Filipae 2
2
Falom wei blong Kraes
1Tingting blong yufala hemi kamap strong moa bikos yufala joen wetem Kraes an hemi lavem yufala. Yufala stapgud tugeta wetem Holi Spirit,#2:1 “Yufala stapgud tugeta wetem Holi Spirit” Nara wei fo talem moa,“Holi Spirit hemi mekem yufala stapgud tugeta”. an yufala kaen an filsore long olketa pipol. 2So mi askem yufala fo falom diskaen wei wea hemi save mekem mi hapi go moa. Yufala evriwan mas stap wanmaen nomoa an yufala mas lavem yufala evriwan, an laef an tingting blong yufala hemi mas wankaen nomoa. 3Yufala mas no tingim yufala seleva nomoa an no trae fo haemapem yufala seleva. Bat yufala mas hambol an tingim olketa nara pipol olsem olketa nao gudfala winim yufala. 4An yufala mas no tingting long wanem hemi gud fo yufala seleva nomoa, bat yufala mas tingting long wanem nao hemi gud fo nara pipol. 5Tingting an wei blong yufala hemi mas wankaen olsem tingting an wei blong Kraes.
6Kraes hemi barava God,
bat hemi no holetaet long disfala wei#2:6 “bat hemi no holetaet tumas long disfala wei” Nara wei fo talem moa,“bat hemi no trae fo kasem moa disfala wei”. wea hemi wankaen wetem God.
7So Kraes hemi lusim go evrisamting blong disfala biknem blong hem,
an hemi kamap olsem wakaman nomoa.
Hemi bon kam olsem man,
8an hemi barava olsem wanfala man blong wol nomoa.
Hemi hambol tumas an hemi obeim God olowe,
go-go hemi dae taem olketa nilam hem long wanfala kros.
9From diswan nao, God hemi liftimapem hem fo stap long nambawan ples long heven,
an God hemi givim hem wanfala biknem wea hemi bikfala winim evriwan.
10Dastawe#Aesaea 45:23. nao evriwan long heven wetem evriwan long disfala wol an evriwan moa long ples blong olketa man dae,#2:10 “long ples blong olketa man dae” Long langguis long Grik hemi sei,“long andanit long disfala wol”.
bae evriwan ya nildaon fo mekhae long Jisas.
11An bae evriwan talemaot dat Jisas Kraes nao hemi Masta long evrisamting.
An long diswan bae evriwan liftimapem nem blong God Dadi blong yumi.
Laef blong yufala mas saen olsem sta
12Olketa fren blong mi, yufala bin obeim mi olowe taem mi stap wetem yufala. So yufala mas gohed fo duim diswan tu nomata mi no stap wetem yufala. God hemi sevem yufala, so yufala mas tinghevi an tinghae long hem an gohed nomoa fo wakahad fo kasem wanem hemi makem fo yufala. 13Yufala save, God nao hemi gohed fo waka insaet long yufala, mekem yufala save siusim an duim wanem hemi falom plan blong hem.
14Taem yufala gohed fo duim olketa samting, yufala mas no komplen o raoa abaotem. 15Long#Diutronomi 32:5. diskaen wei nao bae yufala save klin long ae blong God an yufala no save garem enisamting rong long yufala. Long wei ya tu bae yufala i olketa pikinini blong God wea olketa gudfala tumas, nomata yufala stap wetem olketa pipol wea wei blong olketa hemi nating stret an olketa duim olketa ravis samting. Ya, bae yufala saen go gudfala long olketa, olsem olketa sta i saen long skae, 16bikos yufala gohed fo talemaot disfala toktok blong laef long olketa. Sapos yufala duim olsem, bae mi save filpraod long yufala long datfala De blong Kraes. Bikos bae hemi somaot long de ya, dat mi no bin wakahad nating.
17Biliv blong yufala hemi olsem wanfala sakrifaes wea yumi ofarem go long God. Nao sapos olketa kilim mi dae, an blad blong mi hemi kapsaet olsem waen blong ofaring#2:17 “waen blong ofaring” Lukim Nambas 15:3-10 fo save abaotem kaen ofaring. wea hemi joen tugeta wetem biliv blong yufala, bae mi hapi nomoa tugeta wetem yufala evriwan long diswan. 18So yufala tu mas hapi tugeta wetem mi.
Pol laek fo sendem go tufala man
19Sapos hemi gud long tingting blong Jisas Masta blong yumi, bae no longtaem, mi sendem go Timoti fo visitim yufala, mekem mi save filgud moa long taem mi herem samfala gudfala nius abaotem yufala. 20No eni nara man hemi olsem Timoti wea hemi barava laekem tumas fo save, sapos evrisamting hemi gohed gud long laef blong yufala. 21Olketa narawan tingim olketa seleva nomoa, an no save lukaftarem olketa samting wea Jisas Kraes hemi laekem. 22Bat yufala luksave finis dat Timoti hemi no olsem olketa kaen pipol ya. Hemi bin helpem mi gudfala long disfala waka blong Gudnius, olsem wanfala pikinini hemi save helpem dadi blong hem. 23Mi plan fo sendem hem go long yufala, taem mi savegud long wanem bae hemi hapen long mi. 24Mi trastem Masta, dat no longtaem nomoa, bae mi kam lukim yufala.
25Mi mas sendem brata blong yumi Epafrodaetas gobaek long yufala. Yufala sendem hem kam bifoa fo helpem mi, an hemi waka wetem mi an barava stap tugeta wetem mi long disfala faet. 26Bat hemi laekem tumas fo lukim yufala moa, an hemi filnogud from yufala herem dat hemi bin sik tumas. 27Hemi tru, hemi bin sik bikfala tumas an kolsap dae long hem. Bat God nao hemi sore an kaen long hem. An God hemi sore an kaen long mi tu, fo hemi stopem enikaen bikfala sore fo kasem mi. 28So mi laekem tumas fo sendem hem gobaek long yufala nao, mekem yufala save hapi taem yufala lukim hem moa, an mekem mi no wari tumas moa abaotem hem. 29Bae yufala mas welkamem hem moa long nem blong Masta. An yufala mas tinghae long olketa pipol olsem hem, 30bikos hemi kolsap dae taem hemi waka fo Kraes. Hemi nating wari sapos hemi lusim laef blong hem, taem hemi helpem mi long wei wea hemi had long yufala fo helpem mi long hem.
Currently Selected:
Filipae 2: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.