Sapakuka 2
2
O le Valo‘aga i le Malaia o Kaletaia
1‘Ou te tu i le mea ‘ou te leoleo ai, ‘ou te tu fo‘i a‘u i le ‘olo, ‘ou te va‘ava‘ai fo‘i ‘ina ‘ia ‘ou iloa pe se a se mea e fetalai mai ai o ia ‘iā te a‘u pe se a fo‘i se mea ‘ou te tali atu ai i la‘u finauga.#Isai 21.8; Eseki 33.2
2‘Ua tali mai fo‘i le ALI‘I, ‘iā te a‘u, ‘ua fa‘apea mai: ‘Ia e tusi le fa‘aaliga, ‘ia e togitogi i papa, ‘ina ‘ia momo‘e o ia lē na te faitauina. 3Auā o le fa‘aaliga ‘ua tu‘uina mo ona aso ‘ua tu‘upoina, ‘ae tautala mai pe a o‘o i le i‘uga, e le pepelo lava; e ui lava ‘ina tuai mai, a ‘ia fa‘atalitali pea i ai auā e o‘o mai lava, e le fa‘atuai mai.#Epe 10.37 4Fa‘auta, o lē na fa‘afefeteina e le tonu lona toto i totonu ‘iā te ia; a o lē ‘ua amiotonu e ola ia i lona fa‘atuatua.#Roma 1.17; Epe 10.38; Ioane 3.36
O le Malaia o i Latou e Fai Mea Leaga
5‘Ae moni lava, o le uaina o le fa‘a‘ole‘ole lea; o le tagata fa‘afefeteina e lē nofo fo‘i o ia i lona fale, na te fa‘ateleina lona mana‘o e pei o seoli, e pei o le oti lava ia, e lē mā‘ona lava; na te fa‘apotopotoina nu‘u uma lava ‘iā te ia, na te aofa‘iina fo‘i ‘iā te ia nu‘u uma.#Fa‘ata 27.20; Isai 5.14; Tani 2.37-38 6E lē sauni ‘ea e i latou uma le fa‘ata‘oto ‘iā te ia, ‘atoa ma le pese fa‘atauemu fo‘i ‘iā te ia, ma latou fa‘apea atu, “‘Oi talofa i lē na te fa‘aputu mea e le ni ana mea. Se‘ia afea? ‘Oi talofa fo‘i ‘iā te ia o lē na te fa‘afaupu‘e ‘iā te ia ‘oloa ‘ese!”#Isai 5.8; Mika 2.4; Saka 1.12
7E lē fa‘afuase‘i ‘ea ‘ona tula‘i atu i latou o ē a feutia oe ma latou ala mai o ē fa‘atigāina oe, ‘ona ‘avea lea o oe ma vete mā latou? 8Sa e vetea nu‘u e tele, o le mea lea e vetea ai oe e nu‘u uma o totoe; ‘ona o le toto o tagata, ma le sauā i le nu‘u ma le ‘a‘ai ma i latou uma o ē nonofo ai.
9“‘Oi talofa i lē na te maua i le amio leaga le ‘oloa mā lona ‘āiga, ‘ina ‘ia tu‘u lona ōfaga i le mea maualuga, ‘ina ‘ia lavea‘iina o ia i le malaia?”#Isai 14.13; Iere 22.13; 49.16 10‘Ua e filifili se mea e o‘o ai le ma i lou lava ‘āiga, i lou fa‘aumatia o nu‘u e tele; ‘ua e agasala fo‘i ‘iā te oe lava. 11Auā e ‘alaga mai le ma‘a a‘i le pā puipui, o le fa‘alava fo‘i a‘i le la‘au e tali atu i ai.#Luka 19.40
12“‘Oi talofa i lē na te faia, ‘a‘ai i le toto ma fa‘atumauina se ‘a‘ai i le amioletonu!” 13Fa‘auta, e le mai le ALI‘I o ‘au ‘ea ‘ona ia galulue tagata mā le afi ma ‘ia lailoa nu‘u ‘iā i latou lava i mea le aogā lava. 14Auā e tumu le lalolagi i le malamalama o le mamalu o le ALI‘I, fa‘apei ‘ona ufitia o le ‘iliti tai i le suāsami.#Isai 11.9
15“‘Oi talofa i lē na te fa‘ainu i le tasi tagata, o oe o lē liligi atu lau mea ‘o‘ona ‘iā te ia, ‘ua e fa‘a‘onā fo‘i ‘iā te ia, ‘ina ‘ia e va‘ai atu i lo latou lē lavalavā.” 16E tumu oe i le mā e lē o le mamalu; ‘ia e inu fo‘i oe ma ‘ia aliali lou le peritomeina; e liliu atu ‘iā te oe le ipu a le ‘a‘ao taumatau o le ALI‘I, e i ai fo‘i le pua‘iga e fa‘amāina ai i luga o lou mamalu.#Iere 25.15; Nau 3.5-6 17Auā e liloia oe i le sauā na faia i Lepanona ma le fa‘aumatia o manu e matuā matata‘u ai i latou; na o le toto o tagata ma le sauā i le nu‘u ma le ‘a‘ai, ma i latou uma o ē nonofo ai.
18Se a ‘ea le aogā o le tupua ‘ua ta ‘ina ‘ua taia e lē na na faia; o le tupua u‘amea ma lē a‘oa‘o i le pepelo, ‘ina ‘ua fa‘atuatua le na faia i lana mea na fai, ‘ia fai ai e ia tupua e le magagana.#Isai 44.10; Iere 10.8, 14; 1 Kori 12.2 19‘Oi talofa i lē na te fai atu i le la‘au, “Ala mai ia;” ma le ma‘a e le magagana, “Tula‘i mai ia” E a‘oa‘o mai ‘ea lenā mea? Fa‘auta ‘iā te ia, ‘ua ufitia i le auro ma le ario, ‘ae leai lava se manava i totonu ‘iā te ia.#1 Tu 18.26-27; Sala 135.17
20A o le ALI‘I ‘ua i lona malumalu pa‘ia o ia; ‘inā fa‘alologo ia le lalolagi uma i ona luma.#Sala 11.4; Saka 2.13
Currently Selected:
Sapakuka 2: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.