Amosa 9
9
E Malaia lava Isaraelu
1Na ‘ou iloa le Ali‘i, o lo‘o tu i luga o le fatafaitaulaga ma ‘ua fa‘apea mai o ia: ‘Inā ta ia le la‘au fa‘alava o le faitoto‘a, ‘ia lūlūina ai o pou; ‘ia gaugau ai i luga o latou ulu uma; ‘ou te fasioti fo‘i i le pelu ē ‘ua totoe o i latou; ‘ai so latou e sola e lē sao ia, ‘ai so latou e sola ‘ese e lē lavea‘iina o ia.#Fa‘ama 16.26-30; Sefa 2.14 2‘Āfai latou te ‘eli ‘ia o‘o i seoli, e ‘aumaia i latou e lo‘u lima a‘i lea mea, ‘āfai latou te fe‘ā‘ei i le lagi, ‘ou te ‘aveina ifo i latou a‘i lea mea. 3‘Āfai latou te lalafi i le tumutumu o Karamelu, ‘ou te su‘esu‘e ai ma ‘aumai ai i latou a‘i lea mea; ‘āfai fo‘i e lalafi i latou a‘i o‘u luma i le loloto o le sami, ‘ou te fai atu ai i le gata, ‘ona utia ai lea o i latou e ia. 4‘Āfai fo‘i e tāfea i latou i luma o ē e fai i latou ma fili, ‘ou te fai atu ai i le pelu, ‘ona fasiotia ai lea o i latou; ‘ou te fa‘asaga atu i ai, ‘ina ‘ia malaia o i latou, ‘ae lē ‘ona ‘ia manuia.#Teu 28.65; Iopu 26.5; Iere 21.10
5O le Ali‘i le ATUA o ‘au, o ia e pa‘i atu i le lau‘ele‘ele,
‘ona liu suāvai ai lea,
e fa‘anoanoa fo‘i i latou uma o ē nonofo ai.
E matuā alu a‘e e pei o se vaitafe, e lofia o ia e pei o le vaitafe o Aikupito.
6O ia lava o lē na te faia ona afio‘aga i le lagi,
ma na fa‘avaeina lana fa‘aputugamea i le lalolagi.
O lē na te vala‘auina i le suāsami,
o le sami ma fa‘amaligi ai i le fogā‘ele‘ele.
O le ALI‘I, o lona suafa lea.#Sala 104.3, 5
7O lo‘o fa‘apea mai le ALI‘I: Le fānauga a Isaraelu e, o le ‘ua pei o tagata Aitiope ‘ea ‘outou ‘iā te a‘u? Pe na lē ‘aveina a‘e Isaraelu e a‘u a‘i le nu‘u o Aikupito? O Filisitia fo‘i a‘i Kafetori ma Suria a‘i Kira?#Iere 47.4; Amo 1.5 8Fa‘auta, ‘ua fa‘asaga fofoga o le Ali‘i le ATUA i le mālō amio leaga, ‘ou te fa‘aumatia ai le fogā‘ele‘ele; na o le ‘āiga o Iakopo ‘ou te lē matuā fa‘aumatia, o lo‘o fetalai mai ai le ALI‘I.#Iere 30.11; Amo 9.4
9Fa‘auta mai fo‘i, ‘ou te fai atu, ‘ou te lūlūina fo‘i le ‘āiga o Isaraelu i nu‘u uma, e pei ‘ona lūlūina o saito i le lūlū, ‘ae lē pa‘ū sina fua i le ‘ele‘ele.#Iere 15.7; Mata 3.12 10E oti i le pelu o i latou uma o lo‘u nu‘u o ē agasala, o ē fa‘apea ane, “E le aulia mai le malaia, pe maua mai i tatou.”
O le Toe Fa‘afouga o Isaraelu
11O le aso lea ‘ou te fa‘atūina ai le fale apitaga o Tavita ‘ua pa‘ū ‘ou te pupuni i ana mea ‘ua lepetia; o ana mea fo‘i ‘ua solo ‘ou te atiina a‘e, ‘ou te atiina a‘e e pei ‘ona faia i ona po anamua.#Galu 15.16-18 12‘Ina ‘ia fai mo latou tofi ē ‘ua totoe o Etoma, ‘atoa ma nu‘u uma, o ē ‘ua fa‘aigoaina i lo‘u igoa, o lo‘o fetalai mai ai le ALI‘I. O lē na te faia lenei mea.
13O lo‘o fa‘apea mai le ALI‘I:#Levi 26.5; Ioe 3.18
Fa‘auta, e o‘o mai ona aso e aulia ai lē suatia le fanua i lē selesele saito,
ma lē solivine i lē lūlū saito.
E tautulu mauga i le suāvine,
e tafea ai mea maupu‘epu‘e uma.
14‘Ou te fa‘afoisia mai le tāfeaga o lo‘u nu‘u o Isaraelu.
‘Ona latou fa‘atūina ai lea o ‘a‘ai ‘ua fa‘atafunaina, ma nonofo ai;
latou te totōina fo‘i tōvine ma inu uaina ai;
latou te fai fo‘i fa‘ato‘aga ma ‘a‘ai ai ona fua.#Isai 61.4
15‘Ou te totōina i latou i lo latou lau‘ele‘ele,
e lē toe lia‘iina i latou a‘i lo latou lau‘ele‘ele na ‘ou foa‘iina atu ai ‘iā te i latou.
O lo‘o fetalai mai ai le ALI‘I lou Atua.#Iere 24.6
Currently Selected:
Amosa 9: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.