VARHOMA 15
15
Lava tsaneke va fanele ku tsetseleriwa.
1Kutani hina va matimba, hi fanele ku rhwala ku hluleka ka lava tsaneke, kambe hi nga tshuki hi lava leswi tsakisaka hina ntsena. 2Munhu un'wana ni un'wana wa hina a tsakise makwavo, a n'wi lavela leswinene leswi akisaka. 3 Hikuva Kriste, na yena, a nga lavangi leswi n'wi tsakisaka, kambe u endle hilaha ku tsariweke hakona leswaku: “Ku rhuketela ka lava ku rhukanaka ku ndzi wele ehenhla.” 4Hikuva timhaka hinkwato leti tsariweke eku sunguleni, ti tsariwile ku hi dyondzisa, leswaku, hi ku yingisela, ni ku chavelela loku humaka eMatsalweni, hi ta va ni ku langutela.
5Xikwembu xa ku yingisela ni xa ku chavelela, a xi mi nyike ku ehleketa ku ri kun'we, exikarhi ka n'wina, ha Yesu Kriste; 6leswaku hinkwenu mi dzunisa Xikwembu, Tata wa Hosi ya hina Yesu Kriste, hi mbilu yi ri yin'we, ni nomu wu ri wun'we. 7Amukelanani hakona, kukota leswi Yesu Kriste a mi amukeleke, na yena, Xikwembu xi dzunisiwa ha swona.
8Hikuva ndzi ri: Kriste a a ri nandza wa lavo yimba, ku tiyisa ntiyiso wa Xikwembu, ni ku tiyisa ku tshembisa loku nga tshembiseriwa vatatana, 9 leswaku vamatiko va dzunisa Xikwembu hikwalaho ka tintswalo ta xona, kukota leswi tsariweke leswaku: “Hikwalaho, ndzi ta ku twarisa exikarhi ka matiko, ndzi ta yimbelela vito ra wena hi tinsimu.” 10 Na kona va te: “N'wina, vamatiko, mi tsaka ni tiko ra xona.” 11 Va engeta, va ku: “N'wina vamatiko hinkwenu, dzunisani Hosi; yi dzuniseni n'wina vanhu hinkwenu.” 12 Esaya, na yena, u te: “Ku ta humelela hluke ra Yese leri nga ta yima ku fuma matiko, kutani vamatiko va ta tshemba yena.”
13Xikwembu xa ku tshembeka a xi mi tate hi ku tsaka hinkwako, ni ku rhula hinkwako eku pfumeleni, leswaku mi tala hi ku langutela, hi matimba ya Moya lowo Kwetsima.
Ta ntirho wa Pawulo.
14Loko ndzi ri mina, vamakwerhu, ndza tshemba leswaku na n'wina mi tele vunene, ni leswaku mi tele ku tiva hinkwako; mi tiva ni ku tsundzuxana.
15Kambe kunene ndzi tiyile matimba ku mi tsalela, ku pfuxa timhaka leti etimbilwini ta n'wina hi tintswalo leti ndzi ti nyikiweke hi Xikwembu, 16leswaku ndzi va nandza wa Yesu Kriste exikarhi ka vamatiko, ku tirha ntirho wa Evhangeli ya Xikwembu, leswaku vamatiko va ve nhlengo lowu nandzihelaka Xikwembu, wu ri karhi wu kwetsimisiwa hi Moya lowo Kwetsima.
17Hikwalaho ndzi ni nkarhi wa ku tidzunisa ha Yesu Kriste etimhakeni ta Xikwembu; 18hikuva ndza hluleka ku vula xilo lexi Kriste a nga xi endlangiki ha mina, ku tisa vamatiko eku yingiseni, hi marito ni mitirho, 19hi matimba ya swikombiso, ni masingita, ni matimba ya Moya; ndzi va ndzi haxa Evhangeli ya Kriste, ndzi sungula eYerusalema, ndzi tsemakanya ku ya hetelela eIiriya. 20Ndzi ri karhi ndzi rhandza ngopfu ku vula Evhangeli lomu Kriste a nga siki vuriwaka kona, leswaku ndzi nga tshuki ndzi aka emasungulweni ya van'wana. 21 Kambe ku va kukota leswi tsariweke leswaku: “Lava ingi va nga si byeriwa ta yena, va ta n'wi vona; ni lava nga siki twaka timhaka ta yena, va ta ti twisisa.”
Ta makungu ya riendzo.
22Hi yona mhaka leyi yi ndzi siveleke hakanyingi ku ta mi endzela. 23Kambe sweswi, a ndza ha ri na lexi ndzi khomeke etikweni leri; kutani leswi-ke, hi malembe layo tala ndzi naveleke ku mi endzela, 24loko ndzi ya eSpaniya, ndza tshemba leswaku ndzi ta mi vona loko ndzi tsemakanya tiko ra n'wina, ni leswaku hi n'wina mi nga ta ndzi heleketa kona, loko kutani ndzi korwile ha n'wina.
25Loko ku ri sweswi, ndza ha ya le Yerusalema, ku ya tirhela vakwetsimi; 26hikuva Vamakedoniya ni va Akaya va rhandzile ku hlenga nhlengo lowu nga ta averiwa swisiwana exikarhi ka vakwetsimi va Yerusalema. 27Va swi tsakerile hikuva va ni nandzu eka vona swinene. Hikuva vamatiko, loko va averiwile xuma xa vona xa Moya na vona, va fanele ku va tirhela hi xuma xa vona xa nyama. 28Kutakuloko ndzi hetile sweswo, kutani ndzi vekile mihandzu yoleyo emavokweni ya vona, ndzi ta nghena ni le ka n'wina loko ndzi ya eSpaniya. 29Kambe ndza swi tiva leswaku, eku fikeni ka mina eka n'wina, ndzi ta ta hi mikateko hinkwayo ya Kriste.
30Kutani ndza mi khongotela, vamakwerhu, hi Hosi ya hina, Yesu Kriste, ni rirhandzu ra Moya, leswaku na n'wina mi ndzi lwela emikhongelweni leyi mi ndzi endlelaka yona eka Xikwembu, 31leswaku xi ndzi lwela eka lava nga pfumeriki va Yudiya, ni leswaku vakwetsimi va Yerusalema, va amukela hi ku tsaka ku pfuna loku ndzi yisaka kona, 32leswaku ndzi mi endzela hi ku tsaka, loko ku ri ku rhandza ka Xikwembu kutani ndzi ya wisa eka n'wina. 33Xikwembu xa ku rhula a xi ve na n'wina hinkwenu! Amen!
Currently Selected:
VARHOMA 15: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.