VAHEVERU 2
2
1Hikwalaho, hi fanele ku tiyisela hi ku tlurisisa eka timhaka leti hi ti yingiseke, leswaku hi nga ti tshiki ti khaluta. 2Hikuva loko rito leri vuriweke hi tintsumi ri tiyile, loko na kona, ku tlula ka milawu, ni ku tiarisa hinkwako ku kumile hakelo leyi ringanaka, 3hina hi ta chupukisa ku yini, loko hi nga xiyi ku hlayiseka loko tano, loku nga sungula ku vuriwa hi Hosi, kambe ku tiyisiwile eka hina hi lava swi yingiseke, 4Xikwembu xi ri karhi xi tiyisa vumbhoni bya vona hi swikombiso leswa masingita, ni mitirho leyo tala ya matimba; xi ri karhi xi va avela Moya lowo Kwetsima, hilaha xi swi rhandzaka hakona.
N'wana wa Xikwembu u endliwile munhu, a ta ponisa vanhu.
5Hikuva misava leyi nga ta ta, leyi hi yi vulaka, a yi vanga yi vekiwa eku fumeni ka tintsumi, 6kambe mbhoni yin'wana yi vurile kun'wana, yi te: “Munhu i yini, leswaku u ta n'wi anakanya; kumbe n'wana wa munhu i yini, leswaku u ta n'wi endzela? 7U n'wi endlile la nge hansinyana ka tintsumi; u n'wi vekile ehenhla ka mitirho ya mavoko ya wena; 8 u vekile hinkwaswo ehansi ka milenge ya yena.” Hikuva loko Xikwembu xi vekile hinkwaswo ehansi ka yena, a nga siyanga nchumu lowu nga vekiwangiki ehansi ka yena; hambi swi ri tano, a hi si vona hinkwaswo swi vekiwile ehansi ka yena. 9Kambe Yesu loyi ingi a vekiwile ehansinyana ka tintsumi hi nkarhi wu nga ri wungani, ha n'wi vona a rhwexiwile ku kwetsima ni xichavo hikwalaho ka rifu leri a ri tweke, leswaku hi tintswalo ta Xikwembu, a twa rifu hikwalaho ka munhu un'wana ni un'wana.
10Hikuva a swi n'wi fanela, loyi hinkwaswo swi endleriweke yena, kambe swi endliwe hi yena, leswaku loko a lave ku yisa lavo tala eku vonakaleni, a hetisisa hi ku vaviseka, la nga n'wini wa ku hlayiseka ka vona. 11Hikuva, hambi a ri la basisaka, hambi va ri lava basisiweke, hinkwavo va huma eka un'we; hikwalaho a nga na tingana ku va vula vamakwavo, 12 loko a ku: “Ndzi ta tivisa vamakwerhu vito ra wena, ndzi ku yimbelelela tinsimu exikarhi ka tinhlengeletano. 13 Na swona, u ri: Ndzi ta va loyi a ku tshembaka.” Na swona: “Hi mina loyi, ni vana lava Xikwembu xi ndzi nyikeke vona.” Na swona, u ri: Ndzi ta va loyi a ku tshembaka.”
14Hikwalaho; kukotisa leswi vana va averiwaka ngati ni nyama, hi mukhuva wolowo, na yena, u averiwile swona, leswaku a ta herisa hi rifu la nga ni matimba ya rifu, a nga Diyavulosi, 15ni ku tshunxa un'wana ni un'wana la bohiweke evukhumbini hi masiku hinkwawo ya ku hanya ka yena hi ku chava rifu. 16Hikuva kunene a nga tekanga tintsumi, kambe u tekile rixaka ra Abrahama. 17Hikwalaho-ke, a swi fanela leswaku a fanisiwa hinkwako ni vamakwavo, leswaku a ta va muprista lonkulu la nga ni ku tsetselela, ni ku tshembeka ka hinkwaswo swa Xikwembu, a ko a kutsula tiko eku dyoheni ka rona. 18Hikuva leswi a tweke ku vaviseka ni ku ringiwa, wa swi kota ku pfuna lava ringiwaka.
Currently Selected:
VAHEVERU 2: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.