Esekielu 48
48
O Tofi o Itū‘āiga o Isaraelu ma Ositaulaga ma sa Levī
1O igoa ia o itū‘āiga. E pau mai i le tulu‘iga o le itū i le itū i matū, e o‘o atu i le auala o Hetelona, e ui atu ai i Amato, o Hasarenana o le tuā‘oi o Tamaseko i le itū i matū, e o‘o atu i tala ane o Amato; o ona itū ia i sasa‘e ma sisifo, o le tofi lea o Tanu.#Eseki 47.15-20 2E so‘o fo‘i tuā‘oi ma Tanu, e pau mai i le itū i sasa‘e, e pau mai i le itū i sisifo, o le tofi lea o Asera. 3E so‘o fo‘i tuā‘oi ma Asera, e pau mai i le itū i sasa‘e, e pau mai i le itū i sisifo, o le tofi lea o Nafatali. 4E so‘o fo‘i tuā‘oi ma Nafatali, e pau mai i le itū i sasa‘e, e pau mai i le itū i sisifo, o le tofi lea o Manase.#Eseki 47.13 5E so‘o fo‘i tuā‘oi ma Manase, e pau mai i le itū i sasa‘e, e pau mai i le itū i sisifo, o le tofi lea o Efaraima. 6E so‘o fo‘i tuā‘oi ma Efaraima, e pau mai i le itū i sasa‘e, e pau mai i le itū i sisifo, o le tofi lea o Reupena. 7E so‘o fo‘i tuā‘oi ma Reupena, e pau mai i le itū i sasa‘e, e o‘o i le itū i sisifo, o le tofi lea o Iuta.
O le ‘Ogātotonu o le ‘Ele‘ele
8E so‘o fo‘i tuā‘oi ma Iuta, e pau mai i itū i sasa‘e, e pau mai i le itū i sisifo, e i ai le taulaga tou te avatu, e lua sefulu afe ma afe e lima o u lona lautele, o lona umi fo‘i e pei o isi tofi, e pau mai i le itū i sasa‘e, e pau mai i le itū i sisifo; e tu loto ai le malumalu.#Eseki 45.1-3; 48.21
9O le taulaga tou te avatu i le ALI‘I, o lona umi e lua sefulu afe ma afe e lima o u, o lona lautele e sefulu afe. 10E faia fo‘i lea ma taulaga pa‘ia mo le ‘au ositaulaga; o lona umi i le itū i matū e lua sefulu afe ma afe e lima o u, o lona lautele i le itū i sisifo, e sefulu afe, o lona lautele i le itū i sasa‘e, e sefulu afe, o lona umi i le itū i saute e lua sefulu afe ma afe e lima; e tu loto ai le malumalu o le ALI‘I. 11E fai ia mo le ‘au ositaulaga, o ē ‘ua fa‘apa‘iaina o le fānauga a Satoka, o ē na tausi i a‘u mea e tausia, o ē na lē ō ‘ese ‘ina ‘ua ō ‘ese le fānauga a Isaraelu, e pei o sa Levī ‘ona ō ‘ese.#Eseki 44.10, 15 12O le taulaga o le lau‘ele‘ele ‘ua avatua, e ‘avea ma mea e matuā pa‘ia lava ‘iā te i latou, e so‘o tuā‘oi ma sa Levī. 13E feagai ma le tuā‘oi o le ‘au ositaulaga se mea a sa Levī, o lona umi e lua sefulu afe ma afe e lima o u, o lona lautele e sefulu afe; o lona umi ‘atoa e lua sefulu afe ma afe e lima, o lona lautele fo‘i e sefulu afe. 14Latou te lē fa‘atauina atu ai lava sina fasi fanua, pe fesuia‘iina, pe ‘avea le fa‘apolopolo o le lau‘ele‘ele, auā ‘ua pa‘ia ia i le ALI‘I.#Levi 27.10, 28, 33; Eseki 44.30
15O le lima gaafe ‘ua totoe i le lautele i lima o le lua sefulu afe ma afe e lima, e fai lea ma mea tataga mo le ‘a‘ai, e fai ma mea e nonofo ai, e fai fo‘i ma tuāfanua; e tu loto ai le ‘a‘ai. 16O ona fua fo‘i nei; o le itū i matū e fa gaafe ma le lima o selau, o le itū i saute e fa gaafe ma le lima o selau, o le itū i sasa‘e e fa gaafe ma le lima o selau, o le itū i sisifo e fa gaafe ma le lima o selau. 17O tuāfanua o le ‘a‘ai e lua selau ma le limagafulu i le itū i matū, e lua selau ma le limagafulu i le itū i saute, e lua selau ma le limagafulu i le itū i sasa‘e, e lua selau ma le limagafulu fo‘i i le itū i sisifo. 18O lona toe e tuā‘oi ma le taulaga o le tofi pa‘ia, e sefulu afe lona umi i sasa‘e, e sefulu afe fo‘i i sisifo, e feagai fo‘i ia ma le taulaga o le tofi pa‘ia; o mea e tutupu ai e fai lea ma mea e ‘ai mā e ‘au‘auna i le ‘a‘ai. 19O ē ‘au‘auna i le ‘a‘ai latou te ‘au‘auna i ai mai itū‘āiga uma o Isaraelu.
20O le taulaga ‘atoa, e lua sefulu afe ma afe e lima i le tasi itū, e lua sefulu afe fo‘i ma afe e lima i le isi itū; tou te avatu le taulaga pa‘ia e gatasitasi uma ona itū e fa, e fa‘atasi ma le tofi o le ‘a‘ai.#Fa‘aa 21.16
21E fai fo‘i le mea ‘ua toe mo le ali‘i sili i le tasi itū ma le isi itū o le taulaga pa‘ia ma le tofi o le ‘a‘ai i luma o le lua sefulu afe ma afe e lima o le taulaga i le tuā‘oi i le itū i sasa‘e, ma le itū i sisifo i luma o le lua sefulu afe ma afe e lima i le tuā‘oi i le itū i sisifo, e feagai ma tofi o le ali‘i sili; e fai fo‘i ia ma taulaga pa‘ia; e tu loto ai le malumalu o le fale.#Eseki 45.7; 48.8, 10 22E pau mai i le tofi o sa Levī, e pau mai fo‘i i le tofi o le ‘a‘ai, (e i ai le tofi o le ali‘i sili,) i le vā o le tuā‘oi o Iuta ma le tuā‘oi o Peniamina, e fai lea mo le ali‘i sili.
O ‘Ele‘ele mo isi Itū‘āiga
23O itū‘āiga fo‘i o totoe, e pau mai i le itū i sasa‘e, e pau mai i le itū i sisifo, o le tofi lea o Peniamina.#Eseki 47.15-20 24E so‘o fo‘i tuā‘oi ma Peniamina, e pau mai i le itū i sasa‘e e pau mai i le itū i sisifo, o le tofi lea o Simeona. 25E so‘o fo‘i tuā‘oi ma Simeona, e pau mai i le itū i sasa‘e, e pau mai i le itū i sisifo, o le tofi lea o Isakara. 26E so‘o fo‘i tuā‘oi ma Isakara, e pau mai i le itū i sasa‘e, e pau mai i le itū i sisifo, o le tofi lea o Sepulona. 27E so‘o fo‘i tuā‘oi ma Sepulona, e pau mai i le itū i sasa‘e, e pau mai i le itū i sisifo, o le tofi lea o Kato. 28E so‘o fo‘i tuā‘oi ma Kato i le itū i saute, e fa‘asaga i le itū i saute, e pau mai i le tuā‘oi i Tamara, e pau mai i le vai o Meripa-Katesa ma le alia e o‘o i le sami tele.
29O le lau‘ele‘ele lea tou te vaevaeina i le vili i itū‘āiga o Isaraelu e fai ma tofi, o latou tofi fo‘i ia, ‘ua fetalai mai ai le Ali‘i le ATUA.#Eseki 47.21-22
O Faitoto‘a o Ierusalema
30O mea ia e ō atu ai le ‘a‘ai; o le itū i matū e fa afe ma le lima selau o lona fua lea.#Fa‘aa 21.12-13 31O puipui fo‘i o le ‘a‘ai e igoa ia i igoa o itū‘āiga o Isaraelu; e tolu puipui i le itū i matū; o le puipui o Reupena o le tasi lea, o le puipui o Iuta o le tasi lea, o le puipui o Levī o le tasi lea.#Fa‘aa 21.12 32O le itū i sasa‘e e fa gaafe ma le lima o selau o lona fua lea; e tolu fo‘i puipui; o le puipui o Iosefa o le tasi lea, o le puipui o Peniamina o le tasi lea, o le puipui o Tanu o le tasi lea. 33O le itū i saute, e fa gaafe ma le lima o selau o lona fua lea; e tolu fo‘i puipui; o le puipui o Simeona o le tasi lea, o le puipui o Isakara o le tasi lea, o le puipui o Sepulona o le tasi lea. 34O le itū i sisifo e fa gaafe ma le lima selau o lona fua lea ma o latou puipui e tolu; o le puipui o Kato o le tasi lea, o le puipui o Asera o le tasi lea, o le puipui o Nafatali o le tasi lea. 35O lona fa‘ata‘amilosaga, e sefulu afe ma afe e valu o lona fua lea; o le igoa fo‘i o le ‘a‘ai, e āfua mai i lea aso, O LO‘O AFIO AI LE ALI‘I.#Iere 3.17; Eseki 35.10; Ioe 3.21
Currently Selected:
Esekielu 48: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.