2 Corinthians 1
1
Yakꞌusda ba ꞌilhunaoodulhne, keyoh Corinth tsꞌe, ꞌenne Paul hadih ꞌubulhni
1Si Paul Yakꞌusda hukwaꞌ ninzun kꞌunꞌa, ꞌi be Jesus Christ ba whelꞌaꞌ-un ꞌustꞌoh. ꞋInkꞌez neulhutsin Timothy, ꞌen cha sulh ꞌutꞌen. ꞋEt la keyoh Corinth tsꞌe Yakꞌusda ba ꞌilhunaoodúlhne hinli, ꞌinkꞌez yun kꞌut Achaia dilhtsꞌine, mbene la nohbulh Yakꞌusda oochꞌeꞌ unline, ꞌet nohni tsꞌiyawh ndi ꞌudustlꞌus kꞌut nohtsꞌo kꞌeꞌusguz.
2NeBá Yakꞌusda ꞌinkꞌez Jesus Christ neMoodihti tsꞌun nohba tenadusdli ꞌet whe ye unzoo-i ꞌinkꞌez nohdzi dóghel nohbulh óotꞌeꞌ.
Yakꞌusda tsꞌiyai-i be kꞌenaneniꞌoh
3Yakꞌusda, Jesus Christ neMoodihti ooBá ꞌuntꞌoh ꞌet whe uzdílhtiꞌ. NeBá ꞌen gha be négha téꞌnidzeh-i, ꞋEn za Yakꞌusda ꞌuntꞌoh tsꞌiyai be kꞌenáneniꞌoh. 4ꞋEt dzoh nutsꞌudeh-un whuchꞌa kꞌenáneniꞌah. ꞋEt huwa whuz unꞌa ꞌuyoonne hoontsiꞌ-un bughá honkat de, ꞌet de wheni cha Yakꞌusda ye kꞌenáneniꞌah-i, ꞌi gha kꞌenábuznoꞌah hubaꞌ hoontꞌoh. 5ꞋEt Christ whe dzoh nusúzut-un, ꞌet whe wheni cha ꞌen gha dzoh nutsꞌuzde. ꞋEt whuz unꞌa wheni cha Christ ye kꞌenáneniꞌah-i ꞌet neghun hoonli whe ꞌuwhultsuk-un kꞌenáneniꞌoh. 6ꞋEt hoontsꞌi ndet la dzoh nutsꞌudeh de, ꞌet ꞌi gha kꞌenánohuzníꞌah ꞌinkꞌez dahjih. Ndi hoontsiꞌ-un nohtsꞌu hóoltsꞌulh whe dzoh nahdeh ꞌet hoontsꞌi ndi kꞌenáneninꞌa-i, ꞌi be wheni cha ꞌinkꞌez nohni cha tsꞌiyawh whulh nuzdilhya. ꞋEt whuz unꞌa ꞌuwhútꞌen. ꞋInkꞌez ndet la kꞌenáneninꞌa de, ꞌet nohni za nohba ꞌuhoontꞌoh. ꞋEt ꞌi be kꞌenánohuzníꞌah ꞌinkꞌez dahjih. 7ꞋInkꞌez tꞌetsꞌonínzun ntsꞌenꞌa la nohni dzoh nutsꞌudeh whe netsꞌú nedihdil, ꞌet ꞌuwhultus ꞌi be za ndi ye kꞌenáneninꞌa-i, ꞌi be netsꞌú nedihdil.
Daztitsah-un, Yakꞌusda whuchꞌa neúlhyis
8Sulhutsinke ꞌet whunulhꞌen, nyan-i Asia yun kꞌut ndi hoontsiꞌ-un negha óoninkat, ꞌet nebulh dahooja-un la tꞌewhunoohzeh hukwaꞌ nuszun. Whuz tsꞌe nebulh dahooja-un la tube hoontsiꞌ kꞌet ꞌaw ꞌuzdooniꞌ ꞌaitꞌoh. ꞋOn nus neba hoondaz kꞌet ꞌaw whúlh nuzdolyaꞌ ꞌaitꞌoh. Neba hoontsiꞌ kꞌet yatsꞌitádla uznanzin neba leꞌ hooja. 9ꞋAhoolhyiz daztitsah-un hukwa tse tsꞌúholih. ꞋEt whuz unꞌa nebulh ndúhooja de, ꞌet whula gha ꞌaw whenichꞌoh tꞌaníuznotan ꞌaitꞌoh. Yakꞌusda za tꞌaniuznootan. ꞋEn za yaidlane dunadilh-un ꞌuntꞌoh. 10ꞋEn ndi tube hoontsiꞌ daztitsah-un, ꞌinkꞌez ꞌet whuchꞌa neúlhyih. ꞋEt ꞌahoolhyiz whuz unꞌa ꞌuwhutátꞌelh. ꞋEt whuz unꞌa lhanꞌun te neilelh zaꞌ titꞌelh, ꞌet ꞌilhiz hukwa tse tsꞌuholeh. 11Nohni cha tenadudli be nela ꞌahtꞌen whe nela tenadoohdli. Lhane neba tenadudli ꞌet whe hoonliyaz neghá honkat. ꞋEt huwa nebulh dáhooja lhane Yakꞌusda tsꞌun musi neba hutni.
Ndet la neyo tsꞌe oogha tꞌetsꞌoninzun-i di la whunénulhtun, ꞌi gha tsꞌuhóontꞌiꞌ
12ꞋEt neyo tsꞌe oogha tꞌetsꞌoninzun-i ndi whunénulhtun, ꞌi za tsꞌuhóontꞌiꞌ whe howu yatsꞌoolhduk. ꞋEt whe whunénilhtan ndi yun kꞌut uzdaltsꞌiꞌ. Yakꞌusda oobé ꞌalhaꞌ nudzun-i, ꞌinkꞌez ꞌaw nanki khuni be yalhtsꞌusduk, ꞌet whuz unꞌa za ꞌukꞌenus nohtoh ꞌuzdáltsꞌiꞌ. Ndi yun kꞌut whutꞌenne be whútnih-i, ꞌi be lheꞌtsꞌilel. Yakꞌusda ye unzoo-i, ꞌi gha ꞌutsꞌitꞌen. ꞋEt whuz unꞌa ne-eni toh whudizꞌai-i whunénilhtan. 13ꞋEt ndi la ookꞌu yalhduk-i, ꞌinkꞌez ndet tꞌeoonihzin, ꞌet whuz unꞌa za nohtsꞌo kꞌeꞌtsꞌuges. ꞋEt whula toh whutsꞌun ꞌi tꞌewhuntihzeh nohba hukwaꞌ nuszun. 14ꞋEt whuz unꞌa hoontsool-unyaz datsꞌintꞌoh la ꞌet neghun tꞌewhunihszin. ꞋEt huwa Jesus Christ neMoodihti oodzin whusahóoltsꞌut de, ꞌet de nohni nebe ꞌoonáhtꞌeꞌ, wheni cha nohni nohbeꞌ tsꞌoontꞌeꞌ.
ꞋAw nohundósdah hukwa lheꞌnuszun
15ꞋEt huwa soo ꞌalhaꞌ nuszun whe nohtsꞌu tísyalh inleꞌ. ꞋEt whe la whulh nat-un hoonzoo-un nohgha hóltsꞌit. 16ꞋEt whuz unꞌa Macedonia yun kꞌut tsꞌe ꞌet ꞌoh whuya nohkꞌutisyalh inleꞌ. ꞋEt Macedonia tsꞌe ha násja de, doo cha za nohkꞌunatisdulh inleꞌ. ꞋEt whuz kꞌonásdalh whe Judea yun kꞌut ndai la be ndunusdzit-i be sla tihnelh inleꞌ. 17ꞋAntsꞌi ꞌoh neꞌdusniꞌ nuhzun eh? Kꞌus ntsꞌenꞌa la neyustꞌe tsꞌu níntꞌi-un, ꞌet whuz unꞌa seni be lhaóodusdla nuhzún eh? ꞋEt whuz unꞌa ndustꞌoh de, ꞌet de si whuloh te, “A” doosniꞌ ꞌinkꞌez whuloh te, “ꞋAwundooh” doosniꞌ la.
18ꞋEt hoontsꞌi Yakꞌusda ꞌaw nela dootnih ꞌaitꞌoh. ꞋEt neghuni ꞌaw, “A” ꞌinkꞌez, “ꞋAwundooh” lhiloh! ꞋAw nawh yalhtsꞌulhduk. 19ꞋEt Jesus Christ Yakꞌusda ooYeꞌ ꞌuntꞌoh. ꞋEt ꞌoh daꞌ Sylvanus, Timothy, ꞌinkꞌez si cha ꞌen ghun ꞌi be nohbulh yátsꞌulhduk daꞌ, ꞌaw, “A” ꞌinkꞌez, “ꞋAwundooh” lhtsꞌu dínel inleꞌ, ꞌen be, “A” za ꞌuntꞌoh ꞌet huwa. 20ꞋEt Yakꞌusda yé netsꞌu nahizya-i, ꞌi tsꞌiyawh, “A” ni, ꞌinkꞌez ꞌen be, “Ndo honeh” tsꞌutni. ꞋEt wheni negha Yakꞌusda uzdólhtiꞌ. 21ꞋEt mbe la Christ bulh soo cho ꞌilhiz nohbulh núzdilhya neulhtsi, ꞌen Yakꞌusda ꞌuntꞌoh. ꞋInkꞌez Yakꞌusda ꞌen za ꞌuneinla Ndoni ye ulhtus-i ꞌet negha óoninꞌai whe ꞌuntꞌoh. 22ꞋInkꞌez ꞌen cha be ꞌe hóodalꞌen-i, ꞌi be wheni cha neye hóodatꞌen neulhtsi. ꞋInkꞌez Ndoni nedzi yidanꞌai. ꞋI be yuloh neba ꞌukꞌelha whulhtsi.
23Yakꞌusda ookaꞌ disniꞌ szul ghun stꞌa tiyin huba, ꞌaw nohundósdah hukwa lheꞌnúszun. ꞋEt huwa ꞌawhuz Corinth tsꞌe lhoozúsyai. 24ꞋAw nohba ꞌalha ꞌuhoontꞌoh-un whumoodih ꞌuztileh hukwa lheꞌtsꞌustꞌen. ꞋEt kꞌus ndet hoonáhtꞌiꞌ hukwꞌunꞌa ꞌunohtsꞌoolhzin. Bé ꞌalha ꞌuhoontꞌoh-i, ꞌi be Yakꞌusda ba núdulhyai ꞌet huwa.
Currently Selected:
2 Corinthians 1: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.