NHLAVUTELO 4
4
Xiluvelo xa Xikwembu.
1Endzhaku ka sweswo ndzi languta, kutani ndzi vona nyangwa yi pfuriwile etilweni kutani rito lero rhanga leri ndzi ri tweke, ri vulavula na mina, ri fana ni nanga, ri ku: “Tlhandlukela halenu, ndzi ta ku kombisa leswi nga ta humelela endzhaku ka leswi.”
2Kutani hi nomu lowu, ndzi va emoyeni, ndzi vona xiluvelo xi vekiwile etilweni, kutani un'wana a tshamile exiluvelweni xexo. 3La tshameke eka xona, a a fana ni ribye ra yaspere ni sardiyo, xona xiluvelo xi rhendzeriwe hi nkwangulatilo lowu fanaka ni ku vonakala ka emeralda. 4Kambe xiluvelo a xi rhendzeriwe hi swiluvelo swa makume mambirhi na mune. Eswiluvelweni leswi, a ku tshamile vakulukumba va makume mambirhi na mune, va ambele tinguvu leto basa, va rhwele etinhlokweni ta vona tihari ta nsuku. 5Exiluvelweni, a ku huma ku hatima, ni ku pfuma, ni marito.
Emahlweni ka xiluvelo, a ku pfurha timboningo ta ntlhanu na timbirhi, yi nga mimoya ya ntlhanu na mimbirhi ya Xikwembu. 6Emahlweni ka xiluvelo, a ku ri ni lwandle ra nghilazi leri fanaka na kristala. Exikarhi ka xiluvelo, ni matlhelo hinkwawo ya xiluvelo, a ku ri ni swivumbiwa leswi hanyaka swa mune, swi ri ni mahlo layo tala emahlweni ni le ndzhaku. 7Xivumbiwa lexi hanyaka lexo rhanga a xi fana ni nghala, xivumbiwa lexi hanyaka lexa vumbirhi a xi fana ni rhole, xivumbiwa lexi hanyaka lexa vunharhu a xi ri ni mombo wa munhu; kutani xivumbiwa lexi hanyaka lexa vumune a xi fana ni gama leri hahaka. 8Swivumbiwa leswi hanyaka leswa mune, xin'wana ni xin'wana xa swona a xi ri ni timpapa ta ntlhanu na rin'we, a swi tele ni mahlo hi matlhelo hinkwawo ni le ndzeni; kutani a swi nga miyeri nhlekanhi ni vusiku, a swi ku: “Ku kwetsima, ku kwetsima, ku kwetsima Hosi Xikwembu lexi nga ni matimba hinkwawo, Loyi a a ri kona, Loyi a nga kona, Loyi a taka.” 9Kutani loko swivumbiwa leswi hanyaka swi ri karhi swi vula ku kwetsima, ni xichavo, ni ku khensa eka la tshameke exiluvelweni, la hanyaka hi masiku lama nga heriki, 10vakulukumba va makume mambirhi na mune a va wa hi matsolo emahlweni ka la tshameke exiluvelweni, va gandzela la hanyaka hi masiku lama nga heriki, va hoxa tihari ta vona emahlweni ka xiluvelo, va ku: 11“Hosi ni Xikwembu xa hina, u lulameriwe hi ku kwetsima, ni xichavo, ni matimba, hikuva u tumbuluxile swilo hinkwaswo, kutani swi kona, kambe swi tumbuluxiwe hi ku rhandza ka wena.”
Currently Selected:
NHLAVUTELO 4: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.