1 Samuel 3
3
Yawe hemi kolem Samuel
1Disfala boe Samuel hemi helpem Ilae fo duim waka blong Yawe. Long datfala taem, i no plande man nomoa wea Yawe hemi givim toktok blong hem long olketa, an hemi no somaot tumas spesol drim long olketa.
2An long taem ya tu, Ilae hemi olo, an ae blong hem hemi kamap nogud. Nao long wanfala naet, hemi slip long rum blong hem, 3an Samuel hemi slip long tambuhaos blong Yawe wea Tambu Boks blong Spesol Agrimen hemi stap. Long naet, taem wea i no brek delaet yet an Lam blong Tambu Rum hemi laet yet, 4Yawe hemi kolem Samuel. Nao Samuel hemi tok olsem, “!Ya!” 5An hemi ran go long Ilae an hemi tok olsem, “Yu kolem mi. Mi nao ya.”
Bat Ilae hemi tok olsem, “Mi no kolem yu. Yu gobaek an yu slip.” Nao hemi gobaek, an hemi slip.
6-7Den Yawe hemi kolem hem moa. Bat hemi no save olsem Yawe nao hemi kolem hem, bikos Yawe hemi no bin kolem hem enitaem. Hemi stanap, hemi go lukim Ilae moa, hemi tok olsem, “Yu kolem mi. Mi nao ya.”
Bat hemi tok olsem long hem, “Pikinini blong mi, mi no kolem yu. Yu gobaek an yu slip.”
8Yawe hemi kolem hem moa, long mektri taem. So hemi stanap, an hemi go lukim Ilae, an hemi tok olsem, “Yu kolem mi. Mi nao ya.”
Nao Ilae hemi jes luksave olsem Yawe nao hemi gohed fo kolem boe ya. 9So hemi tok olsem long hem, “Yu gobaek an yu slip. An sapos yu herem olsem hemi kolem yu moa, yu tok olsem, ‘Yawe, yu toktok kam. Mi wakaman blong yu, mi gohed fo herehere long yu.’” Den hemi gobaek an hemi slip.
10Bihaen, Yawe hemi kambaek moa an hemi stanap long ples ya, hemi kolem hem moa olsem fastaem wea hemi sei, “Samuel, Samuel.”
An Samuel hemi tok olsem, “Yu toktok kam. Mi wakaman blong yu, mi gohed fo herehere long yu.”
11Den Yawe hemi tok olsem long hem, “Bae hemi no longtaem nomoa, an mi mekem wanfala samting wea hemi nogud tumas long olketa pipol blong kantri ya. An taem olketa pipol i herem samting ya, bae olketa seke long hem. 12Long datfala taem, bae mi duim evrisamting wea mi bin talem agensim famili blong Ilae, an no enisamting bae mis. 13Mi talem long hem finis, olsem bae mi panisim hem wetem evriwan long famili blong hem. Disfala panis ya hemi no save finis enitaem bikos tufala san blong hem i spoelem nem blong mi. An hemi save nomoa olsem tufala gohed fo duim olketa ravis samting ya, bat hemi no stopem tufala. 14Dastawe mi bin tokstrong long Ilae wetem laen blong hem, olsem no eni sakrifaes o ofaring nao i save stopem panis wea hemi fitim sin blong olketa.”
15Samuel hemi stap nomoa long bed blong hem kasem delaet, nao hemi go openem olketa doa blong tambuhaos blong Yawe. Bat hemi fraet fo talemaot toktok ya long Ilae. 16Nao Ilae hemi kolem hem olsem, “!Samuel, pikinini blong mi!” An hemi tok olsem, “!Ya, mi nao ya!”
17Ilae hemi askem hem olsem, “?Yawe hemi talem wanem long yu? Yu no haedem enisamting long mi. Letem Yawe hemi panisim yu nogud, sapos yu no talemaot evrisamting ya long mi.” 18So Samuel hemi talemaot evrisamting ya, an hemi nating haedem enisamting. Den Ilae hemi tok olsem, “Hem nao Yawe. Bae hem save duim wanem hemi stret long hem.”
Yawe hemi stap wetem Samuel
19Taem Samuel hemi gohed fo kamap bikfala, oltaem Yawe hemi stap wetem hem. An hemi gohed fo mekem evrisamting wea Samuel hemi talemaot fo kamap tru. 20Olketa evriwan long laen blong Israel, stat long taon long Dan long not go kasem taon long Beereseba long saot, olketa save olsem hemi wanfala trufala profet blong Yawe. 21An oltaem, Yawe hemi save kam long Samuel long Saelo, an talemaot toktok blong hem.
Currently Selected:
1 Samuel 3: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.