YAKOBO 1
1
Hilaha Mukriste a fanelaka ku yingisela miringo hakona.
1Mina Yakobo, nandza wa Xikwembu ni wa Hosi Yesu Kriste;
Eka tinxaka leta khume na timbirhi leti hangalakeke, ndzi ri: Xewani!
2Vamakwerhu, ringanisani leswaku i ku tsaka ntsena loko mi humelela hi miringo leyo tala; 3mi ri karhi mi swi tiva leswaku ku ringiwa ka ku pfumela ka n'wina ku humesa ku tiyisela: 4kambe ku tiyisela ku fanele ku va ni ntirho lowu hetisekeke leswaku mi va lava hetisekeke ni lavanene ematlhelweni hinkwawo, mi nga kiyeri ha nchumu.
5Loko un'wana wa n'wina a pfumala vutlhari, a a kombele eka Xikwembu lexi nyikaka hinkwavo hi nsovo, xi nga holovi, kutani u ta nyikiwa. 6Ntsena a a kombele hi ku pfumela, a nga kanakani, hikuva la kanakanaka u fana ni magandlati ya lwandle lama biwaka hi moya, ma hoxiwa hinkwako. 7Munhu lowo tano a nga tshuki a tshemba leswaku a ta nyikiwa nchumu hi Hosi. 8Munhu la nga ni timbilu timbirhi u tsekatseka etindleleni ta yena hinkwato.
9Mupfumeri wa xisiwana a a tidzunise evukulwini bya yena, 10kambe la fuweke a a tidzunise evusiwaneni bya yena; hikuva u ta hundza kukota xiluva xa byanyi. 11Hikuva dyambu ri tsuvukile, ri ni mumu ri omisa byanyi, kutani xiluva xa byona xi wile, ku saseka ka nghohe ya xona ku lovile. Hi mukhuva wolowo, la fuweke, na yena, u ta vuna eku fambeni ka yena.
Hilaha Mukriste a nga hlulaka miringo ka kona.
12Ku katekile munhu la tiyiselaka endzingweni, hikuva, kutakuloko a ringiwile, u ta nyikiwa harhi ya vutomi, leyi Hosi yi yi tshembiseke lava yi rhandzaka.
13Ku nga tshuki ku va na munhu loyi, kungakuloko a ringiwa, a ku: “Ndzi ringiwa hi Xikwembu,” hikuva Xikwembu a xi ringiwi hi ku biha hikwalaho, na xona, a xi ringi munhu. 14Kambe munhu un'wana ni un'wana u ringiwa hi ku navela ka yena, a ri karhi a kokiwa ni ku phasiwa hakona. 15Kutani ku navela, loko ku xurhile, ku tswala xidyoho, kutani xidyoho, loko xi hetisekile, xi tswala rifu.
16Mi nga tshuki mi tixisa, vamakwerhu lava rhandziwaka; 17ku nyika hinkwako loku sasekeke, hambi ku ri ku ha hinkwako loku hetisekeke, ku ta hi le henhla, ku xika hi le ka Tata wa ku vonakala, loyi a nga riki na ku hundzuka, hambi wu ri ndzhutinyana kona. 18Hi ku rhandza ka yena, u hi velekile hi rito leri tiyeke, leswaku hi va swirhangana swa swivumbiwa swa yena.
Vatwi ni vaendli va Rito.
19Hikwalaho, vamakwerhu lava rhandziwaka, munhu un'wana ni un'wana a a ve la chivirikaka ku yingisa a hlwela ku vulavula, a hlwela ni ku kariha; 20hikuva ku kariha ka munhu a ku tirhisani ni ku lulama ka Xikwembu.
21Hikwalaho, cukumetani thyaka hinkwaro, ni hinkwaswo swa lunya, mi amukela hi ku olova rito leri byariweke etimbilwini ta n'wina, leri kotaka ku londzovota mimoya ya n'wina. 22Mi va vaendli va rito, mi nga vi vatwi ntsena, lava tixisaka eku ringaniseni ka vona. 23Hikuva munhu loko a ri mutwi wa rito, a nga ri muendli wa rona, u fana ni munhu la langutaka exivonivonini nghohe leyi a tswariweke a ri na yona; 24kasi kutakuloko a tilangutile, a suka a famba, a hatla a rivala lexi a nga xona.
25Kambe la xiyisaka nawu wa ku hetiseka, wu nga wa ku tshunxeka, a tiyisela kona, a nga ri mutwi la rivalaka, kambe a ri muendli la tirhaka, yeloyi u ta va munhu wo kateka eku endleni ka yena.
26Loko un'wana exikarhi ka n'wina a ringanisa leswaku u ni vukhongeri, kutani a nga bohi ririmi ra yena, kambe a tixisa embilwini, vukhongeri bya munhu loyi, i bya hava. 27Vukhongeri lebyi tengeke, lebyi nga riki na xisandzu emahlweni ka Xikwembu, Tata wa hina, hi loko munhu a kamba swisiwana ni vavasati va tinoni emahlomulweni ya vona a va a tihlayisa, a nga ri na xivati xa misava.
Currently Selected:
YAKOBO 1: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.