John 13
13
Ndi yun kꞌut howu natidalh-un Sizi yugha hodulꞌehne ubulh yálhduk
1Dzenis whuti ndet daꞌ Butus Lhuséya huwhútni-un, ꞌet whutsodaꞌ Sizi ꞌawet ootsꞌo whúdiltsꞌulh-un ba ꞌet newhúninzut tꞌéwhunínzun ndi yun kꞌut howu tiyalh ꞌinkꞌez duBá tsꞌun natidalh. Ndi yun kꞌut mbene la oochꞌeꞌne tsꞌiyawh bukꞌentsiꞌ. Soo ooba ꞌudekꞌez tileh whutsꞌun bukꞌentsiꞌ.
2ꞌEt hulhgha naꞌhitꞌal hukwꞌelhꞌaz ꞌudaꞌ netsudule Judas Iscariot Simon ooyeꞌ Sizi yeꞌ óotakulh hukwaꞌ noozin-un, yudzi yo neoodinꞌai. 3ꞌEt Sizi tꞌéwhunínzun ooBá tsꞌiyaitsuk kꞌúneꞌ yoolꞌen-un, ꞌet yugha óoninꞌai. ꞌInkꞌez Yakꞌusda tsꞌun haínya ꞌinkꞌez Yakꞌusda tsꞌun nátidalh. 4ꞌEt naꞌhitꞌal ꞌinkꞌez yoo ꞌaz ye dune unli-i ꞌudúneninla. Lusooma ilhchoot dubut neínílhbal ꞌinkꞌez yulh tsꞌú dilhꞌoo. 5ꞌEt ꞌawet be laꞌ tsꞌuldeh bez too dilhdzo ꞌinkꞌez yugha hodulꞌehne buke tunagus ꞌinkꞌez lusooma yulh tsꞌú dilhꞌoo-i, ꞌi be buke yunaꞌulhdeh.
6ꞌEt Sizi Simon Peter ghu ninya whe Simon Peter uyúlhni, “SMoodihti, ꞌaw si cha ske tunatangus whé ꞌintꞌen?”
7ꞌEt Sizi ꞌuyulhni, “ꞌAndit dastꞌén-un ꞌaw nyeni be tꞌéwhunuzínzun, ꞌet kꞌat le, ꞌet de la tꞌewhunonzeh.”
8ꞌEt Peter ꞌuyulhni, “ꞌAwundooh! ꞌAw ske tunaóongus ꞌaítꞌoh!” ꞌEt Sizi ꞌuyulhni, “ꞌAw nyunalheꞌusdoh de, ꞌaw sulh ꞌóntꞌeꞌ ꞌaítꞌoh.”
9ꞌEt Simon Peter ꞌuyulhni, “SMoodihti, ꞌaw ske za iloh, sla ꞌinkꞌez stsi cha tunaíngus!”
10ꞌEt Sizi ꞌuyulhni, “Mbe la bunaꞌide-un, duke za tunaoogus hubaꞌ hoontꞌoh. ꞌEt hoontsꞌi ndulcho whe lhdítsun whe ꞌuntꞌoh. ꞌEt nohni tsꞌiyawh nohunaꞌide ꞌet hoontsꞌi nohtoh ꞌaw tsꞌiyawh iloh lhdahtsun.” 11ꞌEt ꞌudaꞌ tꞌéwhunínzun mbe la yeꞌ óotakulh-un ꞌinka ꞌutni, “ꞌAw tsꞌiyawh iloh lhdahtsun.”
12Buke tunagus-un ꞌawet lhadúja whe, ye dune unli-i yé naja ꞌinkꞌez butoh nanátlꞌa didaꞌ, ꞌinkꞌez ꞌubulhni, “Hadiꞌ, njan ꞌandit danóhusdla la, soo cho eh noheni be tꞌéwhunáhzun? 13Whuneoodulhꞌeh-un ꞌinkꞌez Moodihti sudúhni. ꞌEt ꞌalhaꞌ duhni wheꞌ duhni, si ꞌen ꞌustꞌoh ꞌet huwa. 14ꞌEt si ꞌen ꞌustꞌoh dune hodulꞌeh-un ꞌinkꞌez Moodihti usdli whe nohke tunasusguz, ꞌet nohni cha whuz unꞌa ulhke tunaóohgus hubaꞌ hoontꞌoh. 15ꞌAndit nohnalh danóhusdla la, whuz unꞌa nohni cha ꞌet ndulhóolhꞌen. 16Soo tsꞌihꞌun unꞌa nohdúsni, ꞌaw ꞌustle-un, ꞌen dumoodih ando lheꞌítꞌoh. ꞌEt whuz unꞌa za khuni naꞌá-un ꞌaw mbe la yutílhꞌaꞌ-un yandó lheꞌítꞌoh. 17ꞌEt noheni be tꞌéwhunáhzun de daja nohdásniꞌ, ꞌinkꞌez danóhusdla la, ꞌet nohni cha whuz unꞌa ꞌahtꞌen de, ꞌet de tube hootáhtꞌeꞌ.
18ꞌAw soo tsꞌiyawh iloh nohghun ꞌet ndudúsni. Mbene la ꞌutahábisdlane, ꞌenne tꞌébunúszun, ꞌet huwa Yakꞌusda ooghuni ꞌukꞌú nusgúz-i kꞌut dawhútanelh la ꞌet huwun njan ndutni, ‘Mbe la lhes sulh ínꞌal-un, ꞌen schꞌaz nedinja whe sozoolhghelh hukwaꞌ ninzun.’
19Njan ꞌet nduwhútanelh-un whutso ꞌet nohdúsni. ꞌEt ndúhooja de, nohba ꞌalha ꞌuhoteꞌ mbe usdli-un, ꞌen ꞌustꞌoh. 20Soo tsꞌihꞌun nohdúsni mbe la whesꞌaꞌ-un, ꞌen dudzi yo whe huyílhchoot de, si cha suhílhchoot whe ꞌuhoontꞌoh. ꞌEt mbe la dudzi yo whe sílhchoot-un, ndun whuz de sútilhꞌaꞌ-un, ꞌen cha yílhchoot whe ꞌuhoontꞌoh.”
21ꞌEt Sizi njan ndudániꞌ hukwꞌelhꞌaz ooyughi ba ndo haꞌ hootꞌen. ꞌEt bubulh yátilhduk ꞌinkꞌez njan ndúbulhni, “Soo tsꞌihꞌun nohdúsni ꞌilhoghun nohtoh ꞌen seꞌóotakulh.”
22ꞌEt yugha hodulꞌehne tsꞌiyawh lhonulꞌen kꞌus umbe suba uyúlhni ꞌaw tꞌéhonúszun. 23ꞌEt ꞌilhoghun yugha hodulꞌeh-un, Sizi kꞌus yúkꞌentsiꞌ-un soo yuzih kꞌut usda, 24Simon Peter John yuba núlhni whe Sizi yoodolhkut soo mbe suba ꞌuyulhni yughu yalhduk-un ꞌinka.
25ꞌEt John yutsꞌun leꞌ ꞌuja ꞌinkꞌez yúlhni, “SMoodihti, mbe whe ꞌuntꞌoh?”
26ꞌEt Sizi ꞌuyulhni, “Mbe la ndi lhesyaz détunasusꞌai ꞌinkꞌez ootlꞌa yísꞌai-un, ꞌen ꞌuntꞌoh.” ꞌInkꞌez lhesyaz détunayuzꞌai ꞌinkꞌez Judas Iscariot Simon ooyeꞌ, ꞌen yutlꞌa yánꞌai. 27ꞌEt ndi lhesyaz yutlꞌa yánꞌai whe ꞌawet Satan ye yínya. ꞌEt Sizi uyúlhni, “Ndet daꞌ ꞌuwhutanlelh, ꞌa cho lhaóodinleh.”
28ꞌEt ꞌonghunne tsꞌiyawh mbene la Sizi yugha hodulꞌehne, di ha ꞌet ndúyulhni-un ꞌaw tꞌéhonúszun. 29Whulohne, ꞌenne ꞌuhuninzun Judas ꞌen sooneya zus nuyáꞌa ꞌinka ndai la dzenis whuti wheni ookaꞌ nudzún-i, ꞌi yoket ha uyúlhni. Kꞌus telꞌenne te hoonliyaz bugha ooꞌalh ha ꞌuyulhni huninzun. 30ꞌEt ꞌawet lhesyaz yílhchoot ibulh, ꞌaho ꞌa cho ꞌaz whinya. ꞌEt ꞌawet ꞌulhdzis ꞌuhoontꞌoh.
31ꞌAz whénya hukwꞌelhꞌaz ꞌet Sizi ꞌutni, “ꞌAwet Yinka Dune Yeꞌ ooba whudáltiꞌ ꞌinkꞌez ꞌen oogha Yakꞌusda ooba whudáltiꞌ. 32ꞌEn oogha Yakꞌusda ooba whudáltiꞌ de, ꞌet de Yakꞌusda didutchꞌoh cha Yinka Dune Yeꞌ soo ꞌaho ꞌet yuba whudutálhtiꞌ.
33Suzkehke ꞌaw saꞌ iloh nohbulh ꞌutistꞌelh. Skuntihtalh ꞌet hoontsꞌi Lizwifne ꞌubudásniꞌ, whuz unꞌa nohni cha nohdúsni, ntsꞌe la tisyalh tsꞌe ꞌaw nohni cha sulh tóohdilh ꞌaítꞌoh.
34ꞌIlho khuni ꞌandidi-i nohtlꞌa tísꞌalh ꞌinkꞌez ndi ꞌi ꞌuntꞌoh, tsꞌiyawh lhkꞌe oohsiꞌ. Ntsꞌenꞌa la si nohkꞌesiꞌ, ꞌet whuz unꞌa za nohni cha lhkꞌe oohsiꞌ. 35Ndi be lhkꞌe tsꞌutsiꞌ-i nohtoh hoonli de, ꞌi gha la sgha hodulꞌehne ꞌahli tsꞌiyanne tꞌéhonózin.”
36ꞌEt Simon Peter yoodulhkut, “Moodihti, ntsꞌe tanyalh?” ꞌEt Sizi uyúlhni, “Ntsꞌe la tisyalh tsꞌe, ꞌaw ꞌandit suntonyaꞌ ꞌaítꞌoh, ꞌet hoontsꞌi kꞌat le, ꞌet de la suntonyaꞌ.”
37ꞌEt Peter ꞌuyulhni, “Moodihti, ꞌet di ha ꞌandit ꞌet ꞌaw nyun toosyaꞌ ꞌaítꞌoh? Be khúsna-i, ꞌi hoontsꞌi nyun mba oola dutisnih!”
38ꞌEt Sizi ꞌuyulhni, “ꞌAlhaꞌ eh be khína-i, ꞌi sba oola dutatnih? Soo tsꞌihꞌun unꞌa nyudúsni lugok dune ꞌudutinelh whutso, tat ꞌet tꞌésunuzínzun dutanelh.”
Currently Selected:
John 13: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.