2 SAMIELE 4
4
Ta ku dlayiwa ka Ixi-Boxete.
1Kuteloko n'wana Sawulo a twa leswaku Abinere a file eHebroni, mavoko ya yena ma kala matimba, kambe tiko hinkwaro ra Israele ri khomiwa hi ku chava lokukulu. 2N'wana Sawulo a a ri ni tindhuna timbirhi, vito ra yin'wana a a ri Baana, ra yin'wana, Rekaba. A va ri vana va Rimoni wa Beroto, wa vana va Benjamini; hikuva muti wa Beroto, na wona wu vuriwa wa Benjamini; 3kutani va Beroto a va balekile eGitayimi, laha va akeke kona ku fika namuntlha.
4Yonatani, n'wana Sawulo, a a ri ni n'wana la khwanyaleke milenge. A a ri wa malembe ya ntlhanu loko mahungu ya Sawulo na Yonatani ma fikile ma pfa eYizriele, kutani muan'wisi wa yena a n'wi teka a tsutsuma, kambe kakuloko a hatlisa ku tsutsuma, n'wana a wa kutani a lamala; vito ra yena a a ri Mefiboxete.
5Vana va Rimoni wa Beroto, Rekaba na Baana, va famba, va nghena dyambu a ri hisa endlwini ya Ixi-Boxete loko a ri karhi a etlela a wisa; 6va nghena exikarhi ka yindlu, swange ku ya nusa koro kutani va n'wi tlhava khwiri; kavaloko Rekaba na Baana, makwavo, va baleka. 7Va nghenisile sweswo endlwini loko a etlele esangwini ebyetlelweni bya yena, va n'wi tlhava a fa, va n'wi tsema nhamu. Kutani va teka nhloko ya yena, va famba vusiku hinkwabyo hi ndlela ya rivala, 8va ta tisa nhloko ya Ixi-Boxete eka Davhida, eHebroni, va ku eka hosi: “Hi yona nhloko ya Ixi-Boxete, n'wana Sawulo, nala wa wena la laveke vutomi bya wena. Namuntlha Yehovha u rihisile hosi, mufumi wanga, eka Sawulo ni vana va yena!” 9Davhida a hlamula, a byela Rekaba na Baana makwavo vana va Rimoni wa Beroto a ku: “Yehovha wa hanya, loyi a kutsuleke moya wa mina emakhombyeni ya wona hinkwawo, leswaku loyi a ndzi vikeleke mahungu, a te: 10‘Waswivo, Sawulo u file!’ A a tiringanisa emahlweni ya yena, ntsumi ya mahungu ya ku saseka, ndzi n'wi khomile, ndzi n'wi dlaya eSikilaga, ndzi n'wi nyika sweswo hakelo ya mahungu ya yena ya ku saseka! 11Xana a hi ku tlurisa sweswo loko vanhu lavo biha va dlaya munhu wa ku lulama endlwini ya yena ni le sangwini ra yena-ke? Xana a ndzi nga laveli sweswi ngati ya yena emavokweni ya n'wina, ndzi mi susa la emisaveni xana?” 12Kavaloko Davhida a lerisa majaha, ku va dlaya, kutani va va tsema mavoko ni milenge va va hayeka eribuwini ra tiva, eHebroni. Loko yi ri nhloko ya Ixi-Boxete, va yi teka va yi lahla esirheni ra Abinere, eHebroni.
Currently Selected:
2 SAMIELE 4: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.