1 Makapaio 2
2
‘Ua tula‘i Matatia e puipui i le nu‘u o Isaraelu ma le tulafono a le Atua
1O aso ia na tula‘i ai o Matatia, le atali‘i o Ioane, o le atali‘i ia o Simona, o le ositaulaga o sa Ioiaripā, mai Ierusalema ma ‘ua nofo o ia i mauga o Motei. #1 No 24.7 2Sa ‘iā te ia ona atali‘i e to‘alima: o Ioane ‘ua igoa ‘iā Kati; 3ma Simona ‘ua igoa ‘iā Tasi; 4ma Iuta ‘ua igoa ‘iā Makapaio; 5ma Eleasaro ‘ua igoa ‘iā Aparona; ma Ionatana ‘ua igoa ‘iā Afu.
6‘Ua iloa atu e i latou o mea leaga sa fai i le nu‘u o Iuta ma Isaraelu, 7‘ona fai ane lea o Matatia:
“‘Oi talofa ‘iā te a‘u!
Se a le mea ‘ua fānaua mai ai a‘u e iloa atu le tu‘imomoia
o lo‘u nu‘u ma le tu‘imomoia o le ‘a‘ai pa‘ia,
‘ae nofonofo ai lava a‘u, a o tu‘uina o ia i lima o ona fili?
8O le mea pa‘ia ‘ua pule i ai tagata ‘ese;
o lona malumalu ‘ua pei o se tagata leaga.
9‘Ua ‘avea ma vete o mea tāua sa mamalu ai;
‘ua fasiotia ona toeaina i malae,
ma ‘ua fasiotia ona taulele‘a i le pelu a ē ita ‘iā te ia.
10Po o le fea ‘ea nu‘u ‘ese ‘ua lē fai tufa‘aga i lona mālō?
ma ‘ua lē maua nai ona vete?
11‘Ua ‘ave‘esea ona teuga uma lava;
o lē sa sa‘oloto ‘ua ‘avea ia ma pologa.
12O lenei fo‘i ‘ua fa‘agaogaoina lo tatou malumalu pa‘ia,
o lo tatou lālelei lea ma lo tatou mamalu,
ma ‘ua fa‘aleagaina e nu‘u ‘ese.
13Se a la le mea e ola pea ai i tatou?”
14Ma ‘ua saei o latou ‘ofu e Matatia mōna atali‘i; ma ‘ua ‘o‘ofu i ‘ofu talatala ma ‘ua latou matuā taufaitagitu‘i.
15Ma ‘ua ō mai i lea mea o ē na ‘auina e le tupu o Atioko, ‘ina ‘ia latou fa‘atauānau atu i ē ‘ua sōsōla i le ‘a‘ai o Motei, ‘ia latou faitaulaga ma fa‘amū le mea manogi ma tēte‘a ‘ese ai i le tulafono a le Atua. 16Ma ‘ua ō mai ‘iā te i latou ma le loto malie nisi e to‘atele o le nu‘u o Isaraelu, a ‘ua tūtūmau o Matatia mōna atali‘i. 17A ‘ua tali mai o ē na ‘auina e Atioko, ‘ua fa‘apea mai ‘iā Matatia, “O le tumua lava oe o lenei ‘a‘ai, ‘ua sili ai lou mamalu ma lau pule, ‘ua to‘atele ou atali‘i ma ou uso; 18o lea, ‘inā muamua mai ia oe, ma ‘ana‘ana i poloa‘iga a le tupu, e pei ‘ona fai e isi nu‘u uma ma le fānauga a Iuta ma i latou ‘ua nonofo i Ierusalema, ‘ona ‘avea lea o oe ma ou atali‘i o uō a le tupu, e fa‘a‘oloaina fo‘i oe i le auro ma le ario ‘atoa ma mea tāua e tele.”
19Ma ‘ua tali atu o Matatia, ‘ua fai atu ma le leo tele, “E ui ‘ina usita‘i nu‘u uma i le tupu o Atioko, ‘ia ta‘itasi ma tu‘ulafoa‘i le ‘au‘aunaga i le tulafono a ona tamā, ma ‘ia ‘ana‘ana i ana poloa‘iga; 20a o a‘u nei ma o‘u atali‘i ma o‘u uso, matou te tausia le tulafono a o matou tamā. 21‘Ia alofa mai le Atua ‘iā te i matou! e lē aogā ‘ona matou tu‘ulafoa‘i le tulafono ma poloa‘iga a le Atua. 22Matou te lē ‘ana‘ana i ‘upu a le tupu o Atioko, matou te lē faitaulaga fo‘i, o sosoli poloa‘iga o la matou tulafono ma sāvavali ai i le ala ‘ese.”
23‘Ua uma atu ana ‘upu ia, ‘ua sau le tasi tagata Iutaia e faitaulaga i tupua i luma o tagata uma i le fatafaitaulaga, i le ‘a‘ai o Motei, e tusa ma le poloa‘iga a le tupu; 24ma ‘ua iloa atu e Matatia, ‘ona tigā ai lea o ia, ‘ua tuia fo‘i ona manatu; ma ‘ua mū lona ita e tusa ma le fa‘amasinoga o le tulafono, ma ‘ua oso ‘iā te ia ma fasioti ‘iā te ia i luga o le fatafaitaulaga. 25‘Ua na fasioti fo‘i i lea lava itūaso le tagata na ‘auina mai e le tupu o Atioko, sa na fa‘atauānau ‘ia latou faitaulaga; ma ‘ua na lepeti le fatafaitaulaga, 26ma ‘ua mā‘elegā ‘ona o le tulafono, e pei ‘ona faia e Fineaso ‘iā Semeri, le atali‘i o Selomi. #Nume 25.6-15
O le Vaega ‘au a Matatia
27Ma ‘ua ‘alaga o Matatia ma le leo tele i totonu o le ‘a‘ai, o fa‘apea ane, “O i latou uma ‘ua latou filigā i le tulafono ma le fa‘amausalī o le feagaiga, ‘ia latou tu‘u le ‘a‘ai, ‘ae mulimuli mai ‘iā te au!” 28Ma ‘ua sōsōla o ia mōna atali‘i i le atu mauga, ma ‘ua latou tu‘u i le ‘a‘ai o a latou mea uma. #2 Maka 5.27
29‘Ona fa‘aifo lea o ni isi e to‘atele i le fanua tu‘ufua, o ē sa loto i le amiotonu ma le amio sa‘o; 30ma ‘ua nonofo ai i latou ma la latou fānau, ma a latou avā, ma a latou lafu manu, auā sa lofia i latou i mea leaga. 31‘Ua tala e nisi i ofisa o le tupu ma le vaega ‘au sa i Ierusalema, le ‘a‘ai lea o Tavita, e fa‘apea: o nisi tagata na latou solia le poloa‘iga a le tupu ‘ua latou sōsōla i lafitaga o le fanua tu‘ufua, ma ‘ua mulimuli atu ‘iā te i latou o nisi e to‘atele. 32Ma ‘ua latou aga‘i atu loa i le mea sa latou i ai, ma ‘ua latou sauniuni e tau ma i latou i le aso sapati; #2 Maka 6.11 33ma ‘ua fa‘apea mai ‘iā te i latou, “Po ‘ua ‘outou tete‘e mai pea i se ā? Ō mai ia ma ‘ana‘ana i le ‘upu a Atioko, ‘ona ola ai lea o ‘outou.”
34Ma ‘ua latou tali atu, “Matou te lē ō atu, matou te lē usita‘i fo‘i i le ‘upu a le tupu, auā e fa‘alēaogāina a‘i lava le aso sapati.”
35‘Ona latou feosofi lea i le tau‘a. 36A ‘ua latou le tali atu i ai, ‘ua lē fetogi i ai fo‘i i se ma‘a, pe pupuni i ma‘a o latou lafitaga, 37‘ua latou fai ane, “‘Ia oti uma i matou i la matou amiotonu, e molimau lava ‘iā te i matou le lagi ma le lalolagi, ‘ua ‘outou fasioti ‘iā i matou ma le lē tonu.” 38Ma ‘ua latou si‘i le tau‘a ‘iā te i latou i le aso sapati; ma ‘ua oti ai i latou, ma a latou avā, ma a latou fānau ma a latou manu, ‘ua ‘atoa le to‘aafe o tagata.
39Ma ‘ua iloa lea mea e Matatia mana uō, ma ‘ua latou matuā tagitu‘i ‘ona o i latou. 40Ma ‘ua latou fetautalatala‘i o fa‘apea ane, “‘Āfai ‘ua tatou faia uma lava le mea na fai e o tatou uso, ma ‘ua tatou lē tau le tau‘a ma nu‘u ‘ese mo lo tatou ola ma a tatou tulafono, e lē pine ‘ona latou fa‘aumatia i tatou i le lau‘ele‘ele.” 41Ma ‘ua latou fai le tonu i lea aso, ‘ua latou fai ane, “So se tasi e si‘i le tau‘a ‘iā te i tatou i le aso sapati, tatou te tete‘e atu ‘iā te ia; tatou te lē oti uma fo‘i, e pei ‘ona oti o tatou uso i o latou lafitaga.”
42‘Ona fa‘aopoopoina ai lea ‘iā te i latou le fa‘apotopotoga o le ‘au Hasitaio, o ‘au i ai o ē malolosi i Isaraelu, ma ē filigā i le tulafono; 43ma ‘ua fa‘aopoopoina fo‘i ‘iā te i latou o ē uma sa sola ‘ese i le leaga, ‘ua fa‘amausalīina ai la latou ‘au. 44Ma ‘ua latou fa‘ala‘ei‘au ma ‘ua latou taia tagata agasala i lo latou ita ma tagata amio leaga i lo latou loto tigā; a o ē totoe ‘ua latou sōsōla i nu‘u ‘ese, ‘ina ‘ia sao ai i latou. 45Ma ‘ua feoa‘i solo Matatia mana uō ma ‘ua latou lepetia fatafaitaulaga o tupua; 46ma ‘ua peritomeina fa‘amalosi e i latou o tama uma na latou maua ‘ua lē peritome i le lau‘ele‘ele o Isaraelu. 47Ma ‘ua latou tuliloa o tagata fa‘amaualuga ma ‘ua fa‘amanuiaina le galuega a o latou lima; 48ma ‘ua latou puipui i le tulafono, o tete‘e i le malosi o nu‘u ‘ese ma le malosi o tupu ma ‘ua lē punonou o latou muaulu i luma o le tagata agasala.
O le Oti o Matatia
49‘Ua lata mai aso e oti ai o Matatia, ‘ona fai atu lea i ona atali‘i, “O aso nei e mālō ai le fa‘amaualuga ma le sasa; o aso nei o le olopalaina ma le ita o le loto tigā. 50O lenei, o‘u atali‘i e, ‘ia ‘outou filigā i le tulafono ma foa‘i o ‘outou ola mo le feagaiga a ‘outou tamā.
51“Ma ‘ia ‘outou manatua galuega a ‘outou tamā, na latou faia i o latou tupulaga, ‘ona maua ai lea e ‘outou le mamalu tele ma le ta‘uleleia e fa‘avavau. 52E lē o le tofotofoga ‘ea na iloa ai le fa‘amaoni o Aperaamo ma ‘ua ta‘uamiotonuina ai o ia? #Kene 15.6 53‘Ua tausia poloa‘iga e Iosefa i ona po o puapuagā ma ‘ua ‘avea ai o ia ma pule i Aikupito. 54O Fineaso, lo tatou tamā, ‘ua mā‘elegā lava ia ‘ona o le Atua, ‘ua na maua ai le feagaiga o le faiva o ositaulaga e fa‘avavau. #Kene 39.1—45.28 55O Iosua ‘ua ‘ana‘ana i le afioga a le Atua, ‘ua ‘avea ai o ia ma ta‘ita‘i ‘iā Isaraelu. #Nume 25.6-13 56O Kalepo ‘ua molimau lava ia i luma o le fa‘apotopotoga, ‘ua na maua ai lona tofi. 57O Tavita, ‘ona o lona agaalofa, ‘ua na maua le nofoāli‘i o le mālō e o‘o i le fa‘avavau. #Nume 13.30; 14.24 58O Elia, i lona matuā mā‘elegā i le tulafono, ‘ua si‘itia ia i le lagi. #2 Samu 7 59O Hanania, ma Asaria ma Mesaelu, ‘ona o lo latou fa‘atuatua, ‘ua lavea‘iina i latou ai le afi. #1 Tu 19.10-14; 2 Tu 2.11-12 60O Tanielu, ‘ona o lana amiotonu, ‘ua lavea‘iina o ia a‘i le gutu o leona. #Tani 3
61“Ma ‘ia fa‘apea ‘ona ‘outou manatua atu i lea tupulaga ma lea tupulaga, auā e lē fano se tasi o i latou uma e fa‘alagolago ‘iā te ia. #Tani 6 62‘Aua fo‘i tou te matata‘u i ‘upu a le tagata agasala, auā o lona mamalu, o le otaota lea ma le ilo; 63o le aso nei ‘ua fa‘amaualugaina ai, a e a taeao e lē toe maua o ia auā ‘ua toe fo‘i i lona lava efuefu ma ‘ua fa‘aumatia ‘ona mānatunatu. 64O lenei, o‘u atali‘i e, ‘ia ‘outou malolosi ma ‘ia ‘outou fa‘atamatane i le tausiga o le tulafono, auā o le mea lava lea tou te mamalu ai.
65“O Simona lenei, lo ‘outou uso, ‘ua ‘ou iloa o le tagata fa‘autauta o ia; ‘ia ‘outou fa‘alogo pea lava ‘iā te ia, o ia fo‘i e fai ma ‘outou tamā, 66a o Iuta Makapaio, ‘ua tino mai lona malosi talu mai lona itiiti, ‘ia ‘avea ma ta‘ita‘i o la ‘outou ‘au; o ia lava na te ta‘ita‘i le tau‘a o le nu‘u. 67Tou te tōsina mai ‘iā te ‘outou o i latou uma ‘ua tausi i le tulafono; ma ‘ia ‘outou taui ma sui mo lo ‘outou nu‘u. 68‘Ia ‘outou taui atu lava i nu‘u ‘ese ma ‘ia ‘outou to‘aga i poloa‘iga a le tulafono.”
69Ma ‘ua fa‘amanuia ‘iā te i latou ma ‘ua fa‘aopoopoina o ia i ona tamā. 70Ma ‘ua oti i le tausaga e tasi le selau ma le fagafulu ma le ono#2.70 tausaga e tasi le selau ma le fagafulu ma le ono po o tausaga e 166 T.L.M. ma ‘ua tanumia e ona atali‘i i le tu‘ugamau o ona tamā i Motei ma ‘ua taufaitagitu‘i ‘iā te ia o Isaraelu uma ma le fa‘anoanoa tele.
Currently Selected:
1 Makapaio 2: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.