John 14
14
Jesus yugha hodulꞌehne ubúlhni, “Si sgha za sBá ootsꞌu tíhdulh”
1“Khun te nohdzi úndoodaꞌ junih. Yakꞌusda nohba ꞌalhaꞌ ꞌuntꞌoh, whuz unꞌa si cha nohba ꞌalhaꞌ oostꞌeꞌ. 2SBá ooyoh lhat-un yoh whuzdla whe ꞌuhoontꞌoh. ꞋAw ꞌalhaꞌ lheꞌhóotꞌoh de, nohdósniꞌ daꞌ. Whuz tisyalh nohba lhawhúdutisdleh wheni. 3Whuz oozusya ꞌinkꞌez nohba lhawhúdusdla de, doo cha za whusanátisdalh ꞌinkꞌez nohitáschulh, ndet susda-un, ꞌet si sulh ꞌútihtelh. 4ꞋInkꞌez ntsꞌe la whésya tsꞌe ꞌinkꞌez ntsꞌe ti whéhonꞌa ꞌet tꞌéwhunáhzun.”
5ꞋEt Thomas yoodulhkut whe ꞌuyúlhni, “Moodihti, ntsꞌe tanyalh ꞌaw tꞌetsꞌonúszun, ꞌinkꞌez ntsꞌenꞌa whuz ti tꞌétsꞌontázin?”
6ꞋEt Jesus ꞌuyulhni, “Si yakꞌuz ti ꞌustꞌoh, khuni ꞌalhaꞌ ꞌuntꞌoh-i usdli, ꞌinkꞌez ꞌilhiz wheni be tsꞌukhuna-i, ꞌi cha usdli. ꞋAw ꞌilhoghun hoontsꞌi sBá yutsꞌun tóoyaꞌ ꞌaítꞌoh, si sgha za ꞌet ndótinelh. 7Si tꞌésunahzun inleꞌ de, ꞌet sBá cha daꞌ tꞌenóhzin ooleꞌ. ꞋEt ꞌandit whútsꞌun, ꞌen ꞌawet tꞌenahzun ꞌinkꞌez ahꞌen cha ꞌáhja.”
8ꞋEt Philip ꞌuyulhni, “Moodihti, mBá bunenilhtun ꞌinkꞌez uznoolhꞌen, ꞌet ꞌawet neba soo hoontꞌoh.”
9ꞋEt Jesus ꞌuyulhni, “Philip, lheꞌwhuldzoh nohbulh ꞌústꞌen, ꞌet ꞌawhuz eh tꞌésunuzínzun? Mbe la sanꞌen-un, ꞌen sBá cha hiyanꞌen. ꞋInkꞌez di ha, ‘MBá bunenilhtun,’ díni? 10Si sBá ooyudúsda ꞌinkꞌez sBá cha syudínda. ꞋEt ꞌaw eh mba ꞌalhaꞌ lheꞌhóotꞌoh? Khuni be nohbulh yásduk-i ꞌaw si sghuni iloh ꞌuntꞌoh. SBá syudínda-un, ꞌen ndi ꞌutꞌen ꞌuyulhꞌen-i ꞌuntꞌoh. 11Nohba ꞌalhaꞌ ꞌuhotꞌeꞌ si sBá ooyudúsda ꞌinkꞌez sBá ꞌen syudínda. ꞋEt nohba ꞌalhaꞌ lheꞌhóotꞌoh de, ndi ꞌutꞌen ndai la ꞌulyá-i, ꞌi gha si sghun nohba ꞌalhaꞌ ꞌuhotꞌeꞌ. 12Soo tsꞌihꞌun unꞌa nohdúsni, mbe la buba ꞌalhaꞌ ꞌustꞌoh-un, ꞌen ndi ꞌutꞌen ndai la ꞌusꞌén-i, ꞌenne cha ꞌuhitilhꞌelh. ꞋEt si sBá ootsꞌu nátisdalh ꞌet huwa si ꞌutꞌen ꞌisꞌén-i ꞌon nus ꞌulcho-i ꞌutꞌen ꞌi la ꞌuhuyoolhꞌen. 13ꞋInkꞌez ndai la si sooziꞌ gha ookaꞌ dahni-i ꞌoh te nohba neꞌtistꞌen. ꞋEt huwa la sBá ꞌen ooYeꞌ gha ooba whudóltiꞌ. 14Ndai la si sooziꞌ gha ookaꞌ dahni-i, ꞌet nohba ꞌuwhutisdlelh.
15Nohni skꞌehsiꞌ de, ndi khuni nohtlꞌa dísdla-i ookꞌuneꞌ ꞌoohtꞌen. 16ꞋInkꞌez sBá ꞌen la ꞌilhiz wheni nohLaꞌtitꞌelh-un, ꞌen nohgha ítalhtelh, ꞌet la ootsꞌu hukwaꞌ doosniꞌ. 17ꞋEn Ndoni ꞌuntꞌoh. Ndai la khuni ꞌalhaꞌ ꞌuntꞌoh-i, ꞌi za ootsꞌu haídultsꞌuk. Ndi yun kꞌut whuduneꞌne#14:17,19 Mbene la ndi yun kꞌut Yakꞌusda ooba ꞌalhaꞌ lheꞌyítꞌohne, ꞌenne ubúlhni bughu yalhduk. ꞌaw dudeni be tꞌehinúszun ꞌinkꞌez ꞌaw huyólhchoot ꞌaítꞌoh. ꞋEt nohni tꞌenahzun, nohbulh ꞌúntꞌoh ꞌinkꞌez nohyudútiltsꞌulh. 18ꞋAw tsꞌunóhne ꞌahli leꞌ ꞌahtꞌoh whe nohghu toosyaꞌ ꞌaítꞌoh. Nohtsꞌun tóosyaꞌ la. 19Dzoh saꞌyaz inleꞌ de, ꞌinkꞌez yinka whuduneꞌne, sulhotisꞌel, ꞌet hoontsꞌi nohni suntilhꞌelh. Si khusna ꞌet huwa nohni cha khutihnalh. 20ꞋEt dzin de ꞌet la tꞌewhunohzin si sBá ooyudúsda ꞌinkꞌez sBá cha syudínda ꞌinkꞌez ꞌon ꞌun nohni cha nohyudusda. 21Mbene la khuni ꞌet nédisdla-i yukꞌúneꞌ ꞌutꞌenne, ꞌenne skꞌensiꞌne ꞌuhintꞌoh. ꞋInkꞌez mbene la skꞌentsíꞌne, sBá cha bukꞌetisiꞌ, ꞌinkꞌez si cha bukꞌetisiꞌ ꞌinkꞌez mbe usdli ꞌet la tꞌehoninzun hubooselh.”
22ꞋEt Judas, ꞌaw Judas Iscariot ꞌen iloh, ꞌen Jesus ꞌuyulhni, “Moodihti, ntsꞌenꞌa ꞌuhoontꞌoh whe nyun nghun tꞌetsꞌonózin-un neba ꞌuwhutánlelh, ꞌet hoontsꞌi yinka whuduneꞌne, ꞌenne nyun nghun ꞌaw tꞌéhontászin dini?”
23ꞋEt Jesus ꞌuyulhni, “Mbene la skꞌentsiꞌne, ꞌenne sghuni yootatun. ꞋEnne sBá bukꞌetisiꞌ ꞌinkꞌez bubulh whútitꞌelh ꞌet whe la si bulh butoh ókeꞌ. 24Mbene la skꞌelhísiꞌne, ꞌaw sghuni hikꞌu nulheꞌustꞌen. ꞋInkꞌez ndi khuni nohni dahtsꞌo-i, ꞌaw sichꞌoh sghuni iloh ꞌuntꞌoh. SBá, whuz de sútilhꞌaꞌ-un, ꞌen ooghuni ꞌuntꞌoh.
25ꞋAwhuz nohtoh ꞌustꞌoh whe njan ꞌet nohdúsni. 26ꞋEt ndun nohLaꞌutꞌen-un, Ndoni ꞌuntꞌoh, ꞌen si sooziꞌ gha sBá ꞌen nohtsꞌítilhꞌalh, tsꞌiyantsuk whunohodutilhꞌeh ꞌinkꞌez daja nohdásniꞌ la ꞌet whunalhnih cha nohtilhtselh. 27Be nedzi dizghel-i, ꞌi nohghu nenánustꞌai. ꞋI sichꞌoh be sdzi dizghel-i, ꞌi nohgha núsꞌai. Ndi be nedzi dizghel nohgha núsꞌai-i, ꞌi ꞌaw yinka whuduneꞌne nohgha húyuꞌaih-i, ꞌi ndúlhiltꞌoh whe ꞌuntꞌoh. Khun te nohdzi úndoodaꞌ ꞌinkꞌez noolhjut júnih!
28Sudahtso whe nohdásniꞌ. ꞋAwet nohghu tisyalh ꞌinkꞌez nohtsꞌun natisdalh la. SBá ꞌen sanus díztiꞌ ꞌet huwa ꞌen ootsꞌu nátisdalh, ꞌinkꞌez skꞌehsiꞌ de, ꞌandit daja nohdásniꞌ ꞌet huwa la whunólhni. 29ꞋInkꞌez ꞌoh te neꞌwhutitꞌen-un, ꞌandit nohdásniꞌ. ꞋEt de la whusahóoltsꞌut de, si sghun nohba ꞌalhaꞌ ꞌuhotꞌeꞌ. 30ꞋAw dzoh saꞌyaz ꞌon ꞌun nohbulh yaóosduk ꞌaítꞌoh. Ndi yun kꞌut humoodih#14:30 Ndi yun kꞌut humoodih, ꞌen netsudule ꞌuntꞌoh. ꞌaz de úyalh ꞌinkꞌez si sghun ꞌaw ntsool-iyaz ꞌi hoontsꞌi oochꞌeꞌ lhuyíloh ꞌet huwa. 31Dugweꞌ dudahdilh, ꞌawet njan huwuztoodilh, ꞌet huwa la yinka whuduneꞌne tꞌéhonózin sBá ookꞌesiꞌ ꞌinkꞌez ntsꞌoh te la khuni stlꞌa ídanꞌai, ꞌoh te neꞌústꞌen.”
Currently Selected:
John 14: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.