SEPANIA 1
1
1Ikê ki na tamasinga na Araha ki hagagirara o Sepania renia igê na matena o Josia, karena o Amone, ki marungia i Juta. O Sepania ki na raraha iana o Hesekia, suria o Hesekia ki apara o Amaria, mo Amaria ki apara o Getalia, mo Getalia ki apara o Kusi, mo Kusi ki apara o Sepania.
Na tangiana na suriha iana na Araha
2Na Araha ki vi:
“Inê be hagamagahurura
na ara ni marâ hato i maveta.
3Inê be hagamagahurura na enoni hato
ma na marâ hato ga mauri i bemu
ma na manu hato ma na siare hato.
Inê be hagavotarira na enoni, ga erataga.
Inê be mutera na enoni hato.
I asa tani vige page tahi.
Inê na Araha kani gê visia.
4“Inê be hagaitangira na ai ni Jerusaleme
ma Juta hagenani.
Inê be hatungia hagetage
na vogasiha tanga o Bala na ataro,
ma ka page hitenira ngavê na mane ahuroto ni vogasiha,
ga hagarapea.
5Inê be nahu hagamatara ngavê na enoni,
ga susure igê na gerina na ruma
ma ka bêtuhigi na arito, na hageha ma na higu.
Inê be nahu hagamatara ngavê nikâ na enoni,
ga rahesiê ma ka tohe, viga toto suriê,
ma ka tongesuria nikâ na ataro o Milikome.
6Inê be mutera ngavê na enoni,
ga tari suriê, ma hemuri ka murisigeê,
ma nikâ na ani ga pe hagêguri togo reniê,
se ga pe avarasiê be hagaotora.”
7Na tangiana na suriha iana God na Araha
ki hagarangi me noga.
Mu munimuni i maana.
Na Araha ki hagarêa noga na vogasiha.
Ngaia ki page nahuira na kariana.
Ngaia ki bani guhira na merongata,
hanana ga henahuraua Juta.
8Na Araha ki vi:
“I na matena na vogasiha ngekana
inê be hagaitangira igê na enoni raha,
ma ngaira na karena na maneraha
ma na ani hato ga râ surigi na tauhata ahuroto.
9Inê be hagaitangira na enoni hato,
ga vogasi mangara na ahuroto
ma na ani hato ga hanago ma ka nahu enoni,
ma ka hagavunusia na ruma iana na maneraha iata
renigi na marâ, ga hanagogi.
10“Igê na tangiana ngekana
igamu kamu page rongoa na enangiha
igê na maani para i Jerusaleme,
ga hêtana vi Siare.
Igamu kamu page rongogi na enangiha maramara
igê na bogona haoru na hinua
ma na marâ, ga nagiakuru igê na hungani.
11Igamu nenuni mu oga i na bogona kere vato,
mu angiangi raha, matena mu rongogi,
suria ga page meme na enoni, ga hagavara haga,
ma na ani ga urisi haga.
Inê na Araha kani gê visia.
12“Igê na matena ngekana
inê be tanga na ahame
ma be gari i Jerusaleme.
Inê be hagaitangira na enoni,
ga meratanu mareta ma ka masesi,
ma ka pe botage reniê.
Ngaira ka tohe i obata, ka vi,
‘A, na Araha ki pe marâ na apena renigi.’
13Ga page hanagogi na nahuninga raha iata,
ma ka page ruhuruhugi na ruma iata.
I asa iata, vige oga igê na ruma, ga kahu toregi,
se vige tonomigi na vaini, ga kahu hasigi.”
14I hagarangi me noga
na tangiana raha iana na Araha.
I sugia ma, ma ki ata me noga.
Mu rongo!
Na tangiana ngekana ki page erataga ngavê.
Naka ma na mane ni me ramo,
ngaira nikâ ka page tari ngerengere.
15Ngaia ki na tangiana ni mangariganiha,
ni bagabevoani ma ni anumanumaha,
ni aruhuruhunga ma ni komokomoha,
ni rotoha ma ni hagaruruha,
ni roto bungibungi ma ni puruha ni vaha.
16Ngaia ki na tangiana ni ahuringa ni me
ma na mane ni me ka kasikasi mamava,
matena ga taharigi na bebetehe
ma na ruma nganganihaga.
17Na Araha ki vi:
“Inê be katora ke anumanuma ngavê na enoni hato,
ma ke râ tatagara manga na mane i guru.
Ngaira ka pe tê viteaku.
Tahema na gaputa ki tata aberabera
manga na ve ga karingia,
ma na gahuata ka page arata
ma ka mapu i ano manga na ae.”
18Igê na tangiana ni mangariganiha iana na Araha
ki asa iata hagetage na enoni, vige tahi,
henaka ga nahunigi rako na siliva, na golo ma na haga.
Na mangariaganiha iana ki manga na apena na bagagi raha,
i ngaua hagamagahurua na maveta hagenani.
Ngaia ki hêni hagamesira na enoni hato i maveta.
Currently Selected:
SEPANIA 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific