VAHEVERU 12
12
Ku tiyisela emaxangwini.
1Hikwalaho-ke, na hina, leswi hi nga rhendzeriwa hi papa leronghasi ri timbhoni, a hi cukumeteni hinkwaswo leswi hi tikelaka, ni vudyoho lebyi hi namarhelaka hi ku hatlisa, hi tsutsuma hi ku tiyisela empfhukeni lowu hi wu vekeriweke, 2hi ri karhi hi languta eka Yesu, musunguri ni muhetisi wa ku pfumela, la nga tiyela xihambano hikwalaho ka ku tsaka loku a ku vekeriweke, a nga vulanga nchumu hi tingana, kutani u tshamisile exiluvelweni, evokweni ra xinene ra Xikwembu.
3Loko swi ri tano, tsundzukani la nga tiyela ku kaneta lokonghasi ka vadyohi, leswaku mi nga tshuki mi karhala, ni ku hela timbilu. 4A mi si tilwela, ngati yi ko yi huma, enyimpini leyi mi yi lwaka ni vudyoho. 5Kutani mi rivele mikhongotelo leyi vuriwaka eka n'wina kukota loko yi byeriwa vana, leswaku: “N'wananga, u nga soli ku layiwa hi Hosi, u nga heli mbilu loko u tshinyiwa hi yena; 6 hikuva Hosi yi laya loyi yi n'wi rhandzaka, kutani yi ba n'wana un'wana ni un'wana loyi yi n'wi amukelaka ku va n'wana wa yona.” 7Kungakuloko mi yingisela ku layiwa, Xikwembu xi mi endla kukota vana va xona, hikuva hi wihi n'wana, tata wa yena a nga n'wi layiki xana? 8Loko mi nga ri na ku layiwa loku hinkwavo va nga ni ku averiwa kona, hi loko kumbe mi ri vana va vugangu mi nga ri vana va xiviri. 9Swi tsandza ni vatata wa hina va nyama, va hi layile kutani hi va chavile; xana ngopfungopfu hi nga ka hi nga tiveki ehansi ka loyi a nga Tata wa mimoya, kutani hi ta hanya xana? 10Kasi vona va hi layile hi mikarhi yi nga ri yingani, hilaha va nga ringanisa hakona; kambe yena u hi laya ku hi pfuna, leswaku hi va ni ku averiwa ka ku kwetsima ka yena. 11Kambe ku laya kun'wana ni kun'wana, loko ku humelela, a ku ringanisiwi leswaku ku nga hi tsakisa, kambe ka hi ririsa; ntsena endzhaku, ku tlhela ku nyika lava dyondzisiweke hakona mihandzu leyo lulama, leyo tenga.
Chivirikani! Mi nga lahlekeriwi hi tintswalo.
12 Lulamisani hikwalaho, mavoko lama karheleke, ni matsolo lama khwanyaleke; 13mi endlela milenge ya n'wina tindlela leti lulameke, leswaku leswi khwitaka swi nga tshuki swi hambuka ndlela, kambe swi hola.
14Hisekelani ku va ni ku rhula ni hinkwavo, ni ku kwetsima, loku, kungakuloko munhu a ku pfumala, a nga ka a nga voni Hosi; 15mi tilangutela leswaku ku nga tshuki ku va na un'we la titsonaka tintswalo ta Xikwembu, rimitsu ro bava ri nga tshuki ri mi hlukela, ri mi pfilunganya, kutani lavo tala va onhaka ha rona. 16Ku nga tshuki ku va na un'wana wa muoswi, hambi a ri musandzi, kukota Esawu, la nga xava swakudyanyana hi vuhosi bya yena. 17Hikuva ma swi tiva leswaku endzhaku, loko a rhandzile ku nyikiwa ndzhaka yo kateka, u nyenyiwile, hikuva a nga kumanga nkarhi wa ku hundzuka, hambi a ku lavile hi mihloti.
18Hikuva a mi tshinelelangi ntshava leyi khumbiwaka hi voko, hambi wu ri ndzilo lowu hisaka, hambi wu ri munyama, hambi xi ri xidzedze, 19hambi wu ri mpfumawulo wa nanga, hambi ri ri rito leri vulavulaka leri lava nga ri twa, va nga khongela leswaku ku nga ha vulavuriwi na vona; 20 hikuva a va tikeriwa hi ku lerisa loku nge: “Swi tsandza ni xifuwo, kungakuloko xi khumba ntshava, xi ta dlawa hi maribye.” 21Kutani hikwalaho ka ku chavisa ka lexi vonakaka, na yena Muxe u te: “Ndzi tshukile ngopfu, ndza rhurhumela.” 22Kambe mi tile entshaveni ya Siyoni, emutini wa Xikwembu lexi hanyaka, eYerusalema, wa le tilweni, ni le madzaneni ya madzana ya tintsumi, 23ni le nhlengeletanweni ya hinkwavo ni le kerekeni ya mativula lama tsariweke ematilweni ni le ka Xikwembu, muavanyisi wa hinkwavo, ni le ka mimoya ya lava lulameke lava nga hetiseka; 24ni le ka Yesu, mulamuri wa ntwanano lowuntshwa, ni le ka ngati leyi ku xuviwaka ha yona, leyi vulaka timhaka leti tlulaka ta ngati ya Avele hi ku saseka.
25Tilanguteleni leswaku mi nga tshuki mi alela la vulavulaka; hikuva leswi lava aleleke la nga vulavula na vona a ha ri emisaveni, va nga ponangiki, ngopfungopfu hina hi nga ponisa ku yini, loko hi fularhela la vulavulaka na hina a ri ematilweni; 26 loyi rito ra yena ri nga tsekatsekisa misava khale, kutani sweswi, wa hi tshembisa, a ku: “Hi nkarhi wun'wana ndza ha ta tsekatsekisa, yi nga ri misava ntsena, kambe na rona tilo.” 27Kutani loko a ku: “Hi nkarhi wun'wana,” hi ku ringanisa ku susa ka leswi tsekatsekaka, hikuva swi endliwile, leswaku ku ta sala leswi nga tsekatsekiki. 28Hikwalaho, leswi hi nga amukela ku fuma loku nga tsekatsekiki, a hi hlayiseni tintswalo leswaku hi tirhela Xikwembu ha tona hi mukhuva lowu xi tsakisaka, hi mafundza ni xichavo. 29 Hikuva Xikwembu xa hina, na xona, i ndzilo lowu hisaka.
Currently Selected:
VAHEVERU 12: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.