YOHANE 6
6
Ta Yesu loko a andzisa xinkwa.
1Endzhaku ka sweswo, Yesu a ya ehase ka lwandle ra Galeliya, ri nga ra Tiberiyo. 2Kutani mitshungu leyikulu yi n'wi landza, hikuva a va vonile mahlori lawa a ma endleke eka lava vabyaka. 3Kutani Yesu a tlhandlukela entshaveni, a ya tshamisa kona ni vadyondzisiwa va yena.
4Kambe Paseka ya Vayuda a yi ri ekusuhi. 5Yesu, kuteloko a tlakusile mahlo ya yena, a vona ntshungu lowukulu wu ta eka yena, kutani a ku eka Filipi: “Xana hi ta xava kwihi swinkwa leswaku vanhu lava, va dya?” 6A vurisa sweswo hi ku n'wi ringa, hikuva a a tiva leswi a nga ta swi endla. 7Filipi a n'wi hlamula, a ku: “Swinkwa swa tidenari ta madzana mambirhi, swi nga ka swi nga va ringani, leswaku un'wana ni un'wana a amukela lexitsongo.” 8Un'wana wa vadyondzisiwa va yena, Andriya makwa Simoni Petro, a ku eka yena: 9“Mufana u kona kwala, la nga ni swinkwa swa ntlhanu swa barley ni tinhlampfi timbirhi, kambe swi nga va yini eka vanhu lavo tala swonghasi xana?” 10Kambe Yesu a ku: “Tshamisisani vanhu ehansi.” Kambe byanyi a byi tele ngopfu exivandleni xexo. Kutani vavanuna va tshamisa ehansi; loko va hlayiwa a va lava ku va ntlhanu wa makume ya madzana. 11Kutani Yesu a teka swinkwa, kuteloko a khensile, a avela vadyondzisiwa, kutani vona va avela lava tshamiseke; a endlisa sweswo ni tinhlampfi, va ko va xurha. 12Kuteloko va xurhile, a ku eka vadyondzisiwa va yena: “Hlengeletani mahlanhla lama seleke, ku nga tshuki ku lova nchumu.” 13Va ya hlengeleta va tata swirhundzu swa khume na swimbirhi; hi mahlanhla ya swinkwa swa ntlhanu swa barley, lama siyiweke hi lava nga dya.
14Vanhu valavo, kuteloko va vonile mahlori lama endliweke hi Yesu, va ku: “Kunene loyi, i muprofeta la faneleke ku ta emisaveni.” 15Yesu loko a tivile leswaku a va lava ku ta n'wi vutla ku n'wi veka hosi, a tlhelela entshaveni a ri swakwe.
Ta Yesu loko a famba ehenhla ka mati.
16Nimadyambu, vadyondzisiwa va yena va ngirimela elwandle, 17kutani va nghena ebyatsweni, va ku va pela lwandle va ya eKapernawume; kutani mpimavayeni wu va fikela, Yesu a nga si fika eka vona. 18Kambe lwandle ri pfuxiwa hi mheho leyikulu, leyi hungaka. 19Kuteloko va tlutile tistadiya ta makume mambirhi na ntlhanu, kumbe makume manharhu, va vona Yesu a famba ehenhla ka mati, a tshinela ekusuhi ni byatso; va chava. 20Kambe a ku eka vona: “Hi mina, mi nga chaveni.” 21Kutani a va lava ku n'wi amukela ebyatsweni, kambe hi nomu lowu, byatso byi fika eribuwini laha va kongomeke kona.
Ta vuswa bya vutomi.
22Loko ri xile, ntshungu lowu seleke ehase ka lwandle a wu vonile leswaku a ku nga ri na byatso kwalaho, loko ri nga ri rin'we ntsena leri vadyondzisiwa va yena va ngheneke eka rona, ni leswaku Yesu a nga nghenanga ni vadyondzisiwa va yena ebyatsweni, kambe vadyondzisiwa va yena a va fambile va ri swavo. 23Kambe mabyatso man'wana lama humaka eTiberiyo a ma fikile ekusuhi ni laha va nga dyela kona swinkwa, loko Hosi yi khensile. 24Kuteloko mitshungu yi vonile leswaku Yesu ni vadyondzisiwa va yena a va nga ha ri kona kwalaho, va nghena emabyatsweni, va ya eKapernawume va ri karhi va lava Yesu. 25Kuteloko va n'wi kumile entsungeni wa lwandle, va ku eka yena: “Rabi, u tile rini la?” 26Yesu a va hlamula, a ku: “Ndzi vurisile ndzi ri eka n'wina: Ma ndzi lava ku nga ri hi leswi mi nga vona masingita, kambe hi leswi mi nga dya xinkwa, mi va mi xurha. 27Mi nga tirheleni swakudya leswi helaka, kambe tirhelani swakudya leswi nga ta va kona ni le vutomini lebyi nga heriki, leswi mi nga ta swi nyikiwa hi N'wana wa Munhu; hikuva hi yena loyi Xikwembu, a nga Tatana, xi n'wi fungheke.”
28Va ku eka yena: “Hi ta endla yini ku tirha mitirho ya Xikwembu xana?” 29Yesu a va hlamula, a ku: “Hi wona ntirho wa Xikwembu, hileswaku mi pfumela eka loyi xi n'wi rhumeke.” 30Va ku eka yena: “U endla mahlori wahi hi ta ma vona, kutani hi ta pfumela eka wena? 31 U endla ntirho wihi xana? Vatata wa hina va dyile manna emananga, hilaha ku tsariweke va ku: ‘U va hile vuswa lebyi humaka etilweni, va dya.’ ”
32Kutani Yesu a ku eka vona: “Ndzi vurisile ndzi ri eka n'wina: Muxe a nga mi nyikanga vuswa lebyi humaka etilweni, kambe Tatana a mi nyika vuswa lebyinene lebyi humaka etilweni. 33Hikuva vuswa bya Xikwembu hi lebyi xikaka hi le tilweni, lebyi nyikaka misava vutomi.” 34Va ku eka yena: “Hosi, hi nyike vuswa byebyo hi masiku hinkwawo.” 35Yesu a ku eka vona: “Hi mina vuswa bya vutomi; la taka eka mina, a nga ka a nga twi ndlala, ni la pfumelaka eka mina a nga ka a nga twi torha, ni siku ni rin'we. 36Kambe ndzi mi byerile leswaku hambi mi ndzi vonile, a mi pfumelanga. 37Hinkwaswo leswi ndzi swi nyikiwaka hi Tatana, swi ta ta eka mina; la taka eka mina, ndzi nga ka ndzi nga n'wi cukumeteli ehandle. 38Hikuva ndzi xikile hi le tilweni, ku nga ri ku endla ku rhandza ka mina, kambe ku endla ku rhandza ka la ndzi rhumeke. 39Kambe ku rhandza ka Tatana la ndzi rhumeke, hileswaku ndzi nga lahli nchumu wa hinkwaswo leswi a ndzi nyikeke swona, kambe ndzi n'wi pfuxa hi siku ra makumu. 40Hi kona ku rhandza ka loyi a ndzi rhumeke, hileswaku un'wana ni un'wana la langutaka N'wana, a pfumela eka yena, a va ni vutomi lebyi nga heriki; kutani mina ndzi ta n'wi pfuxa hi siku ra makumu.”
41Kambe Vayuda va n'wi hleva hikuva a te: “Hi mina vuswa lebyi xikeke hi le tilweni.” 42Kutani va ku: “Xana loyi a hi Yesu, n'wana wa Yosefa, loyi hi tivaka tata wa yena ni mana wa yena xana? Kutani u vurisa ku yini, leswaku: ‘Ndzi xikile hi le tilweni’?”
43Kambe Yesu a va hlamula, a ku: “Mi nga tshuki mi n'unun'utela. 44A ku na munhu la nga taka eka mina, loko a nga kokiwi hi Tatana la ndzi rhumeke, kutani mina ndzi ta n'wi pfuxa hi siku ra makumu. 45 Ku tsariwile ebukwini ya vaprofeta, va ku: ‘Va ta dyondzisiwa hinkwavo hi Xikwembu.’ Hikwalaho un'wana ni un'wana la yingiseke Tatana, kutani a dyondzisiwa hi yena, u ta eka mina. 46A hileswaku munhu a vonile Tatana, loko a nga ri la humaka eka Xikwembu; hi yena la voneke Tatana.
47“Ndzi vurisile ndzi ri eka n'wina: La pfumelaka eka mina, u ni vutomi lebyi nga heriki. 48Hi mina vuswa bya vutomi. 49Vatata wa n'wina va dyile manna emananga, kutani va file. 50Hi byo lebyi, vuswa lebyi xikeke hi le tilweni, leswaku munhu la dyaka byona, a nga tshuki a fa. 51Hi mina vuswa lebyi hanyaka lebyi xikeke hi le tilweni; kungakuloko munhu a dya vuswa lebyi, u ta hanya hi masiku; kutani vuswa lebyi ndzi nga ta byi nyika, i nyama ya mina, leyi ndzi nga ta yi nyika misava, leswaku yi hanya.”
52Vayuda va kanetana, va ku: “Xana yeloyi a nga hi nyikisa ku yini nyama ya yena, hi dya?” 53Yesu a ku eka vona: “Ndzi vurisile ndzi ri eka n'wina: Loko mi nga dyi nyama ya N'wana wa Munhu, ni loko mi nga nwi ngati ya yena, a ku na vutomi eka n'wina. 54La dyaka nyama yanga, ni la nwaka ngati yanga, u ni vutomi lebyi nga heriki; kutani ndzi ta n'wi pfuxa hi siku ra makumu. 55Hikuva nyama ya mina i swakudya kunene, ni ngati ya mina i swakunwa kunene. 56La dyaka nyama yanga, ni la nwaka ngati ya mina, u tshama eka mina, na mina eka yena. 57Hilaha Tatana la hanyaka a ndzi rhumeke, kutani ndzi hanya ha Tatana, na yena la ndzi dyaka u ta hanya ha mina. 58Vuswa lebyi xikeke hi le tilweni, hi byo lebyi; ku nga ri kukota vatata wa n'wina lava nga dya manna, kutani va file; la dyaka vuswa lebyo, u ta hanya hi masiku hinkwawo.”
59Yesu a vula timhaka leti, eKapernawume, a ri karhi a dyondzisa esinagogeni.
Ta vadyondzisiwa van'wana loko va fularhela Yesu. Ku tivula ka Petro.
60Vadyondzisiwa va yena lavo tala, kuteloko va swi yingisile va ku: “Rito leri, ra nonon'hwa; la nga ri twisisaka i mani xana?” 61Kambe Yesu a a tiva hi ku titivela leswaku vadyondzisiwa va yena va n'unun'uta, hikwalaho ka swona, a ku eka vona: “Xana mhaka leyi, ya mi khunguvanyisa xana? 62Swi to yini loko mi ta vona N'wana wa Munhu a tlhandlukela laha ingi a ri kona khale? 63Moya hi wona lowu hanyisaka; nyama a yi pfuni nchumu. Timhaka leti ndzi mi byelaka tona, i moya ni vutomi. 64Kambe van'wana va kona exikarhi ka n'wina lava nga pfumeriki.” (Hikuva Yesu a a tiva ka ha ri eku sunguleni leswaku lava nga pfumeriki i vamani, ni loyi a nga ta n'wi xenga.) 65Kutani a ku: “Hikwalaho ndzi nga mi byela, ndzi ku: A ku na munhu la nga taka eka mina, loko a nga nyikiwi hi Tatana.”
66Ku sungula hi nkarhi wolowo, vadyondzisiwa va yena lavo tala va tlhelela endzhaku, va nga ha tami va famba na yena.
67Kutani Yesu a ku eka lava khume na vambirhi: “Xana na n'wina a mi rhandzi ku tifambela-ke?” 68Simoni Petro a hlamula, a ku eka yena: “Hosi, hi nga ya eka mani xana? U ni marito ya vutomi lebyi nga heriki. 69Kutani hina hi pfumerile, hi va hi swi tiva leswaku hi wena Kriste, Muhlawuriwa wa Xikwembu.” 70Yesu a va hlamula, a ku: “Xana a hi mina ndzi nga mi hlawula, n'wina va khume na vambirhi? Kasi un'wana wa n'wina i demona.” 71A a vula Yudasi Iskariyota, n'wana Simoni, hikuva hi yena loyi a taka n'wi xenga, yena, un'wana wa lava khume na vambirhi.
Currently Selected:
YOHANE 6: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.