TIMHAKA 27
27
Ta Pawulo loko a yisiwa eRhoma: va welela eKreta.
1Kuteloko ku lerisiwile leswaku hi ta ya eItaliya hi ngalava, va nyiketa Pawulo, ni van'wana lava bohiweke eka ndhuna ya dzana, loyi va nge i Yuliyo wa nyimpi ya Sebasto. 2Kuteloko hi nghenile engalaveni ya Adramita, leyi fanelaka ku welela matlhelo ya Asiya, hi suka hi ri na Aristarko wa Tesalonika, muti wa Makedoniya. 3Ni siku leri tlhandlamaka, hi fika eSidoni; kutani Yuliyo a endlela Pawulo swinene, a n'wi pfumelela ku ya vona vanakulobye, ni ku hlayisiwa hi vona. 4Kuteloko hi suka kona, hi famba hi nxaxuko wa xihlale xa Kipra, hikuva ngalava a yi aleriwa hi mheho. 5Kuteloko hi perile lwandle ra Kilikiya ni ra Pamfiliya, hi fika eMira, wu nga muti wa Likiya. 6Kutani ndhuna ya dzana, loko yi kumile kona ngalava ya Aleksandriya leyi yaka eItaliya, yi hi nghenisa eka yona.
7Kambe hikuva a hi famba khwatsi hi masiku layo tala, hi fika hi ku karhateka ekusuhi na Kinida; kutani hi tingawuka Kreta hi le hansi, hitlhelo ra Salmona, hikuva mheho a yi hi sivela.
8Kuteloko hi lulamile ni ribuwu hi ku karhateka, hi fika laha vito ra kona va nge i Hlaluko-ro-Saseka, ekusuhi ni muti wa Lasiya. 9Kambe masiku layo tala loko ma hundzile, kutani ku famba elwandle a swi chavisa, 10hikuva n'hweti ya ku titsona swakudya a yi hundzile, Pawulo a va tsundzuxa, a ku: “Vavanuna, ndza swi vona leswaku riendzo leri ra ngalava ri ta va ni mhangu ni ku lahleka lokukulu, ku nga ri ka xuma ni ngalava ntsena, kambe ni ka vutomi bya hina.” 11Hambiswiritano, ndhuna ya dzana yi yingisa mufambisi wa ngalava ni n'wini wa yona ku tlula leswi vuriwaka hi Pawulo.
12Kambe hikuva hlaluko a ri nga lulameri ku yima kona hi vuxika, lavo tala va vula leswaku ku sukiwa kona ku ya ringetiwa ku tshama vuxika eFenikisi, ri nga hlaluko ra Kreta, leri lavaneke ni mheho ya vupeladyambu bya dzonga, ni ya vupeladyambu bya n'walungu. 13Kuteloko mheho ya dzonga yi sungule ku hunga khwatsi, va anakanya leswaku va vonile lexi va xi chivirikeleke, va suka va lulama ni ribuwu ra Kreta.
Ta ku penga ka ngalava.
14Kambe ku nga ri kungani, ku pfuka exihlaleni, mheho ya xidzedze, leyi va nge i Yurakuloni. 15Kutani hikuva ngalava a yi tekiwa hi mheho, yi tsandzeka ku yi hlula, hi yi tshika yi landza yona. 16Kuteloko hi susumeteriwe ehansi ka xihlalenyana xin'wana lexi vuriwaka Kawuda, hi lava ku tsandzeka ku kokela barika eka hina; kambe loko va ri kokile, 17va lunghisa ngalava leswaku va ta tiva ku tluta; kambe hikuva a va chava ku khinsa esaveni, va phutsa matsanga, kutani hi mukhuva wolowo va penga. 18Byi xa, loko hi ri karhi hi biwa ngopfungopfu hi xihuhuri, va cukumeta xuma xa ngalava. 19Kutani hi siku ra vunharhu, hi cukumeta swigotso swa ngalava elwandle hi mavoko ya hina. 20Kambe hikuva dyambu a ri nga vonaki hi masiku layo tala, hambi ti ri tinyeleti, kambe xihuhuri xi ri karhi xi chavisa, hi lahlekeriwa hi ku tshemba hinkwako ka ku pona.
21Kutani, leswi a ku ri khale va nga dyanga nchumu, Pawulo a yima exikarhi ka vona, a ku: “Kunene vavanuna, loko ingi mi ndzi yingisile mi nga suki eKreta, ngi mhangu leyi, ni ku lahleka loku, ingi swi nga humelelanga. 22Kambe ndza mi khongotela sweswi, leswaku mi tiyisa timbilu, hikuva a ku na un'we eka n'wina la nga ta lahlekeriwa hi vutomi bya yena: i ngalava ntsena leyi nga ta lova. 23Hikuva ntsumi ya Xikwembu lexi ndzi nga wa xona, lexi ndzi xi gandzelaka, yi tikombisile eka mina evusikwini lebyi, 24yi ku: ‘Pawulo, u nga tshuki u chava, hikuva u fanele ku ya humelela emahlweni ka Khezari kutani waswivo, Xikwembu xi ku nyikile hinkwavo lava u endzaka na vona engalaveni.’ 25Hikwalaho, vavanuna, tiyisani timbilu; hikuva ndza tshemba Xikwembu leswaku mhaka leyi yi ta endleka hilaha xi ndzi byeleke hakona. 26Ntsena swi fanele leswaku hi ya cukumetiwa exihlaleni xin'wana.”
Ta ngalava loko yi dyiwa hi mati.
27Kute hi vusiku bya khume na mune, loko hi ri karhi hi dlitadliteka elwandle ra Adriya, exikarhi ka vusiku, vatluti va anakanya leswaku va tshinelele tiko rin'wana. 28Loko va pima ku enta ka mati, va kuma mimpimo ya mavoko ya makume mambirhi kambe loko va ya emahlweni, va engeta va pima, va kuma mimpimo ya khume na ntlhanu. 29Kutani hi ku chava leswaku kumbexana hi nga wela emaribyeni ya lwandle, va hoxa mune wa tinsoma enyalweni kutani va langutela ku xa. 30Kambe vatluti va lava ku baleka engalaveni, va xikisa barika elwandle va endla swange va rhandza ku hoxa tinsoma ta xifuva xa ngalava. 31Kavaloko Pawulo a ku eka ndhuna ya dzana ni ka masocha: “Loko valavo va nga tshami engalaveni, mi nga ka mi nga poni.” 32Kavaloko tinhenha ti tsema mapindza ya byatso, kutani va ri tshika ri wa.
33Kuteloko byi ya ku xeni, Pawulo a va khongotela hinkwavo ku dya swakudya a ku: “Namuntlha i siku ra khume na mune mi tiyisele mi ri karhi mi titsona swakudya, mi nga dyi nchumu. 34Ndza mi khongotela leswaku mi dya swakudya; hi swona leswi mi fanekelaka leswaku mi hanya; hikuva a ku na un'we eka n'wina la nga ta lahlekeriwa hi nsisi, hambi wu ri wun'we, wa nhloko ya yena.” 35Loko a vurise sweswo, a teka vuswa, a khensa Xikwembu emahlweni ka vona hinkwavo, kuteloko a byi phemile, a sungula ku dya. 36Kutani hinkwavo va tiyisa timbilu, va dya swakudya, na vona. 37Kutani loko ku hlayiwa hinkwavo lava nga engalaveni, a va ri vanhu va 276. 38Kuteloko va xurhile swakudya, va hunguta ngalava hi ku cukumeta mavele elwandle.
39Kuteloko byi xile, a va tivanga tiko leswaku hi rihi; kambe loko va vona nsonga leri nga ni ribuwu, va rhandza ku yisa ngalava kona loko va swi kota. 40Kuteloko va tsemile tinsoma, va ti tshiketa elwandle va kondza va tshunxa timpecana ta swihendzulo, kambe va kokela tanga ra le nyalweni, va rhiya mheho, va kongoma entsungeni. 41Kambe hi wela esaveni laha ingi ku ri ni lwandle hi matlhelo mambirhi, kutani ngalava yi khinsa kona; nkondzo wa yona wu khomiwa ehansi, wu nga ha tsekatseki; kambe nyalo a yi tshoveka hi matimba ya magandlati.
42Kavaloko masocha ma lava ku dlaya vabohiwa, ma chava leswaku van'wana va nga baleka hi ku hlambela. 43Kambe ndhuna ya dzana, hikuva a yi rhandza ku ponisa Pawulo, yi va sivela; kutani yi lerisa leswaku lava tivaka ku hlambela va rhanga ku tihoxa ematini, va ya humela esaveni; 44van'wana va tipfuna hi mapulangi, van'wana hi swimpombondzwana swa ngalava; kutani hi mukhuva wolowo, va fika eribuwini, va ponile hinkwavo.
Currently Selected:
TIMHAKA 27: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.