1 Corinthians 16
16
Yakꞌusda oochꞌeꞌne sooniya buba ꞌilhunatsꞌoꞌai-i
1ꞋEt ꞌawet ndi Yakꞌusda oochꞌeꞌne sooniya buba ꞌilhunatsꞌoꞌai-i, ꞌi ooghu yatisduk. ꞋEt yun kꞌut Galatia ꞌilhunahodulh, ntsꞌenꞌa butoh budásniꞌ daꞌ, ꞌet nohni cha ꞌet whuz unꞌa ndóhtꞌen. 2ꞋEt ꞌilhoghun ꞌahli whe daltsuk atꞌen be hoonzooꞌ ꞌahja, ꞌet lisman ꞌudechoo dzin, ꞌi whuloh lhadáhle. ꞋEt de nohtsꞌóozusya de, ꞌet ꞌoh whuya whudizulh-un ꞌaw ꞌilhunaꞌóhꞌalh huba lheꞌhóotꞌoh. 3Ndet nohtsꞌóozusya de, ꞌet nahootásꞌalh noheꞌdustlꞌus ꞌi be mbene la nohkaꞌ nahzun, ꞌenne ndi sooniya Yakꞌusda oochꞌeꞌne buba bugha ínahꞌai-i, ꞌi bulh Jerusalem tsꞌe ꞌubutisꞌalh. 4ꞋEt si cha whuz tisyalh huba hootázooꞌ de, ꞌet de ꞌenne sulh hútidulh.
Paul datínelh
5ꞋEt yun kꞌut Macedonia ꞌet ꞌoh whuya lhutísyalh. ꞋEt ꞌoh whuya lhusúsya de, ꞌet nohtsꞌu tísyalh. 6ꞋAtsul whuba tilah ꞌet nohzih oosdaꞌ kꞌus khit duwhulyiz tilah nohzih oosdaꞌ. ꞋEt whe la ntsꞌe la tisyalh tsꞌe, nohni sla oohtꞌen ha. 7ꞋOh whuya usyalh de, ꞌaw nohkꞌulh túzisyal. ꞋEt huwa ꞌaw ꞌandit nohoosꞌen ꞌaitꞌoh. ꞋEt hoontsꞌi sMoodihti usunínzun de, ꞌet ꞌatsulyaz nducha nohzih usdaꞌ. 8ꞋEt hoontsꞌi dzin Pentecost, ꞌet whutsꞌun keyoh Ephesus tisdalh. 9ꞋEt dati kꞌus úncha-i, ꞌi sba dáhaidahankez léꞌhooja, ꞌinkꞌez lhane schꞌaz ditnine hoonli.
10ꞋEt Timothy nohghu ninya de, ꞌaw hoonli whe lhníljut whe nohzih oodaꞌ. ꞋEt tsꞌiyawh nohni nohba ꞌuhoontꞌoh. Si skꞌunꞌa neMoodihti be ꞌutꞌen kꞌoh neꞌutꞌen ꞌet huwa. 11ꞋEt huwa nohni nohtoh ꞌen ꞌantsꞌi nohba ooleꞌ junih. ꞋEt hoontsꞌi oodzi dizghel whe stsꞌun nátoolhꞌaꞌ. Si ꞌinkꞌez lhulhutsinke tubulh ooba tsꞌilhꞌi.
12ꞋEt neulhutsin Apollos ꞌen ghun ꞌunohdutásnelh. ꞋAndit neulhutsinke bulh nohtsꞌun tóoyaꞌ ꞌet ooba hukwaꞌ nuszun, ꞌet hoontsꞌi ꞌaw hukwa lheꞌnizun. ꞋEt huwa saꞌ howu bulh yásduk. ꞋEt hoontsꞌi ntsꞌowhuya whudizulh-un ndet ooba hoonzoo de, ꞌet de nohtsꞌun tóoyaꞌ.
Soo cho huwahli
13ꞋEt soo cho huwahli. Be ꞌalha ꞌuhoontꞌoh-i, ꞌi be whudutsꞌo whe sahyin. Nohni nohdzi hóoni whe ꞌet núdolhyaꞌ. Ulhtusne oohleꞌ. 14Ndai la ooghahna-i, ꞌi tsꞌiyawh be nékꞌetsꞌinsiꞌ-i bulh oolhꞌen.
15ꞋEt sulhutsinke soo cho ꞌunohdusni. Tꞌeóonáhzun Stephanas ꞌinkꞌez ooyoh dilhtsꞌine, ꞌenne yun kꞌut Achaia ꞌet ꞌudechoo ooba ꞌalha ꞌuhoontꞌohne huzdliꞌ. ꞋInkꞌez tꞌeóonáhzun ntsꞌenꞌa la Yakꞌusda oochꞌeꞌne buba néꞌhutitꞌen-un huwa ꞌuhududulya. 16ꞋEt huwa nohdutásnelh, nduntꞌohne ꞌinkꞌez mbene la soo cho hoolhtus whe nebulh ꞌútꞌenne, ꞌenne nohnichꞌoh butlꞌáꞌ dudulhye. 17Nkedaꞌ Stephanas, Fortunatus, ꞌinkꞌez Achaicus, ꞌenne sgho nindil daꞌ, ꞌet huwa whunúsni. Ndai la sghá lhikulh-i ꞌenne bugha sgha nínkat. 18ꞋEt whula gha tsꞌe sichꞌoh syughi ꞌinkꞌez nohnichꞌoh nohyughi cha ꞌenne bugha do naꞌuja. ꞋEt huwa nduntꞌohne, ꞌenne tsꞌihꞌun unꞌa neꞌboolhꞌen.
Yakꞌusda yé unzoo-i nohbulh óotꞌeꞌ
19ꞋEt yun kꞌut Asia dunne ꞌilhunahodulh-un, ꞌenne cha tsꞌiyawh hadih nohuhútni. Aquila, Priscilla, ꞌinkꞌez duyoh Yakꞌusda ba ꞌilhunaoodúlhne, ꞌenne cha soo cho hadih nohuhútni. 20Tsꞌiyawh neulhutsinke, ꞌenne cha hadih nohuhútni. Lubeshi yit nalhudahtsꞌoos. ꞋI be hadih lhudahtni.
21Si Paul sichꞌoh sla be ꞌukꞌu nusúsguz. ꞋI be hadih nohdúsni.
22NeMoodihti Jesus Christ mbene la ꞌen yukꞌelhísiꞌ-un, ꞌen Yakꞌusda ye huske-i be ookꞌehóotaltsꞌulh. O sMoodihti ꞌa cho netsꞌínyalh!
23NeMoodihti Jesus Christ ye unzoo-i nohbulh óotꞌeꞌ ꞌet za nohba hukwaꞌ nuszun.
24Be nóhkꞌesiꞌ-i Christ Jesus ꞌen gha, ꞌi tsꞌiyawh nohbulh óotꞌeꞌ hukwaꞌ nuszun. ꞋEt ndo honeh.
Currently Selected:
1 Corinthians 16: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.