Neiham 3
3
!Sore tumas long Nineve!
1 (Profet) !Sore tumas long yufala, olketa pipol blong Nineve! Nem long taon blong yufala nao hemi “Taon blong Blad”, bikos oltaem yufala kilim pipol dae. Yufala pipol fo laea, an evri ples blong yufala hemi fulap long olketa gudfala samting wea yufala bin tekem from olketa narafala pipol long faet. Oltaem yufala gohed fo spoelem olketa narafala pipol. 2!Bat yufala lisin kam! Yufala herem noes blong olketa wip, an noes blong olketa kaat fo faet, an noes blong olketa hos wea i gohed fo resis kam. 3Olketa soldia hu i raedem hos i resis kam fo kilim yufala dae. Olketa naef fo faet an spia i saen fogud olsem laetning taem olketa suingim fo kilim yufala dae. Bodi blong olketa man dae hemi plande tumas, an no eniwan save kaontem nao. Olketa bodi ya hemi stap olobaot nomoa, mekem olketa soldia i kolsap foldaon long olketa. 4Olketa samting ya hemi hapen bikos yufala olsem juri woman, wea hemi barava luknaes tumas, bat hemi save tumas long majik wei fo trikim pipol. Long wei ya nao yufala bin gohed fo mekem olketa pipol blong olketa narafala kantri fo falom ravis wei blong yufala, an yufala gohed fo mekem olketa kamap slev blong yufala. Dastawe nao Yawe hemi panisim yufala.#Revelesin 17:1-18.
5Hem ya nao mesij blong Yawe hu hemi garem evri paoa. Hemi tok olsem long olketa pipol blong Nineve, “!Yufala lisin kam! Mi nao mi agensim yufala. Bae mi tekemaot evrisamting wea yufala garem, mekem yufala filsem, olsem wea yufala tekemaot evri kaleko blong juri woman fo meksem long hem. Bae mi letem evri pipol long wol fo lukluk long yufala, mekem yufala barava sem. 6Mi nao bae mi meksem long yufala, olsem wea mi torowem ravis antap long yufala. Bae mi lukdaonem yufala, mekem evri pipol i luksave wea yufala barava nogud tumas. 7Evriwan hu i lukim yufala, bae i seke fogud an ranawe. Bae olketa tok olsem, ‘!Nineve hemi kamap barava nogud nao! ?Hu nao bae hemi krae fo hem?’ !No eniwan nao hemi filsore long hem!”
8 (Profet) !Olketa blong Nineve! ?Waswe, yufala tingse paoa blong yufala hemi strong moa winim taon long Tebes, wea hemi kapitol blong Ijip bifoa? Nael Riva nao hemi bin go raonem bikfala taon ya, an gadem gudfala olsem bikfala wolston, mekem olketa enemi no save spoelem. 9Olketa long taon ya i rul ovarem Kus an Ijip, an paoa blong olketa hemi barava strong tumas. Tufala kantri long Put an Libia i fren blong olketa. 10Bat nomata taon long Tebes hemi garem bikfala paoa olsem, olketa enemi blong hem i kam fo tekemaot olketa pipol blong hem fo kamap slev long narafala kantri. Olketa torowem olketa pikinini fo dae long evri kona blong taon ya. An olketa kasholem evri bikman an taengem olketa long sen. Olketa tekem olketa go, an divaedem olketa fo kamap slev.#Jeremaea 46:25; Esikiel 30:14-16.
11!Olketa blong Nineve! Bae olketa enemi i duim semsamting nao long yufala. Bae yufala tu i kamap olsem wanfala drang man, an bae yufala trae fo ranawe go long strongfala sefples. 12Bat evri sefples blong yufala, bae i no strong nao. Bae olketa ples ya i olsem nomoa tri wea olketa frut blong hem hemi raep fogud. An sapos eniwan hemi sekem tri ya wantaem nomoa, bae evri frut hemi foldaon fo hemi kaikaim. 13Yufala luk long olketa soldia blong yufala. !Olketa i wik olsem olketa woman nomoa! Hemi olsem wea faea hemi bonem evri bikfala stik wea hemi go akros long olketa geit fo lokem. An evri geit long olketa wolston blong yufala hemi open nomoa, mekem yufala kanduit stopem olketa enemi.
14Distaem, yufala mas redim olketa samting fo faet wea bae hemi gohed fo longtaem. Bae olketa enemi i raonem taon blong yufala, mekem yufala no save kamaot. Yufala mas tekem plande wata insaet fo dring. Yufala mas tekem red graon, an step long hem mekem hemi kamap sof fo wakem olketa brik. An yufala mas mekem olketa strongfala sefples blong yufala fo kamap strong moa. 15Bat nomata yufala duim olketa samting ya fo gadem yufala, bae olketa enemi i bonem yufala dae o kilim yufala dae long faet. Bae olketa kilim yufala evriwan dae, olsem wea olketa grashopa i spoelem finis wanfala gaden. Yufala bin kamap plande tumas olsem olketa grashopa. 16An olketa bisnisman blong yufala i kamap plande fogud winim olketa sta long skae. Bat long taem blong trabol, diskaen man olsem, hemi tekem evri gudfala samting blong hem an ranawe go, olsem wea evri grashopa i flae goawe bihaen taem olketa kaikaim evrisamting long wanfala ples. 17Olketa minista an narafala wakaman blong gavman tu i plande tumas. Olketa stap long ples blong olketa olsem wea olketa grashopa i haed insaet long olketa hol blong wolston long taem blong tukol. Bat taem olketa enemi i kam fo faet, olketa tu i ranawe, olsem olketa grashopa i flae goawe taem san hemi kamap antap. An no eniwan hemi save long ples wea olketa go long hem.
18!Bikfala King blong Asiria! Olketa bikman fo lukaftarem olketa pipol blong yu i dae evriwan nao. An olketa lida blong yu i slip nomoa an bae olketa no save wekap moa. Olketa pipol blong yu i go olobaot nomoa antap long olketa maonten olsem sipsip, an no eniwan save tekem olketa kambaek moa.#Jeremaea 23:1-4; Esikiel 34:1-10. 19Yu olsem wanfala man wea hemi garekil fogud, an no eni meresin save kiurim. Olketa soa blong yu bae hemi kilim yu dae. An evriwan hu hemi herem nius ya bae hemi hapi tumas, an bae hemi klapem han blong hem. Evri pipol nao i hapi tumas long dae blong yu, bikos yu bin gohed fo mekem evriwan safa tumas.
Currently Selected:
Neiham 3: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.