HABAKUKU 1
1
1Ikê na tamasinga na Araha ki hagamarutea na poropete o Habakuku renia.
Na hagagegeha iana o Habakuku
2O Habakuku ki vi:
“I arihu manga i he kê avarasigo
ma ko kahu karingê
ma ko kahu hagatahigami
tenira na enoni, ga hagamamasiagagami?
3Renia ta igo ko hagagirarê
renigi na bagabevoani ngegana?
Renia ta igo ko pe botage
renigi na eraha ngegana?
I na ara ni agua inê kê bâsira na enoni,
ga nahira na enoni ma ka erasigi na marâ iata,
ma nikâ ga hekorekore,
ga hevoavoa ma ka heariha.
4Ngaira ka aharê igê na ramata
ma ka kasigi râ,
ma ki asa, vige râ surigi na tarani, ga oto.
Na enoni era ka ramo
teharira na ani ga koro ma oto.
Tahema ngaira ka horoa na otoha
igê na eraha.”
Na aramiha iana na Araha
5Ma na Araha ki tamasi tangara na kariana, ki vi:
“Mu hahutugira na enoni igê na agua getegi rihigamu,
ma igamu kamu page konekone ngavê
renigi na marâ mu page bâsigi.
Inê kê page katoa ta na marâ,
i hagakonegamu ngavê.
I asa iami, vigamu page tongesuria,
manga mu pe bâsia.
6Inê be katora na ai ni Babilone ka tehateha.
Na enoni ngegana ka ramoramo ma ka paroparo.
Ngaira ka ragaraga me tangagi na agua getegi i maveta,
hanana ga parênigi.
7Ngaira ka hagamagusira ma ka hagamakukura na enoni,
ma ka râ surigi ma na obaniha iata mareta.
8“Na hosi iata ka tango teharira na o.
Ngaira ka bâ râha teharira na o vasiga, ga gagari.
Na mane ni me igê na hosi ka gaha me tenia hagatê.
Na êgata na hosi iata ka akuhukuhu.
Ngaira ka mangara na ahetaronga,
ga hagavato tangagi na ganiani iata.
9“Na rehagaro na mane ni me iata
ka manga na maguara.
Ngaira ka nahu enoni
ma ka parênigi na apanena iata.
Na ara ni enoni hato ka bubununuga.
Na enoni, ga henahuraura,
ka rako teha vê mangagi na one.
10Ngaira ka tê erasira na maneraha
ma ka rurusira na enoni ni ramata.
I pe bara tangara, vige parênia na hinua nganganihaga.
Ngaira ka rapia na para ni hinua
renigi na mako, ga ukugi,
ma ka parênia.
11Ma hemuri ngaira ka arâ nikâ
manga na roga i angihuru.
Na eragani nuni ngegana
ka hagêguri togo renia na raramohata
manga vi na god iata.”
Na hagagegeha iana o Habakuku
12O Habakuku ki vi:
“Araha, igo ko pe bani God me vari
haganega tenia i nago kere vê noga?
Araha, igo ki mareha vi na God iaku vari?
Igo ko koro ma oto teha ngavê
ma ko mauri tare ma tarema.
Igo ko bani atera na ai ni Babilone
ma ko bani vatera na ramoha,
hanana ga hagaitangigami.
13Ma ki tanu hega, go piringiape
henira na eragani nuni ngegana,
ga hagahagaparu ma?
I pe ararigo, vigu bâsigi na eraha,
suria igo ko koro ma oto teha ngavê.
Tanu hega, go pe hagaitangira na enoni ngegana,
ga pe botage renigi na ramata iamu?
Tanu hega, go muni ma,
matena ngaira ka hagaerasira na enoni,
ga koro ma oto teharira ngaira?
14Manga go pe bêngenira na enoni,
ngaira ka page tari purupuru
manga na ruruha na siare se na rango.
15Na ai ni Babilone ka hagarera na enoni renigi na gavi
mangara na siare.
Ngaira ka hugora,
ma ka ngerengere vagevage,
suria ga tugira.
16Tahema ngaira ka vogasigi na hugo iata
ma ka susu tangagi,
suria na hugo iata ka vatera
re na morani na ngauha ma na marâ hato getegi.
17I hega, ngaira ka ama ni hugora nga na enoni
ma ka ama ni tatahura nga,
manga vi ngaira ka na marâ purua?”
Currently Selected:
HABAKUKU 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific