VARHOMA 3
3
Ku va Muyuda swi pfuna yini?
1Loko swi ri tano, lexi Muyuda a tlulaka van'wana ha xona, i xini-ke? 2Kumbe ku yimba ku pfuna yini? Ka pfuna ngopfu hi matlhelo hinkwawo, ngopfungopfu hi leswi marito ya Xikwembu ma vekiweke eka vona.
3Hikuva swi na yini-ke loko van'wana va nga pfumelanga? Xana ku ka va nga pfumelanga ku nga herisa ku tshembeka ka Xikwembu xana? 4 Niswitsanana! Ntiyiso wu ta kumiwa wu ri wa Xikwembu, vunwa byi ri bya vanhu! Hilaha ku tsariweke hakona leswaku: “U ta kumiwa u lulamile eku vulavuleni ka wena, kutani u va la hlulaka eku avanyisiweni ka wena.”
5Kambe loko ku homboloka ka hina ku vonakisa ku lulama ka Xikwembu, hi ta ku yini? Xana hi ta ku: “Xikwembu xi hombolokile loko xi endla hi ku kariha” xana? (Ndzi vula hi mukhuva wa vanhu.) 6Swi nga tshuki swi va tano! Hikuva ingi loko swi ri tano, Xikwembu a xi ta avanyisa misava hi mukhuva wihi?
7Kutani loko ntiyiso wa Xikwembu wu twarisiwa hi vunwa bya mina, xana ndza ha avanyiseriwa yini kukotisa mudyohi? 8Kutani a hi endli ha yini swo biha leswaku ku ta humelela leswo saseka ha swona, hilaha hi lumbetiwaka hakona hi van'wana loko va tiyisa leswaku hi vurisa sweswo; kambe lavo tano, ku avanyisiwa ka vona ku lulamile!
Ku hava ku hambana exikarhi ka vanhu; va dyohile hinkwako.
9Hi ta ku yini-ke? Xana hi tlula van'wana hi ku lulama xana? E-e, niswitsongo! Hikuva hi kombisiwile eku sunguleni leswaku hinkwavo, hambi va ri Vayuda, hambi va ri Vagriki, va fumiwa hi ku dyoha, 10kukota leswi tsariweke leswaku: “A ku na la lulameke, hambi a ri un'we. 11A ku na la nga ni ku twisisa, a ku na la lavaka Xikwembu. 12 Hinkwavo va hambukile, hinkwavo swin'we va hundzukele eka swahava; a ku na la endlaka leswo lulama, hambi a ri un'we.” 13 “Milomu ya vona i masirha lama ahlameke va xisa hi tindzimi ta vona. Vuxungu bya ti mhiri byi le hansi ka milomu ya vona.” 14 “Milon'wini ya vona ku tele tinhlambha ni ku bava.” 15“Milenge ya vona yi ni matsambo ku ya halata ngati; 16ku onhaka ni makhombo swi le tindleleni ta vona; 17 ndlela ya ku rhula a va yi tivi.” 18 “A ku na ku chava Xikwembu emahlweni ka vona.”
19Kambe ha swi tiva leswaku hinkwaswo leswi vuriwaka hi nawu, swi byeriwa lava nga enawini, leswaku milomu hinkwayo yi siviwa; vanhu hinkwavo va ta kumiwa va ri ni nandzu emahlweni ka Xikwembu. 20Hikwalaho a ku na nyama ni yin'we, leyi nga ta khana emahlweni ka xona hi mitirho ya nawu; hikuva xidyoho xi tiviwa hi nawu.
Munhu u khanisiwa hi ku pfumela eka Yesu Kriste.
21Kambe sweswi, handle ka nawu, ku lulama ka Xikwembu ku kombisiwa ku nga loku tiyisiwaka hi nawu ni vaprofeta; 22ku lulama ka Xikwembu i ku pfumela eka Yesu Kriste, loku nga ka hinkwavo, ni le henhla ka hinkwavo lava pfumelaka; 23a ku na ku hambana kwalaho hikuva hinkwavo va dyohile, kutani a va faneriwi hi ku kwetsima ka Xikwembu, 24kutani va hlayiwa lava lulameke hi tintswalo ta Xikwembu hi ku nyikiwa, hi ku kutsula loku nga ka Yesu Kriste; 25Xikwembu xi n'wi vekile leswaku yi ta va mhamba ya lava pfumelaka eka ngati ya Yena; xi ta kombisa ku lulama ka xona hilaha xi tshikeke swidyoho swo sungula, emikarhini ya ku honisa ka xona; 26a swi ri leswaku xi kombisa ku lulama ka xona emikarhini ya sweswi, leswaku xi va lexi lulameke loko xi ri karhi xi khanisa la nga ni ku pfumela eka Yesu.
27Nkarhi wa ku tidzunisa wu kwihi xana? Ku hava. Hi nawu wihi-ke? Wa mitirho xana? E-e; kambe hi nawu wa ku pfumela. 28Hikwalaho hi heta mhaka hi ku vula leswaku munhu u hlayiwa la lulameke hi ku pfumela, ku nga ri hi mitirho ya nawu.
29Xana Xikwembu i xa Vayuda ntsena xana? Xana a hi xa vamatiko na vona xana? Ina, i xa vamatiko, na vona; 30hikuva Xikwembu i xin'we ntsena, lexi nga ta khanisa lava ku yimba hi ku pfumela ni makhuna hi ku pfumela.
31Xana kutani hi herisa nawu hi ku pfumela xana? A swi tano! Kambe hi tiyisa nawu.
Currently Selected:
VARHOMA 3: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.