1 Thessalonians 4
4
Lubeshi bughu hooloh ꞌet butsꞌu hukwaꞌ ninzun
1ꞋEt huwa neulhutsinke, ndi ꞌudekꞌez khuni be nohbulh yátsꞌulhduk-i, neghuni úlhchoot whe Yakꞌusda hótꞌeꞌ ha tóohdilh nohtsꞌútni inleꞌ. ꞋEt doo cha za whuz unꞌa za Jesus neMoodihti, ꞌen be khuni ulhtus-i be nohtsꞌutni, tube cho lhanꞌun te oohzooꞌ, ꞌinkꞌez whuz unꞌa oohtꞌeꞌ. 2Tꞌeoonuhzun neMoodihti Jesus khuni netlꞌaídanla, ꞌi tsꞌiyawh nohtsꞌudaniꞌ.
3ꞋEt Yakꞌusda ba ꞌudun nenohninlane, lhghu lhdúlhtsꞌi whe lhulh nintaꞌoohtꞌen junih, ꞌet whuz unꞌa Yakꞌusda nohba hukwaꞌ ninzun. 4Tsꞌiyawh ꞌilhoghun ꞌahli nohyustꞌe ꞌi Yakꞌusda ba ꞌudun neóolhtelh hubaꞌ hoontꞌoh ꞌinkꞌez soo cho ooghohleꞌ. 5Nohyustꞌe hoolhtus whe lubeshi tsꞌu nintꞌi, ꞌet ꞌaw whuz unꞌa ꞌahtꞌoh iloh! ꞋUdun yun kꞌut whutꞌenne, Yakꞌusda tꞌenuszunne, ꞌaw ꞌenne bukꞌunꞌa iloh ꞌahtꞌoh. 6Khun te neulhutsin unline neghá whunistꞌen whe buꞌat bulh nintaꞌtsꞌootꞌen junih. ꞋEt whuz unꞌa za whutsodaꞌ nohdasniꞌ. ꞋInkꞌez doo cha za nohdusni, neMoodihti ꞌen za ndóohoontꞌoh-un huwun kꞌútneh-un ꞌuntꞌoh. 7Yakꞌusda ꞌaw ꞌutꞌen untsiꞌ-i ꞌuztilhꞌelh huba iloh uzdoojih ha nekaꞌ daniꞌ ꞌet huwa. ꞋEn ba lubeshi ooghu hoolohne ꞌuztileh ha nekaꞌ daniꞌ. 8ꞋEt huwa mbe la ndi khuni hidotsꞌo hukwa lheꞌhunizun, ꞌaw dune chꞌaz nultꞌine lhuhiloh. Yakꞌusda chꞌaz nultꞌine za ꞌuhintꞌoh. ꞋInkꞌez Yakꞌusda Ndoni ꞌen cha negha ininꞌai-un unli.
Ndi yun kꞌut whutꞌenne, ꞌenne bunalh tsꞌihꞌun unꞌa toohyaꞌ
9Lhulhutsinke yé lhkꞌesiꞌ-i, ꞌi ghun ꞌaw nohtsꞌo kꞌeꞌoosges huba lheꞌhootꞌoh, Yakꞌusda dichꞌoh whunohodalhꞌeꞌ lhkꞌeoohsiꞌ ha. 10ꞋEt whuz unꞌa ndahtꞌen tsꞌiyawh neulhutsinke Macedonia yun kꞌut dilhtsꞌine, ꞌenne butsꞌun. Neulhutsinke khuni ulhtus-i be nohtsꞌutni, lhanꞌun te lhkꞌeoohsiꞌ.
11ꞋInkꞌez cha, nánilhtsulyaz yun kꞌut dólhtsꞌiꞌ, ꞌinkꞌez nohꞌeꞌutꞌen za noolhꞌen. Nohnichꞌoh nohla be oohtꞌen. ꞋEt whuz unꞌa edóhtꞌen nohtsꞌudániꞌ. 12ꞋEt whuz unꞌa ndahtꞌoh de, ꞌet de mbene la ooba ꞌalhaꞌ lheꞌhootꞌohne, ꞌenne bunalh soo tsꞌihꞌun unꞌa toohyaꞌ. ꞋEt whe ꞌaw hoonliyaz etsꞌuhólhdoh ꞌaitꞌoh.
Jesus Christ whusanatidalh-un, ꞌet whutꞌaniznintan
13ꞋEt sulhutsinke, ndunne ꞌudaꞌ nanistezne,#4:13 Yaidlane ni whe ꞌutni ꞌenne bughun tꞌewhuntihzeh nohba hukwaꞌ nuszun. Ooba ꞌalhaꞌ lheꞌhootꞌohne ꞌaw buba whula nalhuhóoꞌoh hukwꞌunꞌa tsꞌodi hinli, doo ka si whuz unꞌa ndohtꞌeꞌ. 14Jesus dazsai ꞌinkꞌez dunadija-un, ꞌet neba ꞌalha ꞌuhoontꞌoh de, ꞌet whuz unꞌa za mbene la Jesus ooba ꞌalhaꞌ yintꞌoh whe yahadlane, ꞌenne tsꞌiyawh Yakꞌusda Jesus bulh whusanahutidulh. 15ꞋInkꞌez neMoodihti ooghuni be njan nohdusni, neMoodihti neka whusanatidalh-un, ntsꞌenꞌa la dawhutanelh-un, mbene la ꞌawhuz khunane, ꞌet ndunne nanistezne, ꞌenne ꞌaw butso uztoodilh ꞌaitꞌoh. 16ꞋEt neMoodihti dichꞌoh soo ꞌultus-un hutiyih, ꞌinkꞌez lizas ꞌukꞌenus diztiꞌ-un, ꞌen cha dutinelh, ꞌinkꞌez Yakꞌusda ba be tsꞌujih-i, ꞌi cha ꞌudutinelh. ꞋEt whuz unꞌa Jesus Christ yakꞌuz tsꞌe whusanatidalh. ꞋInkꞌez ndunne Jesus Christ ooba ꞌalhaꞌ yintꞌohne, ꞌet whuz unꞌa yaidlane, ꞌenne cho dunahudutádulh. 17ꞋEt hukwꞌelhꞌaz wheni ꞌawhuz khunane, ꞌinkꞌez ndunne cha, ꞌalhgoh ꞌaw lhtsꞌodutílhꞌel whe khun beꞌ ne-eduzgooh leꞌ tsꞌuja whe ndo kwꞌus toh ꞌalhgoh neMoodihti tazai ooduzdutádulh. ꞋEt whuz unꞌa ꞌilhiz wheni neMoodihti bulh ꞌúztitꞌelh. 18ꞋEt huwa ndi khuni ꞌi be tsꞌiyawh kꞌúnulhunoohtꞌah.
Currently Selected:
1 Thessalonians 4: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.