SEPANIA 2
2
Urisi parongami
1Igamu na enoni, mu pe tangahurigamu,
mu takotako maninga aporo,
ma kamu bâsigamu so maremi.
2I era ma kamu me manga na mahe i mêgu.
I era ma ki tarahugamu
na mangariaganiha iana na Araha,
i manga na anguruna na gi.
I era ma ki hagaitangigamu na Araha.
3Mu aharia na Araha,
igamu hato na enoni matareha,
mu arâ surigi na ramata iana igê na agua.
Mu katogi na tarani, ga koro ma oto,
ma kamu haritagi kamu têtê viteana.
Vari mu page tahitahi tenia na hagaitangiha
igê na tangiana ni mangariaganiha iana na Araha.
Na hagaitangiha tangara na merongata na Siu
4Na hinua i Gasa ki page hihiruga.
Na hinua i Asekeloni ki page mamata ngavê.
Ga page taharira ma ka page henahuraura
na ai ni Asetote igê na ritovagana.
Ma na ai ni Ekeroni ka page mute.
5I page era ngavê tangagamu, ai ni Pilisitia!
Igamu kamu oga igê na tarasini.
Na Araha ki bani surigamu.
Ngaia ki page hagamutegamu.
6Na tarasini iami ke page vora re na bena i hihiruga,
nga noga ma na ruma iata na avanu ni sipi
ma na pena ni sipi ka gâga igê.
7Na ai ni Juta, na ani ga tahitahi mêngara,
ka page raua na mako iami.
Ngaira ka page kasira na totoha ni sipi iata i ngekana
ma ka page mauruhigi na ruma i Asekeloni.
Na Araha God iata ki page ngahisira,
ma ki page katora ka gâga aporo igê na ramana.
8Na Araha raramohaga hunia ki vi:
“Inê kê bani rongora na ai ni Moaba me Amone
ka guharira ma ka hagatoraira na kariaku,
ma ka tamasi paroparo, ka vi,
vi ngaira ka page parênigi na mako iata.
9Tahema, inê nga na Araha mamauri,
gê raramohaga huniê,
na God na Isiraelita ga rahesiê,
inê nga kê tohe,
vigê hagasuhirerua i Moaba me Amone,
mangarerua i Sotome ma i Gomora.
Na tone ma na rauga era ka page rubuhirerua,
ma na asi ki page arâhirerua,
karu sugusuguraga ngavê.
Na kariaku, na ani ga tahitahi mêngara,
ka page raura ma ka page parênigi na mako iata.”
10I ngegana nga na hagaitangiha
tangara na ai ni Moaba me Amone,
suria ngaira ka paroparo,
ka ruhira ma ka guharira
na kariana na Araha raramohaga hunia.
11Na Araha ki page hagamagusira ngavê.
Ngaia ki page hatungira na ataro hato i maveta,
ma hemuri na ara ni enoni hato i maveta
ka page rahesia ma ngaia hegitigi i pasita mareta.
12Na Araha ki page hagamesira nikâ na ai ni Etiopia.
13Na Araha raramohaga hunia
ki page hagaerasia ngavê i Asiria.
Ngaia ki page hagahirungia na hinua i Nineve,
ki voravora re na bagamanihê raha, i avagavaga.
14Ngaia ki page voravora re na agua ni mamaroha
tangara na totoha ni sipi ma ni puruka
ma ni ataka ma vê na marâ.
Na komakukuni ka page oga igê na ruma aruhuruhu
ma ka kohigo igê na mabaha.
Na tehe ka page angiangi igê na una na ruma.
Na ara ni mahena na ruma ka page hêtahi i ano.
15Hoi, nga na hinua vari
na enoni ka vagevagesia ngekana?
Ngaira ka takusia vari,
vi ngaira ka apeape tatara igê,
suria ga vi, vi ngaira ka ramo?
Ngaira ka vi, vi mareha ta na hinua i maveta,
vige maratorana.
I he ngaia? Ngaia ki bani aruhuruhu!
Na marâ vasiga ma ka oga i ngekana.
Na enoni, ga karikari igê,
ka magutenia ma ka kakahuru renia.
Currently Selected:
SEPANIA 2: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific