Filimon 1
1
1Mi Pol, wea mi stap long prisin bikos mi waka fo Jisas Kraes. Mi, wetem Kristin fren blong yumi Timoti, mitufala raet go long yu Filimon, gudfala fren blong mitufala wea yumi waka tugeta fo God. 2An#Kolosi 4:17. mitufala raetem tu disfala leta go long olketa Kristin wea olketa save kam oltaem fo prea long haos blong yu,#2 “olketa save kam oltaem fo prea long haos blong yu” Long datfala taem, olketa Kristin no garem eni bikfala sios fo prea long hem an olketa save hipap long olketa haos blong olketa seleva nomoa. wetem Apia Kristin fren#2 “Kristin fren” Long langguis long Grik hemi sei, “sista”. blong mitufala, an Akipas hu hemi wakahad fo duim gudfala waka olsem mitufala.#2 “Akipas hu hemi wakahad fo duim gudfala waka olsem mitufala.” Long langguis long Grik hemi sei,“Akipas hu hemi soldia olsem mitufala”. 3Letem kaenfala lav an piis blong God Dadi blong yumi an blong Jisas Kraes Masta blong yumi, bae hemi stap wetem yufala.
Olketa gudfala toktok fo Filimon
4Evritaem mi prea, mi save tingabaotem yu Filimon, an mi save talem tengkiu long God blong yumi. 5Bikos mi herem oltaem wea yu lavem tumas olketa pipol blong God an wea yu biliv strong long Jisas Masta blong yumi. 6Yumi stapgud tugeta bikos yumi biliv long God,#6 “Yumi stapgud tugeta bikos yumi biliv long God” Nara wei fo talem moa,“Yu save talemaot biliv blong yu long olketa ya”. an mi prea wea diswan bae hemi mekem yu fo savegud moa abaotem olketa gudfala samting wea God hemi save givim long yumi bikos yumi joen wetem Kraes.#6 “wea God hemi save …” Nara wei fo talem moa,“wea yumi save duim fo Kraes”. 7Gudfala fren, yu mekem mi filhapi tumas an yu strongim tingting blong mi bikos wei blong yu fo lavem olketa pipol blong God hemi mekem tingting blong olketa fo kamap strong moa.
Filimon mas fogivim Onesimas
8Nao bikos yumitufala evriwan biliv long Kraes, mi save tokstrong long yu abaotem wanem hemi gud fo yu mas duim. 9Bat bikos mi barava lavem yu tumas, mi laek fo tok isi nomoa. Mi Pol mi man fo talemaot toktok blong Jisas Kraes, an distaem nao mi stap long prisin bikos mi biliv long hem.#9 “Mi Pol mi man fo talemaot …” Nara wei fo talem moa,“Mi Pol mi oloman finis, an distaem nao mi stap long prisin tu bikos mi biliv long Jisas Kraes.” 10Mi#Kolosi 4:9. askem yu fo yu mas barava kaen long Onesimas. Taem mi stap long prisin nomoa, mi tisim hem fo biliv long Kraes so hemi olsem pikinini blong mi nao. 11Bifoa, hemi no save helpem yu, bat long distaem hemi save helpem yumitufala evriwan.#11 “hemi save helpem yumitufala evriwan” Long langguis long Grik disfala nem “Onesimas” hemi minim, “man hu hemi save helpem evriwan”.
12Mi sendem hem gobaek long yu moa, nomata mi lavem hem tumas. 13Hemi tru, mi barava laekem hem fo stapbaek wetem mi, mekem hemi save tekem ples blong yu, an helpem mi long disfala taem wea mi stap long prisin bikos mi talemaot Gudnius. 14Bat mi no laek fo duim diswan sapos yu no hapi long hem. Mi laekem yu fo falom tingting blong yu seleva nomoa sapos yu duim gudfala samting olsem. Nogud mi fosim yu fo duim diswan.
15Ating Onesimas hemi lusim yu lelebet taem olsem, bikos long wei ya nao hemi save kambaek fo stap wetem yu olowe. 16An long distaem hemi no jes wanfala slev, bat hemi bikfala samting moa winim slev. Hemi wanfala gudfala Kristin fren blong yumi. Mi barava laekem hem tumas, bat ating bae yu nao laekem hem winim mi moa, bikos hemi gudfala slev blong yu an hemi Kristin fren blong yu tu.
17Sapos yu barava tingim mi olsem gudfala fren blong yu, yu mas lukaftarem hem gudfala olsem yu save lukaftarem mi gudfala, taem mi kasem haos blong yu. 18An enisamting wea hemi bin duim nogud long yu an enisamting wea hemi bin kaonem long yu, yu mas letem mi nao fo sensim olketa samting ya. 19Mi Pol, mi raetem disfala toktok long han blong mi seleva.#19 “Mi Pol, mi raetem disfala toktok long han blong mi seleva” Pol hemi save sidaon an talemaot olketa toktok blong hem, an nara man nao hemi raetem long pepa. Diswan hemi falom gudfala kastom blong olketa long taem ya. Bat disfala toktok long ves 19, Pol seleva hemi raetem fo somaot dat hemi barava tru leta blong hem. Bae mi nao mi sensim evri kaon blong Onesimas. Bat yu mas no fogetem wea yu garem kaon long mi tu. Mi minim disfala niufala laef wea yu kasem ya. 20Gudfala fren blong mi, mi askem yu long nem blong Masta, plis yu helpem mi. Yumitufala stap joen wetem Kraes, so hemi gud fo yu mekem tingting blong mi fo kamap strong moa.
21Mi raetem olketa toktok ya go long yu, bikos mi save dat bae yu duim wanem mi askem. An mi save tu dat bae yu duim gudfala samting moa winim olketa toktok blong mi. 22Narasamting moa, mi save dat yufala gohed fo prea long God fo mi save kambaek moa long yufala, an mi biliv bae God hemi herem olketa prea blong yufala. So, mi laekem yu fo mekredi long wanfala rum fo mi stap long hem.
Las toktok blong Pol
23Epafras#Kolosi 1:7; 4:12. hu hemi stap long prisin wetem mi bikos hemi waka fo Jisas Kraes, hemi talem halo go long yu. 24Mak,#Aposol 12:12, 25; 13:13; 15:37-39; 19:29; 27:2; Kolosi 4:10, 14; 2 Timoti 4:10, 11. an Aristakas, an Dimas, an Luk, hu olketa waka tugeta wetem mi, olketa talem halo go long yu.
25Letem kaenfala lav blong Jisas Kraes Masta blong yumi, hemi stap wetem yufala.
Currently Selected:
Filimon 1: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.