1 Thessalonians 3
3
Buba ꞌalha ꞌuhoontꞌoh-un, ꞌet huwu ninli
1ꞋEt huwa ꞌaw ꞌon ꞌun whulh tsꞌooyin ꞌaitꞌoh suliꞌ. ꞋEt neba hoonzoo nídzun whe whenichꞌoh keyoh Athens íkeꞌ. 2ꞋInka ndun neulhutsin, Timothy Yakꞌusda ba neꞌutꞌen-un, ꞌen nohtsꞌu whe tsꞌalhꞌaꞌ. ꞋEn ꞌuntꞌoh Christ ooghuni unzoo-i ooghá tsꞌana nela ꞌutꞌen-un. ꞋEn gha nohba ꞌalha ꞌuhoontꞌoh-un, ꞌet whuz unꞌa ꞌilhiz ooleꞌ hukwꞌunꞌa za ꞌutihtꞌelh, ꞌinkꞌez dughuni be nus nohnilhtꞌi.
3ꞋEt njan dune dzoh nuneulhdeh-un whe nohba dzoh ooleꞌ junih. Nohnichꞌoh tꞌeoonahzin njan nebaꞌ hóolya wheꞌ hoontꞌoh. 4ꞋEt nohzih íkeꞌ whe dzoh nuztideh wheꞌ hoontꞌoh nohdátniꞌ inleꞌ. ꞋEt whuz unꞌa ꞌuhooja ꞌinkꞌez kꞌan ꞌet tꞌeoonahzun. 5ꞋEt huwa si cha ꞌaw ꞌon ꞌun whulh óosyin ꞌaitꞌoh. ꞋEt huwa Timothy, ꞌen nohtsꞌu whesꞌaꞌ whe be ꞌalha ꞌuhoontꞌoh-i ghun dahtꞌoh tsꞌiyawh neba nahootaꞌalh. Doo ka si mbe la neóolhdzih-un, nohni cha tilah nohóolhdzai de, ꞌet de ne-eꞌutꞌen ꞌantsꞌet ꞌutitꞌelh.
Timothy daja nedaniꞌ-un, ꞌet huwa nedzi hoontꞌiꞌ
6ꞋEt ꞌandit Timothy nohtsꞌu ha nája. ꞋInkꞌez dahtꞌoh la ꞌet hukwꞌun nebulh nahoolnuk. Ndi be ꞌalha ꞌuhoontꞌoh-i, be nekꞌesiꞌ-i cha, ꞌet tsꞌiyawh nawhusꞌai. ꞋEt netsꞌun ahzoo ꞌinkꞌez wheni netihꞌelh hukwaꞌ nahzun, ꞌet cha hukwꞌun nebulh nahoolnuk. ꞋInkꞌez wheni cha whuz unꞌa za nohuztiꞌelh hukwaꞌ ꞌuzninzun. 7ꞋEt huwa neulhutsinke ꞌuyoonne gha dzoh nutsꞌudeh ꞌinkꞌez dzoh nebulh ꞌuhoontꞌoh, ꞌet hoontsꞌi be ꞌalha ꞌuhoontꞌoh-i ahtꞌi, ꞌet ꞌi be nedzi do naꞌuja. 8ꞋEt neMoodihti ꞌen ba ulhtus whe núdulhya de, ꞌet tsꞌukhuna. 9Ndai be tsꞌoohoontꞌiꞌ-i, ꞌi be tsꞌiyawh Yakꞌusda but nohba tsꞌuhoontꞌiꞌ? Ntsꞌenꞌa suba soo ꞌulcho-i be Yakꞌusda nohba musi uzdóniꞌ? 10Be ꞌalha ꞌuhoontꞌoh-i ahtꞌi-un, ndet la tsꞌihꞌun tꞌeoonuzahzun ꞌet tsꞌiyawh nohba lhatsꞌodutileh. ꞋEt huwa ꞌulhdzis ꞌinkꞌez dzenis ꞌi bulh tube Yakꞌusda ootsꞌo hukwaꞌ tsꞌutni. Nohtsꞌutiꞌelh hukwaꞌ tsꞌuninzun.
Yakꞌusda ba ꞌilhunaoodulhne buba tenahududli
11ꞋEt Yakꞌusda ꞌen dichꞌoh neBá, ꞌinkꞌez neMoodihti Jesus Christ, ꞌen nohtsꞌun nétoolhꞌaꞌ ha tenazdudli. 12ꞋInkꞌez ntsꞌenꞌa whe nohkꞌetsꞌinsiꞌ, ꞌet whuz unꞌa neMoodihti ꞌen gha tube cho lhkꞌuz te lhkꞌehsiꞌ. ꞋInkꞌez ꞌuyoonne cha ꞌenne tsꞌiyawh nducha bukꞌehsiꞌ. 13ꞋEt whe neMoodihti Jesus Christ ꞌinkꞌez oochꞌeꞌ unline, ꞌenne tsꞌiyawh whusanahidil de, ꞌet de la neBá, Yakꞌusda, ꞌen nalh, ꞌaw nohdzi be ye nohkꞌehoꞌalh-i hootaloh, ꞌinkꞌez nohlubeshi cha hootaloh.
Currently Selected:
1 Thessalonians 3: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.