1 VAKORINTO 3
3
Ku hambana hikwalaho ka vadyondzisi va rito.
1Loko ndzi ri mina, vamakwerhu, ndzi hlulekile ku vulavula na n'wina kukotisa loko ingi mi ri va Moya; kambe ndzi vulavule na n'wina kukotisa loko ingi mi ri va nyama, ni swihlangi eka Kriste. 2Ndzi mi wundlile hi ntswamba, ku nga ri hi swakudya leswi tiyeke, hikuva a mi nga ti swi kota; ni sweswi, a mi si swi kota hikuva ma ha ri va nyama. 3Hikuva leswi mona ni ku hambana swa ha riki kona exikarhi ka n'wina, xana a mi va nyama-ke? Xana a mi yi hi mikhuva ya vanhu-ke? 4Xana loko un'wana a ku: “Mina ndzi wa Pawulo,” un'wana a ku: “Mina ndzi wa Apolosi”; xana a mi va nyama xana? 5Pawulo i mani xana? Na Apolosi, i mani xana? Malandza lawa mi pfumeleke ha wona, hilaha un'wana ni un'wana a nyikiweke hakona hi Hosi. 6Mina ndzi byarile, Apolosi u cheletile; kambe Xikwembu hi xona lexi mirisaka. 7Hi leswaku, la byalaka, a hi nchumu, hambi la cheletaka, kambe i Xikwembu lexi mirisaka. 8Kambe la byalaka ni la cheletaka, i van'we; kutani un'wana ni un'wana u ta amukela hakelo ya yena hi mpimo wa mitirho ya yena. 9Hikuva hi vatirhikulobye ni Xikwembu; kutani n'wina mi nsimu ya Xikwembu, mi yindlu ya Xikwembu.
Masungulo ya yindlu ya Xikwembu i Yesu Kriste ntsena.
10Loko ndzi ri mina, hi tintswalo ta Xikwembu leti ndzi ti nyikiweke, ndzi akile masungulo kukota muaki lowo tlhariha, kutani un'wana u aka ehenhla ka wona. 11Kambe munhu un'wana ni un'wana a a tivonele hilaha a akaka hakona ehenhla ka wona. Hikuva a ku na munhu la tivaka ku sungula masungulo man'wana loko ma nga ri lama sunguriweke, a nga Yesu Kriste. 12Kutani loko un'wana a aka ehenhla ka masungulo walawo hi nsuku, kumbe hi silivhere, hambi ma ri maribye layo saseka, hambi ti ri tihunyi, kumbe byanyi; 13ntirho wa un'wana ni un'wana wu ta vonaka: hikuva wu ta humesiwa eku vonakaleni esikwini ra Hosi, hikuva wu ta kombisiwa hi ndzilo; kambe ndzilo wu ta ringeta ntirho wa un'wana ni un'wana leswaku wu te yini. 14Loko ntirho wa un'wana lowu a wu akeke ehenhla ka masungulo wu tiya, u ta hakeriwa. 15Loko ntirho wa un'wana wu tshwa, u ta lahlekeriwa hi wona; kambe yena, u ta pona, a va kukota loko ngi a hundzile exikarhi ka ndzilo.
16Xana a mi swi tivi leswaku mi tempele ya Xikwembu, ni leswaku Moya wa Xikwembu wu akile eka n'wina xana? 17Loko munhu a onha tempele ya Xikwembu, Xikwembu xi ta n'wi onha; hikuva tempele ya Xikwembu yi kwetsimile, kutani tempele yoleyo, hi n'wina.
18Munhu a nga tshuki a tikanganyisa. Loko un'wana exikarhi ka n'wina a tiringanisa leswaku u tlharihile emisaveni leyi, u fanele ku hundzuka xihunguki, leswaku a ta va lowa vutlhari. 19Hikuva vutlhari bya misava leyi, i vuhunguki emahlweni, ka Xikwembu! 20 Hilaha ku tsariweke leswaku: “Xi phasa vavutlhari emanweni ya vona.” Kambe va te: “Hosi yi tiva mianakanyo ya lavo tlhariha, leswaku i swahava.”
21Loko swi ri tano, munhu a nga tshuki a tidzunisa hi vanhu, hikuva hinkwaswo i swa n'wina; 22hambi a ri Pawulo, hambi a ri Apolosi, hambi a ri Kefasi, hambi yi ri misava, hambi byi ri vutomi, hambi ri ri rifu, hambi swi ri swa sweswi; hambi swi ri leswi nga ta ta; hinkwaswo i swa n'wina, 23na n'wina mi va Kriste, na Kriste i wa Xikwembu.
Currently Selected:
1 VAKORINTO 3: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.