Revelesin 2
2
Leta fo sios long Efesas
1Disfala man hemi tok olsem moa, “Nao yu mas raet go long enjel blong sios long Efesas,#2:1 “Efesas” Taon ya hemi biktaon long eria long saet blong gavman blong Rom an long saet blong bisnis. Taem Pol hemi statem olketa sios long eria ya, Efesas hemi kamap bik ples blong sios tu. Lukim Aposol sapta 19. Yumi save dat Jon disfala disaepol blong Jisas, hemi stap waka long taon ya taem hemi olo. an yu mas sei olsem, ‘Hem nao toktok blong mi wea mi holem sevenfala sta long raet han blong mi, an wakabaot long midol long sevenfala bikfala gol lam. 2Mi save abaotem yufala finis, yufala barava wakahad tumas an yufala gohed nomoa fo stap strong. Mi save dat yufala nating laekem olketa pipol hu i falom ravis wei. An mi save dat yufala traem finis olketa hu i laea an talem dat olketa i aposol, an yufala faendemaot dat olketa barava laea nomoa. 3Mi save tu dat yufala barava stanap strong, an yufala no givap nomata olketa pipol mekem yufala safa.
4‘Bat wanfala samting nao mi no laekem long yufala. Disfala gudfala wei blong yufala bifoa wea yufala lavem mi tumas, yufala lusim nao. 5Yufala mas tingimbaek gudfala wei wea yufala bin stap long hem fastaem. Nao yufala mas lusim olketa ravis wei blong yufala, an yufala mas gohed moa fo duim wanem yufala bin duim kam fastaem. Bat sapos yufala no lusim olketa ravis wei blong yufala, bae mi kam an tekemaot disfala bikfala lam blong yufala. 6Bat wanfala samting yufala duim gud nao hemi olsem. Yufala barava les long wei blong olketa pipol hu i falom tising blong Nikolas,#2:6 “tising blong Nikolas” Yumi no save klia watkaen tising nao blong olketa bat long Revelesin 2:14 Jon hemi talemaot lelebet moa. olsem mi tu mi barava les long wei blong olketa.
7‘Eniwan#Jenesis 2:9; Revelesin 22:2; Esikiel 28:13; 31:8. hu hemi garem ia, hemi mas heremgud nao olketa toktok wea Holi Spirit hemi talem long olketa sios ya. Olketa hu i winim faet, bae mi letem olketa fo kaikaim frut blong disfala tri blong laef wea hemi grou long gaden blong God.’ ”
Leta fo sios long Smana
8Disfala#Aesaea 44:6; 48:12; Revelesin 1:17; 22:13. man hemi tok olsem moa, “An yu mas raet go long enjel blong sios long Smana,#2:8 “Smana” Hemi wanfala ris taon wea plande Jiu nao olketa stap long hem. Plande olfala stori olketa tokabaotem hadtaem blong olketa Kristin long disfala taon. an yu mas sei olsem, ‘Hem nao toktok blong mi wea mi nao faswan bifoa evrisamting, an mi laswan tu bihaen evrisamting. Long bifoa, mi dae finis, bat distaem, mi laefbaek moa. 9Mi save finis long olketa trabol blong yufala an dat yufala pua tumas. !Bat yufala ris tumas tu! An mi save tu long olketa ravis toktok blong olketa pipol wea olketa gohed fo toknogud long yufala. Olketa sei olketa nao Jiu, bat wea, olketa barava laea nomoa. Olketa nao barava seksin wea olketa mekhae long Seitan.#2:9 Olketa Jiu long Smana olketa barava faetem olketa Kristin. Lukim Rom 2:28-29. 10Yufala mas no fraet long enisamting wea bae hemi kam fo mekem yufala safa. Yufala save, Seitan bae hemi putum samfala long seksin blong yufala insaet long prisin fo traem yufala. An olketa trabol blong yufala bae hemi gohed fo tenfala de.#2:10 “tenfala de” Maet hemi minim wea trabol bae hemi gohed fo sot taem nomoa. Bat yufala mas biliv strong long mi nomoa, nomata yufala dae long hem. An sapos yufala duim diswan, bae mi givim yufala niufala laef wea hemi olsem nambawan praes olketa givim long man hu hemi win long resis.
11‘Eniwan#Revelesin 20:14; 21:8. hu hemi garem ia, hemi mas heremgud nao olketa toktok wea Holi Spirit hemi talem long olketa sios ya. Olketa hu i winim faet, bae disfala mektu dae#2:11 “mektu dae” Hemi minim bikfala hol blong faea wea Seitan tu bae hemi prisin long hem. Lukim Revelesin 20:14. hemi no save kasem olketa.’ ”
Leta fo sios long Pegamam
12Disfala man hemi tok olsem moa, “An yu mas raet go long enjel blong sios long Pegamam,#2:12 “Pegamam” Bikman blong gavman blong Rom wea hemi rul ovarem disfala provins long Esia hemi stap long taon ya. Olketa bildim plande naesfala haos fo wosipim olketa laea god long olketa an olketa save wosipim tu bikfala King long Rom, olsem hem nao god blong olketa. an yu sei olsem, ‘Hem nao toktok blong mi wea mi garem naef fo faet wea hemi sap tumas long tufala saet evriwan. 13Mi save finis dat yufala stap long ples wea Seitan hemi rul ovarem, bat yufala nao i stanap long saet blong mi. Olketa long taon blong yufala wea Seitan hemi stap long hem, olketa bin kilim dae Antipas hu hemi save talemaot stret toktok blong mi. Bat nomata hem olsem long taem ya, yufala nating lusim biliv blong yufala long mi.
14‘Bat#Nambas 22:5, 7; 31:16; Diutronomi 23:4; Nambas 25:1-3. samfala samting nomoa mi no laekem long yufala. Samfala pipol long yufala, olketa gohed fo falom nomoa tising blong profet Balam, wea bifoa hemi tisim King Balak abaotem wei fo trikim pipol blong Israel fo foldaon long sin. Hemi mekem olketa kaikaim mit wea olketa bin sakrifaesim finis long laea god, an hemi mekem olketa fo durong wetem olketa woman. 15An samfala long yufala hu i gohed fo falom tising blong seksin blong Nikolas, i duim semkaen samting tu. 16So yufala mas lusim olketa ravis wei olsem. An sapos yufala no duim diswan, no longtaem nomoa, bae mi kam long yufala an bae mi faetem olketa pipol ya wetem naef fo faet wea hemi kamaot long maos blong mi.
17‘Eniwan#Eksodas 16:14-15; 16:33-34; Jon 6:48-50; Aesaea 62:2; 65:15. hu hemi garem ia, hemi mas heremgud olketa toktok wea Holi Spirit hemi talem long olketa sios. Eniwan wea hemi winim faet, bae mi givim hem mana fo kaikaim.#2:17 “mana fo kaikaim” Olketa Jiu i tingse taem hemi kasem kolsap long Lasde, bae olketa faendem disfala boks wetem mana insaet long hem, wea profet Jeremaea nao hemi bin haedem. Mana ya hemi minim evri gud samting wea God hemi promis fo givim kam long olketa pipol blong hem. Hemi disfala mana blong bifoa, wea hemi staphaed. An bae mi givim hem tu wanfala waet ston#2:17 “waet ston” Maet ston hemi minim wea man ya hemi garem paoa fo go insaet long kingdom blong God. An disfala niu nem long ston ya, maet hemi nem blong God o maet hemi niu nem blong man seleva wea hemi somaot niufala wei blong hem, olsem niufala nem blong Ebram an Jekob. Lukim Revelesin 3:12. wea wanfala niu nem hemi stap long hem. Niu nem ya, no eni man nao hemi save long hem, bat man hemi garem ston ya nomoa hemi save long nem ya.’”
Leta fo sios long Taeataera
18Disfala man hemi tok olsem moa, “An yu mas raet go long enjel blong sios long Taeataera,#2:18 “Taeataera” Wanfala smol taon wetem plande bisnis wea olketa save wakem kaleko, an olketa save mekem enikaen aean long hem. an yu sei olsem, ‘Hem nao toktok blong mi San Blong God, wea ae blong mi hemi olsem faea wea hemi laet, an lek blong mi hemi olsem bras wea hemi saen fogud. 19Mi save abaotem yufala finis, dat yufala lavem tumas olketa pipol an yufala biliv long mi. An mi save tu dat yufala gohed fo helpem yufala evriwan, an gohed nomoa fo stanap strong. An olketa gudfala waka yufala duim distaem hemi barava winim olketa waka wea yufala bin duim kam fastaem.
20‘Bat#1 Kings 16:31; 2 Kings 9:22, 30. wanfala samting nomoa mi no laekem long yufala. Yufala bin letem woman ya Jesebel fo stap long yufala yet. Hemi laea an sei hem nao wanfala profet blong God. Hemi pulum olketa pipol blong mi fo falom rong tising blong hem, mekem olketa durong wetem eniwan an mekem olketa kaikaim mit wea olketa bin sakrifaesim long laea god. 21Mi givim taem long hem finis fo sensim tingting blong hem, bat hemi no wande lusim disfala ravis wei blong hem fo durong wetem eniwan. 22So bae mi mekem hem fo sik bikfala. An olketa hu i durong wetem hem, sapos olketa no lusim ravis wei wea olketa save falom, bae mi mekem olketa fo safa bikfala tumas. 23An#Sams 7:9; Jeremaea 17:10; Sams 62:12. olketa disaepol blong woman ya tu bae mi kilim olketa dae. Long taem ya, bae olketa sios save lukim dat mi luksave long olketa tingting blong evri pipol. An bae mi sensimbaek long wan-wan long yufala falom wanem hemi duim.
24‘Bat evriwan long yufala long Taeataera wea yufala no falom ravis tising ya, an wea yufala no lanem olketa wei olketa kolem “Dip tokhaed blong Seitan”,#2:24 “Dip tokhaed blong Seitan” Plande nogud tising nao hemi goraon long ples ya, wea olketa talem olketa savegud tumas winim wanem Jisas Kraes hemi talem fastaem. Lukim Jiud 4-11. mi laek fo talem samting long yufala. Mi no givim eni had samting moa long yufala fo falom. 25Yufala mas holemstrong olketa gudfala wei wea yufala garem finis, go-go kasem taem mi kambaek. 26Olketa#Sams 2:8-9. pipol wea olketa save winim faet an olketa gohed fo duim waka blong mi go-go kasem en blong disfala wol, bae mi givim paoa long olketa fo rul ovarem olketa kantri long wol. 27An bae olketa strik tumas taem olketa rulim olketa kantri ya,#2:27 “An bae olketa strik tumas taem olketa rulim olketa kantri ya” Long langguis long Grik hemi sei, “An bae olketa rulim olketa kantri ya wetem wanfala stik long aean”. an bae olketa brekemdaon paoa blong olketa, olsem yumi save brekem olketa kap nomoa. 28Bikos paoa wea bae mi givim olketa ya, hemi wankaen wetem paoa wea Dadi blong mi hemi givim long mi, an bae mi givim disfala sta blong eli moning#2:28 “sta blong eli moning” Disfala sta ya, long Ingglis yumi save kolem hem “Venus”. Hemi saen blong bikfala paoa. Long Revelesin 22:16 hemi sei Kraes nao hemi disfala sta. long olketa tu.
29‘Eniwan hu hemi garem ia, hemi mas heremgud olketa toktok wea Holi Spirit hemi talem long olketa sios.’ ”
Currently Selected:
Revelesin 2: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.