1 SAMIELE 31
31
Ta ku hluriwa ka Vaisraele hi Vafilista. Sawulo ni vana va yena va dlawa.
1Vafilista va pfuka Israele, kutani vanhu va Israele va tsutsuma emahlweni ka Vafilista, va wa va tlhaviwile entshaveni ya Gilibowa. 2Vafilista va chivirika ku landza Sawulo ni vana va yena; kutani va tlhava Yonatani, na Abinadaba, na Maliki-Xuwaka, vana va Sawulo. 3Ku lwa a ku hisa laha ku nga na Sawulo, vacopi va vurha va fika eka yena, kutani a hlongorisiwa ngopfu hi vacopi va vurha. 4Kutani Sawulo a ku eka mutameri wa matlhari ya yena: “Hlomula banga ra wena u ndzi tlhava ha rona, leswaku lava nga yimbangiki va nga tshuki va ta ndzi tlhava, va tlanga ha mina.” Kambe mutameri wa matlhari ya yena a nga pfumelanga, hikuva a a chavile ngopfu. Kavaloko Sawulo a teka banga ra yena, a titlhava ha rona. 5Kakuloko mutameri wa matlhari a vona leswaku Sawulo a file, a titlhava na yena hi banga ra yena, kutani a fa na yena. 6Hi siku rolero ku file Sawulo swin'we ni vana va yena va vavanuna vanharhu, ni mutameri wa matlhari ya yena, ni vanhu va yena hinkwavo. 7Va Israele lava akeke etlhelo ra haleno ra rivala, ni tlhelo ra haleno ra Yordani, kakuloko va vona leswaku vavanuna va Israele va tsutsumile, ni leswaku Sawulo ni vana va yena lavanharhu va file, va tshika miti ya vona, va tsutsuma. Kutani Vafilista va ta aka eka yona.
8Siku leri tlhandlamaka, Vafilista va ta ku hluvula lava dlayiweke, kutani va kuma Sawulo ni vana va yena lavanharhu va weke entshaveni ya Gilibowa. 9Kutani va n'wi tsemela nhloko, va teka matlhari ya yena, kutani va rhuma etikweni hinkwaro ra Vafilista ku vika timhaka etindlwini ta swifaniso swa swikwembu swa vona, ni le xikarhi ka tiko. 10Va veka matlhari ya yena endlwini ya Astarte, kutani va hayeka ntsumbu wa yena erirhangwini ra Beta-Xani.
11Vaaki va Yabexe wa Giliyadi va twa leswi Vafilista va swi endleleke Sawulo, 12kutani vavanuna hinkwavo lava tiyeke va pfuka, va famba vusiku hinkwabyo, va ya hlawula mitsumbu ya Sawulo ni ya vana va yena erihlampfini ra Beta-Xani; kutani va tlhelela eYabexe va yi hisa kona. 13Kutani va teka marhambu ya vona, va ma yimbela ehansi ka nkanyi wa Yabexe; kutani va titsona swakudya masiku ya ntlhanu na mambirhi.
Currently Selected:
1 SAMIELE 31: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.