YAKOBO 2
2
Mufuwi ni xisiwana.
1Vamakwerhu, ku pfumela loku mi nga na kona eka Hosi ya hina Yesu Kriste, Hosi ya ku kwetsima, ku nga tshuki ku va ni ku hlawula vanhu hi nghohe ya vona; 2hikuva kungakuloko ku nghena enhlengeletanweni ya n'wina wanuna la nga ni xingwavila xa nsuku, a ambele tinguvu to saseka; ku nghena ni xisiwana lexi ambaleke tinguvu to biha; 3loko kutani mi languta eka la ambaleke tinguvu to saseka, mi ku eka yena: “Wena, tshama la eku sasekeni,” kutani mi ku eka xisiwana: “Wena, yima lahaya,” kumbe “tshama la ehansi, evunavelweni bya milenge ya mina,” 4a mi hlawulanga etimbilwini ta n'wina xana, mi va vaavanyisi va ku anakanya loko biha?
5Yingisani, vamakwerhu lava rhandziwaka: Xana Xikwembu a xi hlawulanga swisiwana swa misava leyi, leswaku va va vafuwi eku pfumeleni, ni vadyandzhaka va ku fuma loku Xikwembu xi ku tshembiseke lava xi rhandzaka xana? 6Kasi n'wina mi sola xisiwana! Xana a hi vafuwi lava mi xanisaka; kutani a hi vona lava mi kokelaka etihubyeni xana? 7Xana a hi vona lava sandzaka vito lero saseka, leri mi nyikiweke rona! 8Hambiswiritano, loko mi heta nawu lowu nga hosi exikarhi ka milawu, hilaha ku tsariweke hakona leswaku: “Rhandza warikwenu kukota loko u tirhandza,” mi endla swinene; 9kambe loko mi ya hi nghohe ya vanhu, ma dyoha, mi ri karhi mi tshinyiwa hi nawu hi leswi mi nga vatluri va wona.
10Hikuva mani na mani la nga ta hlayisa milawu hinkwayo, kambe a khunguvanyeka eka wun'we, u ta va ni nandzu wa hinkwayo. 11 Hikuva la nga te: “U nga tshuki u oswa,” u vurile na swona, u te: “U nga tshuki u dlaya,” loko kutani u nga oswi, kambe u dlaya, u mutluri wa milawu. 12Vulavulani, mi endla hi mukhuva lowu fanelaka lava nga ta avanyisiwa hi nawu wa ku tshunxeka. 13Hikuva ku avanyisa ku nga ka ku nga vi na tintswalo eka loyi a nga endlangiki hi tintswalo; kambe tintswalo ti tidzunisa henhla ka ku avanyisa.
Ku pfumela ni mitirho.
14Vamakwerhu, swi pfuna yini loko munhu a ku: “Ndzi ni ku pfumela,” a nga ri na mitirho; xana ku pfumela ka yena ku nga n'wi hlayisa xana? 15Loko makwenu wa wanuna, kumbe wa wansati va swerile va pfumala ni swakudya swa siku rin'wana ni rin'wana, kutani un'wana eka n'wina a ku eka vona: 16“Fambani hi ku tsaka, mi kufumela, mi xurha,” kasi a mi va nyikanga leswi laviwaka hi miri wa vona, swi pfuna yini xana? 17Hi mukhuva wolowo, na kona ku pfumela loku nga riki na mitirho ku tiferile.
18Kambe un'wana a nga ku: “U ni ku pfumela, kasi mina ndzi ni mitirho”; ndzi kombe ku pfumela ka wena loku nga riki na mitirho, kutani mina ndzi ta ku komba ku pfumela ka mina hi mitirho ya mina. 19U pfumela leswaku Xikwembu xi kona xi ri xin'we, u, endla swona; na wona mademona ma pfumela sweswo, kambe ma rhurhumela.
20Munhu wa swahava, xana u rhandza ku tiva leswaku ku pfumela loku nga riki na mitirho, a ku pfuni nchumu xana? 21Xana Abrahama, tata wa hina, a nga hlayiwanga la lulameke hi mitirho, siku a nyiketeke n'wana wa yena, Isaka, egandzelweni xana? 22Wa swi vona leswaku ku pfumela ka yena a ku tirhisana ni mitirho ya yena, kutani ku pfumela ka yena ku hetisekile hi mitirho. 23 Kutani ku endlakele Tsalwa leri nge: “Abrahama u pfumerile eka Xikwembu, kutani ku pfumela ka yena ku n'wi hundzukele ku lulama,” ku va kona a thyiwaka nakulobye wa Xikwembu. 24Ma swi vona-ke leswaku munhu u hlayiwa la lulameke hi mitirho ya yena, ku nga ri hi ku pfumela ntsena. 25Hi mukhuva wolowo, na yena Rahava, nsati wa vuoswi, a nga vekiwanga la lulameke hi mitirho xana, enkarhini lowo a amukeleke vakamberi, kutani a va tlherisa hi ndlela yin'wana xana? 26Hikuva kukota loko miri lowu nga riki na moya wu file, hi mukhuva wolowo, na kona ku pfumela loku nga riki na mitirho, ku file.
Currently Selected:
YAKOBO 2: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.