VAHEVERU 4
4
N'wana wa Xikwembu u tlula Yoxuwa; u ta hi nghenisa eku wiseni.
1A hi chaveni kwalaho leswaku hambi ku tshembisa ka ku nghena eku wiseni ka xona ku vekeriwe hina, un'wana wa n'wina a nga ti kumiwa a sele endzhaku. 2Hikuva na hina hi byeriwile Evhangeli kukotisa vona; kambe valavo, rito leri va ri yingiseke a ri va pfunanga nchumu, hikuva a ri pfangananga ni ku pfumela etimbilwini ta lava yingiseke. 3 Hikuva hi ta nghena eku wiseni, hina lava pfumeleke, hilaha xi nga te: “Hi leswi ndzi hlambanyeke evukarini bya mina leswaku va nga ti nghena eku wiseni ka mina,” hambi mitirho yi tirhiwile ku sukela eku vumbiweni ka misava. 4 Hikuva ku vuriwile kun'wana ehenhla ka siku ra ntlhanu na mambirhi leswaku: “Kutani Xikwembu xi phyuphya hi siku ra ntlhanu na mambirhi emitirhweni hinkwayo ya xona.” 5Na swona kambe: “A va nga ngheni eku wiseni ka mina.”
6Hikwalaho, leswi mhaka leyi, yi tiyeke, leswaku van'wana va nghena kona, kasi lava dyondzisiweke eku sunguleni, a va nghenanga hikwalaho ka ku tiarisa ka vona, 7 xi tlhela xi veka rin'wana siku, xi ku: “Namuntlha” loko xi vulavule eka Davhida, ku hundzile nkarhi lowo leha, xi engeta xi ku kukotisa eku sunguleni: “Namuntlha loko mi twa rito ra yena mi nga tshuki mi nonon'hwisa timbilu ta n'wina.” 8Hikuva loko ngi Yoxuwa a va nyikile ku wisa, a xi nga ti vula rin'wana siku endzhaku ka sweswo. 9Loko swi ri tano, ku wisa ka ha ri kona loku siyeriweke vanhu va Xikwembu. 10Hikuva la ngheneke eku wiseni ka Xikwembu, na yena u phyuphya emitirhweni ya yena, a kota xona Xikwembu xi phyuphyaka emitirhweni ya xona.
11Hikwalaho, a hi chivirikeni ku ya nghena eku wiseni kuloko, leswaku ku nga ti va na un'we la khunguvanyekaka hi ku tiarisa loko tano. 12Hikuva rito ra Xikwembu i rito leri hanyaka, leri tirhaka, leri karihaka ku tlula tlhari leri nga ni vukari hi matlhelo mambirhi, ri ya fika emahlanganweni ya mbilu ni moya, ni ka misiha ni mongo, kambe hi rona leri avanyisaka mianakanyo ni makungu ya timbilu. 13Kutani a ku na xivumbiwa lexi nga vonakiki emahlweni ka xona, kambe hinkwaswo swi tshama ntsena swi ri erivaleni emahlweni ka loyi hi nga ni mhaka na yena.
14Hikwalaho, leswi hi nga ni muprista lonkulu ngopfu, la tsemakanyeke matilo, a nga Yesu, N'wana wa Xikwembu, a hi tiyiseleni eka lexi hi tivuleke xona. 15Hikuva muprista lonkulu, loyi hi nga na yena, a hi loyi a nga tsandzekaka ku hi twela vusiwana emikarhalweni ya hina, kambe hi loyi a ringiweke ematlhelweni hinkwawo, a kotisa hina, kambe a nga vanga na xidyoho. 16Hikwalaho, a hi tshineleleni hi ku tshemba xiluvelo xa tintswalo, leswaku hi ta tweriwa vusiwana, hi kuma tintswalo, hi ta pfuniwa enkarhini lowu lulameke.
Currently Selected:
VAHEVERU 4: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.