Luka Fa‘atomuaga
Fa‘atomuaga
O ai Luka? O Luka o le tasi lea o tagata sa fesoasoani tele ‘iā Paulo i le galuega fa‘atala‘i (Kolo 4.14; 2 Timo 4.11; File 1.24). E i ai le talitonuga sa tusia e lenei tagata ia tusi e lua ma ‘ua fa‘aigoa le Evagelia i lona igoa ma le tusi o le Galuega o le ‘Au ‘Aposetolo (Galu 1.1-2). Sa tusia e Luka nei tusi e lua e fesoasoani atu ai i tagata o nu‘u ‘ese o ē ‘ua liliu mai i le talitonuga fa‘a-Kerisiano. I le Evagelia sa ia tusia, e manino mai ai le ‘autū o Iesu mo tagata uma e lē na o tagata Iutaia. O Iesu o le fa‘aola o le lalolagi ma o se tagata sa ia ‘amana‘iaina tagata uma ‘ae maise lona alofa i tagata agasala, le ‘au matitiva ma so‘o se tagata fa‘atauva‘a. (7.36-50, 13.6-9, 19.1-10, 18.10-14, 23.40-43).
I totonu o lenei Evagelia e atagia mai ai, e i ai tala tusitusia sa tusia lava e Luka ia, e aunoa ma le toe maua i isi Evagelia e pei o le talanoaga a le agelu ma Maria, o le malaga mai o le ‘au leoleo mamoe e asiasi mai ‘iā Iesu i le fale manu, a o tamaitiiti Iesu sa a‘oa‘o atu o ia i totonu o le malumalu, o le tala i le Samaria agalelei ma le atali‘i fa‘amaumau ‘oa. O nisi o manatu taualoa e atagia mai lenei tusi o le tāua tele o le tatalo, galuega a le Agaga Pa‘ia, o galuega lelei sa fai e fafine i le galuega fa‘atala‘i ma o le Atua lava e fa‘amāgaloina agasala.
E i ai le manatu o le ‘au popoto i le ‘upu a le Atua o le tusi lenei sa tusia i le vaitaimi po o le vā o le tausaga 70-80, i le vaitausaga lava o le Ali‘i (Anno Domini)
O le Fa‘asologa o Matā‘upu:
‘Upu tomua 1.1-4
Fānau mai o Ioane ma Iesu 1.5—2.52
O galuega tala‘i a Ioane le Papatiso 3.1-20
O le papatisoga o Iesu ma fa‘aosoosoga 3.21—4.13
Galuega fa‘atala‘i a Iesu i Kalilaia 4.14—9.50
O le aga‘i mai Kalilaia i Ierusalema 9.51—19.27
Taimi fa‘ai‘ui‘u o Iesu ma lona maliu i Ierusalema 19.28—23.56
O le toetū o Iesu ma lona afio a‘e i le lagi 24.1-53
Currently Selected:
Luka Fa‘atomuaga: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.