2 SAMIELE 2
2
Ta Davhida loko a ri hosi ya Yuda eHebroni.
1Endzhaku ka swona, Davhida a vutisa Yehovha, a ku: “Xana ndzi ta khandziyela emutini wun'wana wa Yuda xana?” Yehovha a ku eka yena: “Khandziya.” Davhida a ku: “Ndzi ta khandziyela kwihi xana?” Yehovha a ku: “EHebroni.” 2Kavaloko Davhida a ya kona, a ri ni vasati va yena vambirhi, Ahinowama wa Yizriele, na Abigayele, nkata Nabala, wa Karmele. 3Davhida a tlhandlukisa ni vanhu lava ngi a ri na vona, un'wana ni un'wana ni yindlu ya yena; va ya aka emitini ya Hebroni. 4Vanhu va Yuda va ta kona, kutani va chela Davhida hi mafurha leswaku a va hosi ya yindlu ya Yuda.
Kavaloko va ya byela Davhida mahungu, va ku: “I vanhu va Yabexe wa Giliyadi lava nga lahla Sawulo.” 5Kutani Davhida a rhuma tintsumi eka vanhu va Yabexe wa Giliyadi, a ku eka vona: “A mi katekisiwe hi Yehovha, n'wina mi nga kombisa tintswalo eka hosi ya n'wina, Sawulo, mi va mi n'wi lahla. 6Sweswi, Yehovha a a mi kombise tintswalo ni vunene! Na mina ndzi ta mi endlela leswinene hikuva mi endlile swona. 7Sweswi, mavoko ya n'wina a ma tinyike matimba, mi va tinhenha, hikuva hosi ya n'wina, Sawulo, u file, kutani yindlu ya Yuda yi ndzi cherile ku ndzi veka hosi ehenhla ka yona.”
Ixi-Boxete, n'wana Sawulo, a fuma Israele eMahanayimi.
8Kambe Abinere, n'wana Neri, ndhuna ya nyimpi ya Sawulo, a teka Ixi-Boxete, n'wana Sawulo, a n'wi yisa eMahanayimi, 9kutani a n'wi veka hosi ya Giliyadi ni ya Vaaxuri, ni ya Yizriele, ni ya Efrayimi, ni ya Benjamini, ni le henhla ka Vaisraele hinkwavo. 10Ixi-Boxete, n'wana Sawulo, a a ri munhu wa malembe ya mune wa makume loko a fuma Vaisraele, kutani a fuma malembe mambirhi. Yindlu ya Yuda ntsena yi landza Davhida. 11Masiku ya Davhida loko a fuma yindlu ya Yuda eHebroni, a ma ri malembe ya ntlhanu na mambirhi, ni tin'hweti ta ntlhanu na yin'we.
Nyimpi ya Davhida yi lwa ni nyimpi ya Ixi-Boxete.
12Kutani Abinere, n'wana Neri, a huma eMahanayimi ni malandza ya Ixi-Boxete, n'wana Sawulo va ya eGibiyoni; 13kambe Yowabu, n'wana Seruya, ni malandza ya Davhida, va huma, na vona. Kutani va ya hlangana kusuhi ni tiva ra Gibiyoni; kavaloko va tshamisa, van'wana va ri tlhelo rin'wana ra tiva, van'wana tlhelo rin'wana ra tiva. 14Abinere a ku eka Yowabu: “A ku pfuke majaha ma ta tlanga emahlweni ka hina!” Yowabu a ku: “A ma pfuke!” 15Kutani va pfuka va tshinelela hi ku ringanisana, va ri khume na vambirhi va Benjamini, ni va Ixi-Boxete, n'wana Sawulo, ni khume na vambirhi va malandza ya Davhida; 16kutani un'wana ni un'wana a khoma nala wa yena enhlokweni, a n'wi tlhava tsheve hi banga ra yena, kutani va wa swin'we. Kavaloko va thya xivandla lexi Helikathatsurimi (nsimu ya mafumu), ku ri Gibiyoni. 17Ku lwa a ku ri loko nonon'hwa ngopfu siku leri; Abinere ni vanhu va yena va hluriwa hi vanhu va Davhida.
18Vana va Seruya lavanharhu a va ri kona; a a ri Yowabu, na Abixayi, na Asahele; Asahele a a kota ku tsutsuma kukotisa mhunti ya nhova. 19Kutani Asahele a landzela Abinere, a nga n'wi hambukeri exineneni hambi eximatsini. 20Kutani Abinere a languta endzhaku ka yena, a ku: “Hi wena Asahele xana?” A ku: “Hi mina.” 21Kutani Abinere a ku eka yena: “Hambuka exineneni hambi eximatsini, u khoma rin'wana ra majaha, u teka swiambalo swa yena.” Kambe Asahele a ala ku n'wi hambukela. 22Abinere a engeta a ku eka Asahele: “Ndzi hambukele! Ndzi ta ku tlhavela yini u wela ehansi? Kutani ndzi ta tlakusa mombo wa mina hi mukhuva wihi emahlweni ka Yowabu makwenu xana?” 23Kambe a ala ku hambuka, kutani Abinere a n'wi tlhava khwiri hi tlhari ra yena, tlhari ri va ri huma endzhaku, kutani a wa, a fa kwalaho. Kutani hinkwavo lava fikaka laha Asahele a weke kona a fa, a va yima kona.
24Kambe Yowabu na Abixayi va landzela Abinere, kutani kakuloko ri pela, va fika exitsungeni xa Ama, lexi langutaneke na Giya, endleleni ya mananga ya Gibiyoni. 25Vana va Benjamini va hlengeletana ku landza Abinere, va endla vandla, kutani va yima enhlohlorhini ya xitsunga. 26Kavaloko Abinere a huwelela eka Yowabu, a ku: “Xana tlhari ri ta tshama ri heta vanhu xana? A ku swi tivi leswaku mbitsi yi ta va kona emakumo xana? U ta hlwela ku fika rini ku byela tiko va tshika ku hlongorisa vamakwavo xana?” 27Yowabu a ku: “Xikwembu xa hanya! Loko ngi u nga vulanga nchumu, tiko a ri nga ti tshika ku landzela vamakwavo ku fika nimixo.” 28Kavaloko Yowabu a yimba nanga, kutani tiko hinkwaro ri yima, ri tshika ku hlongorisa Israele va tshika ni ku lwa.
29Abinere ni vanhu va yena va famba erivaleni vusiku hinkwabyo lebyi, kutani va pela Yordani, va tsemakanya tiko ra Bitironi hinkwaro, va ya fika eMahanayimi. 30Kutani Yowabu a tlhela eku landzeleni ka Abinere, a hlengeleta tiko hinkwaro kutani ku pfumariwa vanhu va khume na ntlhanu na mune va malandza ya Davhida, na Asahele. 31Malandza ya Davhida a ma dlayile vanhu va 360 va Benjamini ni va vanhu va Abinere. 32Kutani va tlakula Asahele va ya n'wi lahla esirheni ra tata wa yena eBetlehema. Yowabu ni vanhu va yena va famba vusiku hinkwabyo, kutani ri sungula ku xa loko va fika eHebroni.
Currently Selected:
2 SAMIELE 2: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.