
(Matiu 27:32-44; Luk 23:26-43; Jon 19:17-27)
21Taem#Rom 16:13. olketa wakabaot go long rod, olketa mitim wanfala man wea nem blong hem Saemon hu hemi stap kam aotsaet long taon ya. Nao olketa soldia ya olketa fosim hem fo karim kros blong Jisas. Man ya, hemi kam from biktaon long Saerin an hemi dadi blong Aleksanda an Rufas. 22Olketa tekem Jisas go long wanfala ples, nem blong hem Golgota, wea hemi minim “Bon blong hed blong man.” 23An olketa givim hem waen wea olketa miksim meresin#15:23 “meresin” Diswan hemi wata blong wanfala tri wea olketa kolem “maa”. Diswan hemi fo helpem man wea hemi pein tumas. insaet, bat Jisas hemi no dringim nomoa. 24Nao#Sams 22:18. olketa soldia i nilam Jisas long kros, an olketa divaedem nao olketa kaleko blong hem long olketa seleva, wea olketa pleim daes fo faendemaot hu nao bae tekem olketa samting. 25Nao hemi naenklok long moning taem olketa nilam Jisas long kros. 26An olketa raetem wanfala notis fo somaot wanem olketa sei hemi duim rong. Olketa raetem olsem, “King blong olketa Jiu.” 27An tufala man fo mekem trabol, olketa nilam tu long tufala kros moa. Wanfala hemi stap long raetsaet blong Jisas an nara man long lefsaet blong hem.#Aesaea 53:12. #15:27 Samfala olfala kopi long Mak olketa adem moa ves 28, “Olketa samting ya hemi mekem Buktambu kamtru nao wea hemi sei, ‘Olketa pipol i talem dat hemi wanfala man fo mekem trabol nomoa ya.’” Lukim Luk 22:37.
29An#Sams 22:7; 109:25; Mak 14:58; Jon 2:19. olketa pipol hu i gopas long rod, olketa se-sekem hed blong olketa an olketa mekfan long hem, an olketa tok olsem, “!Hem nao ya! Yu nao sei yu save brekemdaon Tambuhaos blong God an wakembaek moa insaet trifala de nomoa. 30!Oraet, yu kamdaon nao from kros ya, mekem yu sevem yu seleva!”
31An olketa hedprist an olketa tisa blong Lo, olketa mekfan long Jisas tu, olsem olketa pipol ya. Olketa sei long olketa seleva olsem, “Maewat, nara pipol nomoa hemi save sevem olketa, bat hemi no save sevem hem seleva. 32?Waswe, hem nao hemi disfala Kraes, King blong Israel? Sapos hemi kamdaon long kros ya distaem, oraet, bae yumi lukim an biliv long hem nao.”
An tufala man ya tu wea olketa nilam tufala wetem Jisas, tufala tokspoelem hem fogud.
Jisas hemi dae
(Matiu 27:45-56; Luk 23:44-49; Jon 19:28-30)
33Taem hemi kasem tuelklok long de nomoa, evri ples long kantri ya hemi tudak tumas nao. An diswan hemi go-gohed fo trifala aoa. 34Nao#Sams 22:1. long triklok long aftanun nomoa, Jisas hemi singaot bikfala olsem, “!Eloi! !Eloi! ?Lama sabaktani?”#15:34 “!Eloi! !Eloi! ?Lama sabaktani?” Diswan hemi langguis long Arameik wea olketa Jiu save yusim long taem ya. wea hemi minim “!God blong mi! !God blong mi! ?Waswe nao yu lusim mi finis?”
35An samfala pipol wea olketa stanap long ples ya olketa herem toktok ya an olketa sei nao, “Ei, ating man ya hemi singaotem profet Elaeja ya.” 36Nao#Sams 69:21. wanfala man hemi resis go fo tekem kam wanfala samting wea hemi save holem wata,#15:36 “wanfala samting wea hemi save holem wata” Diswan hemi sof tumas an hemi save grou insaet long solwata. an hemi mekem tuwet long waen wea hemi saoa. Bihaen, hemi putum go long longfala stik, an hemi givim goap long Jisas fo dringim an hemi sei, “!Weit! Yumi lukluk fastaem. Maet Elaeja bae hemi kam fo tekem hem aot from kros ya.”
37Nao Jisas hemi singaot bikfala nomoa an hemi dae nao.
38Long#Eksodas 26:31-33. semtaem nomoa, disfala bikfala kaleko wea hemi hangdaon insaet long Tambuhaos ya, hemi brek long midol long hem nao, stat kam long antap go-go kasem long botom. 39An taem ya, wanfala bikman blong olketa soldia hemi stanap long frant blong kros ya. Taem hemi lukim hao nao Jisas hemi dae#15:39 “hao nao Jisas hemi dae” Samfala olfala kopi long Mak olketa sei,“hao Jisas hemi singaot bikfala an dae”. olsem, hemi sei nao, “!Disfala man ya hemi barava San Blong God tru ya!”
40An#Luk 8:2-3. samfala woman tu olketa stanap farawe lelebet an lukluk go nomoa. Samfala long olketa nao, Meri blong Magdala, an Salome, an Meri hu hemi mami blong yangfala Jemes an Joses. 41Trifala woman ya, olketa bin go wetem Jisas, an olketa bin helpem hem tumas taem hemi goraon long provins long Galili. An plande woman moa wea olketa bin kam long Jerusalem wetem hem, olketa stap tu long ples ya.
Josef blong Arimetia berem Jisas
(Matiu 27:57-61; Luk 23:50-56; Jon 19:38-42)
42Nao hemi kolsap fo tudak an hemi de wea olketa save mekredi long evrisamting ya, from neks de hemi Sabat de. 43Taem ya, Josef blong Arimetia hemi kam. Hem nao hemi wanfala memba long Kansol an olketa pipol tinghae long hem tumas. An hem tu wanfala man hu hemi stap weit fo lukim kingdom blong God. So taem ya, Josef hemi lusim fraet nomoa an hemi go long Paelat, an hemi askem hem fo tekem nao bodi blong Jisas. 44Paelat hemi sapraes tumas taem hemi herem dat Jisas hemi dae kuiktaem olsem. So hemi kolem bikman blong olketa soldia an hemi askem hem olsem, “?Waswe, hemi tru wea Jisas hemi dae finis?” 45Nao taem Paelat hemi herem wanem bikman hemi talem nomoa, hemi letem nao Josef fo tekem bodi blong Jisas. 46So Josef hemi go nomoa an peim nao gudfala waet kaleko, an hemi aotem bodi ya long kros an paselem long kaleko nao. An hemi putum bodi ya insaet long wanfala kev wea olketa bin wakem insaet long bikfala ston. Bihaen, hemi rolem kam wanfala ston fo satem kev ya nao. 47An long taem ya, Meri blong Magdala an Meri mami blong Joses nao tufala lukim ples wea olketa putum bodi blong Jisas long hem.
Currently Selected:
Mak 15: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.