TIMHAKA 2
2
Ta siku ra Pentekosta.
1Siku ra Pentekosta, kuteloko ri fikile, a va hlengeletanile hinkwavo exivandleni xi ri xin'we. 2Kutani hi nomu lowu, ku twakala mpfumawulo lowu humaka etilweni, wu fana ni wa xidzedze; kutani yindlu hinkwayo leyi va tshameke eka yona yi tala wona. 3Kutani tindzimi leti avanaka, ti fana ni malangavi ya ndzilo, ti va humelela, ti tshama ehenhla ka un'wana ni un'wana wa vona. 4Kutani hinkwavo va tala hi Moya lowo Kwetsima, va sungula ku vulavula hi tindzimi tin'wana, hilaha Moya wu nga va vulavurisa hakona.
5Kambe a ku ri ni Vayuda lava akeke eYerusalema, lava chavaka Xikwembu, va huma ematikweni hinkwawo lama nga ehansi ka tilo. 6Kuteloko mpfumawulo lowu wu yingisiwa, vunyingi byi hlengeletana, byi tshuka ngopfu, hikuva un'wana ni un'wana a a va yingisa va vulavula hi ririmi leri nga ra rikwavo. 7Kutani va hloleriwa hinkwavo, va hlamala va vutisana, va ku: “Vonani! Vanhu lava hinkwavo lava vulavulaka, a hi Vagaleliya xana? 8Swi endlisa ku yini loko hi va yingisa va vulavula hi ririmi leri un'wana ni un'wana wa hina a tswariweke eka rona? 9Hina Vaparta, ni Vameda, ni Vaelamu ni lava akeke eMesopotamiya, na Yudiya, na Kapadokiya, na Ponto, na Asiya, 10ni le Frigiya, na Pamfiliya, na Egipta, ni matlhelo ya Libiya la nga ekusuhi na Kirene; ni lava luveleke eRhoma, Vayuda ni vaproselita, 11Vakreta ni Maarabu, hinkwerhu hi va yingisisa ku yini va vulavula timhaka letikulu ta Xikwembu hi tindzimi ta hina xana?” 12A va tshukile hinkwavo, va nga tivi leswi va nga ta anakanya swona va vutisana, va ku: “Mhaka leyi, yi yisa kwihi xana?” 13Kambe van'wana va mona va ku: “Va xurhe vhinyo leyo tsokombela.”
Ta ku dyondzisa ka Petro.
14Kambe Petro a yima ni va khume na un'we, a tlakusa rito, a va byela a ku: “Vavanuna va Yudiya, na n'wina hinkwenu vaaki va Yerusalema, tivani leswo, mi yingisa swinene timhaka ta mina. 15Vanhu lava, a va pyopyiwanga hilaha mi anakanyaka hakona, hikuva wa ha ri nkarhi wa vunharhu. 16Kambe i mhaka leyi vuriweke hi muprofeta Yuwele, loko a te: 17‘Hi masiku ya makumu, ku vula Xikwembu, ndzi ta chela nyama hinkwayo hi Moya wa mina; vana va n'wina va xinuna ni va xisati va ta bvumbha, lavantshwa va n'wina va ta vona mahlori; ni swidyuhati swa n'wina swi ta lorha milorho. 18Hi masiku lawa, ndzi ta chela malandza ya mina ya xinuna ni ya xisati hi Moya wa mina, kutani va ta bvumbha. 19Ndzi ta endla masingita ehenhla etilweni, ni swikombiso ehansi emisaveni, ngati, ni ndzilo, ni hunguva ya musi. 20Dyambu ri ta hundzuriwa munyama, ni n'weti wu ta hundzuriwa ngati, siku lerikulu ra Hosi, leri hatimaka, ri nga si ta. 21 Kutani ku ta humelela leswaku un'wana ni un'wana la nga ta khongela vito ra Hosi, u ta ponisiwa.’
22“Vavanuna va Israele, yingisani timhaka leti: Yesu wa Nazareta wanuna loyi a kombisiweke eka n'wina hi Xikwembu hi mahlori, ni masingita, ni swikombiso leswi Xikwembu xi swi endleke ha yena exikarhi ka n'wina, hilaha mi swi tivaka hakona na n'wina, 23yeloyi-ke, u nyiketiwile hi makungu lama tiyeke ya Xikwembu ni ku titivela ka xona ka khale; kutani mi n'wi dlayile hi ku n'wi vamba hi mavoko ya swidyohi; 24loyi, Xikwembu xi n'wi pfuxile, xi n'wi tshunxile etinsingeni ta rifu, hikuva a ku nga ri na hilaha a nga bohiwaka hakona. 25Hikuva Davhida loko a vula swa yena, u te: ‘A ndzi vona Hosi hi masiku emahlweni ka mina, hikuva u le vokweni ra mina ra xinene, leswaku ndzi nga ti tsekatsekisiwa. 26Hikwalaho, mbilu ya mina yi tsakile, ni ririmi ra mina ri tsakisisa swonghasi, na yona nyama ya mina yi ta wisa hi ku tshemba; 27hikuva u nga ka u nga tshiki moya wa mina exivandleni xa vafi; u nga ka u nga pfumeleri muhlawuriwa wa wena leswaku a vona ku bola. 28 U ndzi tivisile tindlela ta vutomi; u ta ndzi xurhisa hi ku tsaka loku humaka emahlweni ka wena.’
29“Vavanuna varikwerhu, ndzi nga tiyisa ndzi mi byela leswaku mupatriarka Davhida u file, a va a lahliwa, kutani sirha ra yena ri le xikarhi ka hina, ni namuntlha. 30Kambe, leswi ngi a ri muprofeta, ni ku tiva leswaku Xikwembu xi n'wi tshembisile hi ku hlambanya leswaku xi ta tshamisisa exiluvelweni xa yena un'wana wa rixaka ra yena; 31hi ku tivonela loku ka khale, u vurile ku pfuka ka Kriste, a ku: Moya wa yena a wu tshikiwanga exivandleni xa vafi, ni nyama ya yena a yi vonangi ku bola. 32Hi yena Yesu loyi Xikwembu xi nga n'wi pfuxa, kutani hinkwerhu hi timbhoni ta mhaka leyi. 33Kakuloko a tlakusiwile hi voko ra xinene ra Xikwembu, u amukerile eka Tatana, ku tshembisa ka Moya lowo Kwetsima, kutani u chelerile leswi mi swi vonaka, ni leswi mi swi twaka. 34Hikuva Davhida a nga tlhandlukelanga ematilweni, kambe hi yena la nga te: ‘Hosi yi te eka Hosi yanga: Tshamisa evokweni ra mina ra xinene, 35 ndzi ko ndzi endla valala va wena vunavelo bya milenge ya wena.’ 36Hikwalaho, yindlu hinkwayo ya Israele yi fanele ku tiva swinene leswaku Xikwembu xi n'wi endle Hosi ni Kriste, Yesu loyi mi n'wi vambeke.”
Ta ku pfumela ka vanhu va makume manharhu ya madzana.
37Kuteloko va swi yingisile va tlhaveka timbilu; kutani va ku eka Petro ni ka vaapostola van'wana: “Vavanuna varikwerhu, hi ta endla yini?” 38Petro a ku eka vona: “Hundzukani, kutani un'wana ni un'wana a khuvuriwa hi vito ra Yesu Kriste, eku khomeriweni ka swidyoho; kutani mi ta amukela nyiko wu nga Moya lowo Kwetsima. 39Hikuva ku tshembisa loku, ku hlayeriwe n'wina ni vana va n'wina, ni hinkwavo lava nga ekule, lava va ha taka vitiwa hi Hosi, Xikwembu xa hina.” 40Kutani a tiyisa vumbhoni bya yena hi marito man'wana layo tala, a va khongotela, a ku: “Tiponiseni erixakeni leri ra ku homboloka.” 41Vona-ke, lava amukeleke rito ra yena hi ku tsaka, va khuvuriwa; kutani ku engeteriwa siku lero vanhu lava lavaka ku va makume manharhu ya madzana.
Mahanyelo ya kereke.
42Kutani a va chivirika edyondzweni ya vaapostola, ni le ku hlanganeni ka vona, ni le ku phemeni ka vuswa ni le mikhongelweni. 43Kambe ku chava a ku ri embilwini ya un'wana ni un'wana: Kutani mahlori layo tala ni swikombiso a swi ri karhi swi endliwa hi vaapostola. 44Hinkwavo lava nga pfumela a va tshama kun'we va pfanganyeta swilo hinkwaswo swa vona; 45va xavisa masimu ya vona, ni xuma xa vona, kutani va avela vanhu hinkwavo, hilaha un'wana ni un'wana a pfumaleke hakona. 46Na swona a va tiyisela etempeleni hi masiku hinkwawo, va ri ni mbilu yin'we, va ri karhi va phema vuswa endlwini yin'wana ni yin'wana, va dya swakudya swa vona hi ku tsaka, ni timbilu leti tengeke, 47va ri karhi va dzunisa Xikwembu, va tsakeriwa hi tiko hinkwaro. Kutani siku rin'wana ni rin'wana Hosi yi engetela kereke hi vanhu lava ponisiweke.
Currently Selected:
TIMHAKA 2: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.