Iopu 41
41
O toe Afioga a le Atua ‘iā Iopu
1“‘E te mafaia ‘ea ‘ona sisi o leviatana i se mātau,#Sala 74.14; 104.26; Isai 27.1
pe saisai lona laulaufaiva i se maea?
2‘E te mafaia ‘ea ‘ona tu‘u se maea i lona isu?#2 Tu 19.28
pe tui lona ‘auvae i se mātau?
3Na te fa‘ateleina ‘ea ni tatalo ‘iā te oe?
pe tautala fa‘aoleole ‘iā te oe?
4Lua te osi ‘ea se feagaiga ma ia?#Eso 21.6
‘E te ‘avea ‘ea o ia e fai ma ‘au‘auna e fa‘avavau?
5Lua te ta‘a‘alo ‘ea ma ia e pei o se manulele?
pe ‘e te nonoa ‘iā te ia mo ‘outou teine?
6Pe fai a‘i ‘ea se tausamiga e uō?
Latou te tufatufa atu ‘ea ‘iā te ia i ē fa‘atau‘oa?
7‘E te mafaia ‘ea ‘ona velosia ‘ia lilo lona pa‘u i mea ma‘ama‘ai?
ma lona ulu i tao so‘a i‘a?
8Tu‘u atu ia lou lima i luga ‘iā te ia,
‘ia manatua le tau‘a; ‘e te lē toe faia.
9Fa‘auta, e fai fua le fa‘amoemoe e maua ia;
e lē pa‘ū ‘ea fo‘i se tasi i le va‘ai atu ‘iā te ia?
10E leai sē na te fa‘amalosi e fa‘ate‘i ‘iā te ia;
o ai fo‘i sē tu mai i o‘u luma?
11O ai sē na mua‘i ‘aumaia ni mea ‘iā te a‘u,#Sala 24.1; Roma 11.35
‘ou te toe taui atu ai?
O mea uma lava o i lalo o le lagi o a‘u mea ia.
12“‘Ou te lē natia ona itū tino ma le tala i lona malosi,
ma le matagofie o lona ‘ofutau.
13O ai sē susu‘e lona ‘ofu aupito i tua?
O ai sē o‘o atu i ona atu nifo e lua?
14O ai sē tatala puipui o lona gutu?
E mata‘utia ona atu nifo fa‘ata‘ali‘oli‘o.
15E ma‘eu le malosi o ona talitā,
‘ua punimau, i le fa‘amaufa‘ailoga.
16‘Ua soso‘o le tasi i le tasi,
e lē sao le savili i o latou vā.
17‘Ua fepi‘ita‘i le tasi i le tasi, ‘ua feso‘ota‘i,
‘ua lē mafai ‘ona fa‘ate‘a ‘ese‘ese.
18O ona mafatua ‘ua pupula ai le malamalama;
o ona mata fo‘i e pei o laumata o le taeao.
19E ō atu sulu a‘i lona gutu,
e oso mai ai aloiafi.
20E alu atu le asu a‘i ona pogaiisu e pei o se pani ‘ua tapili i ai le afi,
po o se ‘ulo ‘ua vevela.
21O lana mānava e mū ai malala,
e alu atu fo‘i le afi mumū a‘i lona gutu.
22E i ai le malosi i lona ua,
e sa‘a fo‘i lē mata‘u i ona luma.
23‘Ua maopoopo le ‘a‘ano o lona manava;
‘ua ma‘a‘a lea, e lē mafa‘agae‘etia.
24‘Ua ma‘a‘a lona fatumanava e pei o se ma‘a,
‘ua ma‘a‘a lava e pei o se ma‘aolo aupito i lalo.
25A tula‘i o ia, ‘ona fefefe ai lea o toa;
‘ua sesē i latou ‘ina ‘ua mata‘utuia.
26E taututa le pelu o lē fa‘asaga atu ‘iā te ia, fa‘apea fo‘i le tao,
ma le u fanafana ma le tao so‘a i‘a.
27‘Ua tusa ‘iā te ia le u‘amea ma le ‘au o saito,
o le ‘apamemea o le la‘au pala lea.
28E lē sola o ia i le u fanafana,
o ma‘a o le ma‘atā e ‘avea ia ma tagutugutu o saito ‘iā te ia.
29‘Ua tusa ‘iā te ia le uatogi ma tagutugutu o saito;
‘ua ia ‘ata fo‘i i le apoapo o le tao.
30‘Ua i ona lalo fāsi ipu ‘omea ma‘ama‘ai;#Isai 28.27; 41.15
na te fofolaina mea matuitui i luga o le palapala.
31‘Ua ia fa‘apupuna le moana e pei o se ‘ulo;
‘ua ia fai le sami e pei o se ipu u‘u.
32‘Ua ia fa‘apupula le ala ‘ua na tuana‘i;
e manatu ai se tasi ‘ua ulusinā le moana.
33E leai se tasi e tusa ma ia i luga o le lau‘ele‘ele,
‘ina ‘ua faia ‘ua leai sona mata‘u.
34‘Ua va‘ai ifo o ia i mea maualuluga uma;#Iopu 28.8
o ia o le tupu o manu fe‘ai uma lava.”
Currently Selected:
Iopu 41: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.