2 Corinthians 13
13
Paul buba ndo ꞌuntꞌoh-un, Yakꞌusda yutlꞌa hónꞌai
1ꞋEt ꞌawet whulh tat nohtsꞌu nátisdalh. Nane kꞌus tane ꞌenne bunalh neꞌwhutꞌen, tsꞌiyaitsuk nohni nohtoh, di be ꞌukꞌehootꞌaih-i, ꞌenne bughuni gha tsꞌiyantsuk lhaóodutanelh. 2Whutsodaꞌ nohdasniꞌ-un whusdloh ꞌet hoontsꞌi nohzih susda hukwꞌunꞌa whulh nat nohtsꞌo kꞌeꞌusges ꞌinkꞌez nanohdúsni, mbene la lubeshi ꞌalhꞌen ꞌinkꞌez ꞌonghohne tubulh nanohdúsni whe dzoh notizut-un, ꞌaw hukwꞌut dodóyaꞌ ꞌaitꞌoh wheꞌ hoontꞌoh. 3Si sgha Christ yalhduk tꞌewhuntáhzin hukwaꞌ nahzun, ꞌinka whuz unꞌa nohdásniꞌ. ꞋInkꞌez ꞌalhaꞌ ꞌen ꞌuntꞌoh nohtsꞌun telhítsun, ꞌinkꞌez nohtoh ꞌukꞌenus úlhtus-un ꞌuntꞌoh. 4ꞋEt Christ ꞌen ye tésutsit-i whe tulalhgus kꞌehúyilhti, ꞌet hoontsꞌi Yakꞌusda yé ulhtus-i, ꞌi gha khuna. ꞋInkꞌez wheni cha, ꞌet whuz unꞌa za ooyuzdúltsꞌiꞌ hoontsꞌi tetsꞌutsun. ꞋEt hoontsꞌi ndi Yakꞌusda yé ulhtus nohbulh ꞌuhoontꞌoh-un, ꞌet be tsꞌukhuna. ꞋEt huwa Christ ꞌen bulh tsꞌótinalh.
5Naꞌooduzúlhdzih! Ndi bé ꞌalha ꞌuhoontꞌoh-i, ꞌi bulh ꞌáhtꞌoh tilah, nohnichꞌoh naꞌdunulhꞌen. Jesus Christ nohyó ꞌuntꞌoh, ꞌaw tꞌéoonuzáhzun eh? ꞋAw soo cho tꞌéoonuzáhzun de, ꞌet de ꞌet tilah nꞌún tizkatne ꞌahli. 6ꞋEt hoontsꞌi ꞌaw nꞌún tizkatne ꞌaw ꞌenne iloh ꞌutsꞌintꞌoh. Soo cho nducha tꞌéoonáhzun.
Nohni soo tsꞌihꞌun unꞌa lhadíntꞌohne tihle, ꞌet whuz unꞌa nohba tenazdudli
7ꞋEt hoontsiꞌ hoontsiꞌ-un ꞌutihtꞌelh, ꞌet whuchꞌa, Yakꞌusda tsꞌun nohba tenadusdli. ꞋAw nohba natsꞌoodududzi hukwꞌunꞌa iloh tenadusdli. ꞋEt hoontsꞌi nohni hoonzoo kꞌoh tsꞌe ꞌutihtꞌelh, ꞌet whuz unꞌa nohba tenadusdli, ꞌet hoontsꞌi ꞌantsꞌi ꞌún tizkatne hukwꞌunꞌa nohba leꞌ tsꞌintꞌoh hoontsꞌi. 8ꞋEt ndi khuni ꞌalhaꞌ ꞌuntꞌoh-i, ꞌaw be tsꞌílhtus-i lhtsꞌítꞌih whe oodulhyoh ꞌuzdooniꞌ ꞌaitꞌoh. ꞋEt kꞌus khuni ꞌalhaꞌ ꞌuntꞌoh-i, ꞌi za howu yatsꞌoolhduk. 9ꞋEt wheni tetsꞌutsun ꞌinkꞌez nohni ulhtusne ꞌahli de, wheni tsꞌuhóontꞌiꞌ. ꞋInkꞌez soo tsꞌihꞌun unꞌa lhadíntꞌohne tihle, ꞌet whuz unꞌa nohba tenazdudli. 10ꞋEt huwa nohchꞌoh ꞌústꞌoh whe whuz unꞌa nohtsꞌó kꞌeꞌisguz. ꞋEt nohbulh ꞌústꞌoh de, ndet whe dune ando ꞌustꞌoh ꞌet neMoodihti sgha óoninꞌai, ꞌi be ꞌaw nohdáchꞌe neꞌdoosniꞌ ꞌaitꞌoh. Ndi be ꞌudedo ꞌustꞌoh, ꞌi be Yakꞌusda ba ulhtus tihle. ꞋI ꞌaw be nóhundosdaꞌ ꞌaitꞌoh.
Nohbulh ꞌúhotꞌeꞌ-un
11Sulhutsinke ꞌudekꞌez nohdusni. Whunólhni! Soo tsꞌihꞌun unꞌa lhadulyane tihleh. Yakꞌusda kꞌenaíninꞌane tihleh. ꞋIlho za noheni tihleh. Whudizghel-i, ꞌi be ndi yun kꞌut dúlhtsꞌi. ꞋInkꞌez Yakꞌusda, mbe nekꞌensiꞌ-un, ꞌinkꞌez nedzi bé dizghel-i negha íninꞌai-un, ꞌen nohbulh óotꞌeꞌ.
12ꞋEt lubeshi ooghu hooloh-i be nalhudahtsꞌoos. 13Yakꞌusda oochꞌeꞌne nezih dilhtsꞌine, ꞌenne cha tsꞌiyawh hadih nohuhútni.
14Jesus Christ neMoodihti ye unzoo-i, ꞌinkꞌez Yakꞌusda ye nekꞌensiꞌ-i cha, ꞌinkꞌez Ndoni bulh ꞌilhoh tsꞌindli-un, ꞌet ꞌi tsꞌiyawh nohbulh ꞌúhotꞌeꞌ. ꞋEt ndo honeh.
Currently Selected:
2 Corinthians 13: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.