Baruch 5
5
O le Manuia o Isaraelu pe a Toe Fo‘i mai i lona Atua
1Tō‘ese ia, Ierusalema e, o le ‘ofu o lou fa‘anoanoa ma lou puapuagā,
‘ia e fa‘a‘ofu i le mamalu ma le matagofie o le vi‘iga e fa‘avavau ‘ua ‘iā te oe mai le Atua. #Isai 52.1
2E fa‘a‘ofuina oe e le Atua i le ‘ofu pulupulu o le amiotonu,
na te fa‘ae‘e i lou ulu le pulou o le vi‘iga tumau. #Isai 61.10
3Auā e fa‘aali lava e le Atua lona mamalu i totonu ‘iā te oe, i tagata uma ‘ua i le lalolagi.
4Auā e fa‘aigoaina oe e le Atua i lou igoa e fa‘avavau,
“O le manuia o le amiotonu, o le mamalu o le amio Atua.”
5‘Ia e tula‘i, Ierusalema e, ‘ia e tu i luga;
‘ia e tepa atu i le itū i sasa‘e,
‘ia e va‘ava‘ai atu i lau fānau ‘ua fa‘apotopoto mai i le itū e oso a‘e ai le lā e o‘o i le itū e goto ifo ai,
i le fetalaiga a lē ‘ua pa‘ia, e ‘oli‘oli i latou ‘ona ‘ua manatua i latou e le Atua.
6Auā na latou ō ‘ese ‘iā te oe o sāvavali, o ta‘ita‘iina e o latou fili;
‘ae toe molia mai i latou e le Ali‘i ‘iā te oe,
o ti‘eti‘e ma le mamalu i latou e pei o alo o tupu. #Isai 49.22; 60.4
7Auā ‘ua tonu i le Atua e fa‘amaulalo o mauga maualuga uma ma mea maupu‘epu‘e o le vavau;
na te fa‘atumu o vaimauga ‘ia ‘avea ma lau‘ele‘ele laulelei,
‘ina ‘ia savali ai o Isaraelu ma le saogalemū mo le mamalu o le Atua. #Isai 40.3-4
8O togāvao fo‘i ma la‘au manogi uma e fa‘apaoloina ai o Isaraelu i le poloa‘iga a le Atua. #Isai 41.19
9Auā e toe fa‘afoisia o Isaraelu e le Atua ma le fiafia,
i le malamalama o lona ia mamalu,
i le agaalofa ma le amiotonu e pogai lava ‘iā te ia.
Currently Selected:
Baruch 5: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.