Esekielu Fa‘atomuaga
Fa‘atomuaga
O le perofeta o Esekielu ma o ia fo‘i o le ositaulaga (1.3) sa fa‘aaunu‘ua i Papelonia i le taimi o le tāfeaga ‘ina ‘ua fa‘atafunaina le ‘a‘ai pa‘ia o Ierusalema. E i ai le talitonuga sa galue lenei perofeta i le vaitaimi pe tusa o le 593 T.L.M, o tausaga fa‘ai‘ui‘u fo‘i ia o le mālō o Iuta se‘ia o‘o ‘ina fa‘amutaina lana galuega i le 571 T.L.M, o le mae‘a ai o ni tausaga se tele talu ‘ona pa‘ū Ierusalema (586 T.L.M). O le fe‘au fa‘apitoa a le perofeta o le tusi atu i tagata sa fa‘aaunu‘ua ma tagata o lo‘o nonofo pea i Ierusalema. E ono ni vaega tāua ‘ua vaevaeina i ai le tusi a Esekielu: (1) O le vala‘au a le Atua ‘iā Esekielu e ‘avea ma perofeta; (2) O lapata‘iga i tagata e uiga i le fa‘amasinoga a le Atua ‘iā i latou ma le fa‘atafunaina o Ierusalema o le a o‘o mai; (3) O le fa‘amasinoga a le Ali‘i i atunu‘u ‘ese o lo‘o latou fa‘asauā i tagata o lona nu‘u; (4) O fa‘amafanafanaga ‘iā Isaraelu ‘ina ‘ua māe‘a ‘ona fa‘aleagaina Ierusalema ma le folafolaga o le lumana‘i manuia; (5) O valo‘aga e fa‘asaga ‘iā Koku; (6) O fuafuaga a Esekielu i le toe lagaina o le malumalu ma le mālō.
O Esekielu o se tagata e telē le fa‘atuatua ma o se tagata e loloto ona mafaufauga. O le tele o ona manatu e maua mai i fa‘aaliga ma o le tele o ana tusitusiga sa fa‘aali i ni fa‘ailoga e malamalama lelei i ai tagata. Sa fa‘amamafaina e Esekielu le mana‘omia o se fa‘afouga fa‘aleagaga ma o le tagata lava e tauia i ana lava agasala. ‘Ua fa‘aalia fo‘i e Esekielu lona fa‘amoemoe i le toe ola fuata‘i o tagata o lona mālō. O Esekielu o le ositaulaga ma o le perofeta fo‘i, o le mea fo‘i lea e fiafia ai o ia e talanoa i le malumalu ma le ola fa‘apa‘iaina.
O le Fa‘asologa o Matā‘upu:
O le vala‘auga o Esekielu 1.1—3.27
O fe‘au i le malaia o Ierusalema 4.1—24.27
O le fa‘amasinoga o isi mālō 25.1—32.32
O valo‘aga fa‘asaga ‘iā Koku 38.1—39.29
O le Malumalu ma le ‘ele‘ele i le lumana‘i 40.1—48.35
Currently Selected:
Esekielu Fa‘atomuaga: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.