Iosua 1
1
O le Tofia o Iosua
1‘Ua mavae le oti o Mose le ‘au‘auna a le ALI‘I, ‘ona fetalai mai ai lea o le ALI‘I ‘iā Iosua le atali‘i o Nuno, o lē na ‘au‘auna ‘iā Mose, o lo‘o fa‘apea mai, 2“‘Ua oti Mose la‘u ‘au‘auna, o lenei fo‘i ‘inā e tula‘i atu ia, ‘ia sopo‘ia atu Ioritana lenā, o oe, ‘atoa ma lenei nu‘u uma, e ō i le nu‘u ‘ua ‘ou foa‘iina atu ai ‘iā te i latou, o le fānauga a Isaraelu lava. 3O mea uma lava e solia o e ‘outou alofivae, ‘ou te foa‘iina atu ai ‘iā te ‘outou, e pei ‘ona ‘ou fai atu ai ‘iā Mose.#Teu 11.24-25 4E āfua i le vao ma Lepanona lenā, e o‘o atu i le vaitafe tele, o le vaitafe o Eufirate, o le nu‘u uma o sa Hetī, e o‘o atu fo‘i i le sami tele, o le mea e goto ai le la, e fai ia ma o ‘outou tuā‘oi. 5E le tu mai se tagata e tete‘e ‘iā te oe i aso uma o lou ola; e pei ‘ona ‘ou i ai ‘iā Mose, e fa‘apea ‘ona ‘ou i ai ‘iā te oe, ‘ou te lē tu‘ua lava oe, ‘ou te lē tu‘ulafoa‘i lava ‘iā te oe.#Teu 31.6, 8; Epe 13.5 6‘Ia e fa‘amalosi ma loto tele; auā ‘e te tofia mo lenei nu‘u le lau‘ele‘ele na ‘ou tautō ai i o latou tamā e foa‘i atu ‘iā te i latou.#Teu 31.6, 7, 23 7Tau ‘ina e fa‘amalosi, ma ia matuā loto tele lava; ‘ia e ‘ana‘ana e fai e tusa ma le tulafono uma na fai atu ai Mose la‘u ‘au‘auna ‘iā te oe; ‘aua ‘e te alu ‘ese ai i le itū taumatau po o le itū tauagavale, ‘ina ‘ia manuia ai oe i mea uma ‘e te alu i ai. 8E le te‘a i lou gutu le tusi o lenei tulafono, a ‘ia mafaufau i ai i le ao ‘atoa ma le po, ‘ina ‘ia e ‘ana‘ana e fai e tusa ma mea uma ‘ua tusia i ai; ‘ona manuia ai lea ‘iā te oe o lou ala, ‘ona e manuia ai lea. 9‘Ou te le‘i fai atu ‘ea ‘iā te oe? ‘Ia e fa‘amalosi, ma loto tele; ‘aua ‘e te fefe, ‘aua ‘e te mata‘u; auā o le ALI‘I lou Atua o lo‘o ‘iā te oe i mea uma ‘e te alu i ai.”
‘Ua Fa‘atonu e Iosua le Nu‘u
10‘Ona fai atu ai lea o Iosua i le ‘au faipule o le nu‘u, o lo‘o fa‘apea atu, 11“‘Ia ‘outou feoa‘i i le toagalauapi, ma fai atu i le nu‘u, ‘ia fa‘apea atu, ‘‘Inā sauniuni ia o a ‘outou oso, auā e toe aso tolu ‘ona ‘outou sopo‘ia atu ai lea o Ioritana nei, ma ō atu e fai mo ‘outou le nu‘u ‘ua foa‘iina mai e le ALI‘I lo ‘outou Atua ‘iā te ‘outou e fai mo ‘outou.’”
12‘Ona fai atu lea o Iosua i sa Reupenā, ma sa Katō, ma le tasi vaega o le itū‘āiga o Manase, ‘ua fa‘apea atu,#Nume 32.28-32; Teu 3.18-20; Iosu 22.1-6 13“‘Ia manatua le ‘upu na poloa‘i atu ai Mose le ‘au‘auna a le ALI‘I ‘iā te ‘outou, o lo‘o fa‘apea atu, ‘‘Ua avatua e le ALI‘I lo ‘outou Atua le mālōlōga ‘iā te ‘outou; ma ‘ua foa‘iina mai e ia lenei nu‘u ‘iā te ‘outou.’#Nume 32.20-28 14O a ‘outou avā, ma a ‘outou tamaiti, ma a ‘outou manu, latou te nonofo i le nu‘u na foa‘iina atu e Mose ‘iā te ‘outou i le itū mai o Ioritana; a o ‘outou, tou te ō atu i luma o ‘outou uso, o sauni i le tau‘a, o tagata matuā malolosi uma lava, e fesoasoani ‘iā te i latou 15se‘ia avatua e le ALI‘I le mālōlōga i o ‘outou uso, e pei ‘ona avatua ‘iā te ‘outou, ma ‘ua faia fo‘i mo i latou le nu‘u ‘ua foa‘iina mai e le ALI‘I lo ‘outou Atua ‘iā te i latou; ‘ona toe fo‘i mai ai lea o ‘outou i le nu‘u ‘ua fai mo ‘outou, na foa‘iina mai e Mose le ‘au‘auna a le ALI‘I ‘iā te ‘outou, i le itū mai o Ioritana, i le mea e alu a‘e ai le la, ma ‘outou mau ai.”#Teu 3.20; Iosu 22.4
16‘Ona latou tali mai ai lea ‘iā Iosua, ‘ua fa‘apea mai, “O mea uma ‘e te fai mai ai ‘iā te i matou, matou te faia lava; o mea uma fo‘i ‘e te ‘a‘auina atu i ai i matou, matou te o lava i ai; 17e pei ‘ona matou fa‘alogo ‘iā Mose i mea uma, e fa‘apea ‘ona matou fa‘alogo ‘iā te oe; tau ‘ina ‘ia ‘iā te oe le ALI‘I lou Atua, e pei ‘ona i ai o ia ‘iā Mose. 18‘Ai se tagata e tete‘e atu i lau pule, ma le lē fa‘alogo i au ‘upu i mea uma ‘e te fai mai ai ‘iā te ia, e fasiotia o ia; tau ‘ina e fa‘amalosi, ma loto tele.”#Teu 17.12
Currently Selected:
Iosua 1: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.