1 Korin 16
16
Koleksin fo olketa long Jerusalem
1Nao#Rom 15:25-26. mi wande fo talem yufala abaotem disfala koleksin fo helpem olketa pipol blong God long provins long Jiudia. Yufala mas duim wanem mi talem finis long olketa sios long provins long Galesia. 2Long evri Sande, evriwan long yufala i mas tekem samfala seleni falom haomas nao hemi bin kasem long taem ya. An yufala mas putum diswan fo stap nomoa. Nogud yufala trae fo kolektem nomoa taem mi kam kasem yufala bihaen. 3Nao taem mi kam kasem yufala, bae yufala mas siusim samfala man fo tekem koleksin blong yufala go long Jerusalem ya. An bae mi nao mi givim wanfala leta long olketa an mi sendem olketa go. 4Sapos hemi luk olsem hemi gud fo mi tu mas go, bae olketa save go wetem mi nomoa.
Samfala plan blong Pol
5Mi#Aposol 19:21. bae mi kam kasem yufala bihaen mi bin stap long provins long Masedonia. Bikos bae mi mas go long Masedonia ya. 6Ating bae mi stap lelebet longtaem wetem yufala, maet mi stap kasem en long taem blong raf si.#16:6 “taem blong raf si” Long langguis long Grik hemi sei,“taem blong kol”. An bae yufala nao save helpem mi fo gohed moa long gogo blong mi, long watkaen ples nao mi bae go long hem. 7Mi no wande fo jes stap wetem yufala sotfala taem nomoa. Mi tingting strong fo kam stap lelebet longtaem wetem yufala ya, sapos Masta hemi letem.
8Mi#Levitikas 23:15-21; Diutronomi 16:9-11. bae mi stap fastaem long hia long Efesas go-go kasem Bikde blong Pentekos. 9Bikos distaem hemi gudfala taem long hia, mekem mi save duim plande gudfala waka tumas, nomata plande pipol tu olketa agensim mi.
10Sapos#1 Korin 4:17. Timoti hemi kasem yufala, yufala mas lukaotem hem gudfala bikos hem tu hemi waka fo Masta olsem mi ya. 11No eniwan long yufala i mas lukdaonem hem, bat yufala mas helpem hem fo gohed gudfala long gogo blong hem, mekem hemi kambaek long mi. Bikos mi weitem hem fo kam wetem olketa nara Kristin fren ya.
12Nao Kristin fren blong yumi Apolos, mi talem hem plande taem fo go wetem olketa nara brata an visitim yufala ya. Long distaem hemi no tingting yet fo go,#16:12 “Long distaem hemi no tingting yet fo go” Nara wei fo talem moa,“Long distaem, God hemi no laekem hem fo go”. bat sapos hemi garem taem bihaen, bae hemi go.
Las toktok blong Pol
13Yufala mas lukaot gudfala, an yufala mas strong long biliv blong yufala. Yufala mas no fraet, an yufala mas stap strong. 14Evrisamting yufala duim, hemi mas kamaot long lav blong yufala.
15Nao#1 Korin 1:16. yufala save long Stefanas an famili blong hem. Olketa nao fas pipol long provins long Akaea fo kamap Kristin, an olketa waka olowe fo helpem olketa pipol blong God. Olketa fren, mi askem strong long yufala nao, 16yufala mas obeim olketa lida olsem olketa. An yufala mas obeim tu olketa hu i helpem olketa lida an duim eni hadwaka olsem.
17Mi hapi tumas bikos Stefanas an Fotiunetas an Akaekas olketa bin kam kasem mi. Yufala evriwan i no save kam, bat trifala ya nao i tekem ples blong yufala. 18An olketa bin mekem mi hapi nao olsem olketa bin mekem yufala hapi bifoa. Yufala mas tinghae long olketa pipol olsem.
19Olketa#Aposol 18:2. sios long provins long Esia olketa sei halo go long yufala. Akuila wetem Prisila an olketa Kristin wea olketa save hipap oltaem long haos blong tufala, olketa sei halo go long yufala long nem blong Masta. 20An evri Kristin long hia olketa sei halo go long yufala.
Nao taem yufala talem halo long yufala evriwan, hemi gud fo yufala kisim yufala long wei blong olketa tru fren.
21Mi Pol nao mi raetem disfala halo long yufala long han blong mi seleva.#16:21 Pol hemi save sidaon an talemaot olketa toktok blong hem, an nara man nao hemi raetem long pepa. Diswan hemi falom gudfala kastom blong olketa long taem ya. Bat disfala toktok long ves 21, Pol seleva hemi raetem fo somaot dat hemi barava tru leta blong hem.
22Eniwan hu hemi no save lavem Masta, panis blong God bae i kasem hem.
!Masta blong mifala, yu kam!#16:22 “!Masta blong mifala, yu kam!” Long langguis long Grik hemi sei,“!Marana ta!”
23Letem kaenfala lav blong Jisas Masta blong yumi hemi stap wetem yufala.
24Mi lavem tumas yufala evriwan hu i blong Jisas Kraes.
Currently Selected:
1 Korin 16: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.