HABAKUKU 2
2
Na aramiha iana na Araha
1O Habakuku ki vi:
“Inê be akê igê na bebetehe iaku,
ma be naasia igê na tamasinga iana na Araha,
hanana ve girara na aramiha iana
tanga na hagagegeha iaku.”
2Na Araha ki aramia vikê o Habakuku:
“Go segea so maninga na marâ,
gê hagarongogo renia,
hanana na enoni ka girara ga bâbâ hagetage renia.
3Go segea so nga na maruteha,
suria na matena, gê page hagamonaria igê,
ki mamênga, ma ki râ me noga
ma na maruteha ki page mora.
Naka ma ki bâ hagatê mênga,
go naasia!
Ngaia ki page hata ni râ me nga,
ma ki asa, vige kakaviaga.
4Na tamasinga, go segea, ki manga ikê:
‘Na enoni, ga erataga, ki asa, vige tahi
ma na enoni, ga koro ma oto, ka page mauri,
suria ga toto suria God.’”
Na hagaitangiha tangara na enoni era
5Na ruruguha ki hagareke tara.
Na enoni ka hagatage, ka paroparo
ma ka vanavanaga tare manga na mera,
ma ki asa, vige togo na aitangihata.
Tahema ngaira ka parênigi na agua ma na agua.
6Ma na agua ngegê ka page manavatenira na ai ni Babilone,
ma ka page baro ki renira na merongata, ka rurusira.
Ngaira ka page vi:
“I page era ngavê tangagamu,
suria mu hanago bâraha!
I sugi hato iami, vigamu hanago,
se vigamu tugurira na enoni,
hanana viga barubaru na hagaba mu vatera.”
7Bâ, na enoni, ga hagaba tenigamu,
ka page hagakangigamu
ma ka page tugurigamu, kamu barubaru na hagaba.
Igamu kamu page bubununuga.
Ngaira ka page rurugu tenigamu.
8Igamu kamu bani rurugu tenira na enoni
igê na agua rako getigi.
Ma na ani ga tahitahi mêngara
ka page rurugu tenigamu,
suria mu nahuira na enoni ka me
ma mu erasigi na mu
ma kamu hagasuhigi na hinua.
9I page era ngavê tangagamu!
Igamu ma na ahemata iami kamu ruruguha
renigi na marâ, mu hanagogi tenira na enoni getera.
Igamu kamu migitanu na ruma iami
tenira na merongami ma na bagabevoani.
10Ma na katoha iami ka hagamakira na ahemata iami,
suria igamu kamu nahuira rako na enoni
tenigi na agua getigi.
Tahema igamu kamu page me.
11Ngaigi nikâ na hê na apê ni ruma
ka angisia na siva tangagamu,
ma na ringeni ki tagitagi igê na gato.
12I page era ngavê tangagamu!
Na nahunga ni nuni ma na bagaparongami
ka na hunana na hinua iami.
13Na enoni, mu bani henahuraura,
ka me ngavê na apeta,
suria ga tagara bâraha purua ma.
Na marâ hato, ga tagarahigi,
ka page ngaugi na gi
Ngaia nga na Araha raramohaga hunia
kani katogi vigana!
14Ma na maveta ki page vunu
renia na giraraha renia na raramohana na Araha,
manga na asi i vunu.
15I page era ngavê tangagamu!
Igamu kamu mangariaga tangara na enoni getera,
kamu ruhira ma kamu hagamakira.
Igamu kamu katora ka tariahehu,
mangara na enoni i ruguhira na tonoha.
16Igamu kamu page maki ngavê hete,
ma na enoni ki hato, vige hagahigasigamu.
Igamu kamu page tonomia na makiha,
ma kamu page tariahehu.
Na Araha ki page hagatonomigamu
igê na kâkâ ni hagaitangiha,
ma ki page horoa na raramohami igê na makiha.
17Igamu kamu bani tapigi na apinige i Libanone,
ma i ngekê ka page tapigamu nogami, kamu meme.
Igamu kamu bani nahuira ka me na marâ vasiga i ngekana,
ma i ngekê ngaira ka page hagamagusigamu.
Na tarani ngegê ka page vora me,
suria igamu kamu nahu enoni,
ma kamu henahuraura na enoni ma na hinua i maveta.
18Mu takusia vari,
vi na ataro, mu hagarapea,
ki girara i hagatahigamu?
Ngaia ki na marâ ma, na enoni ki tahea,
ma ki hagaparugamu ma.
Mu takusia vari,
vi ngaia ki girara i tamania na enoni,
i tahea ma ki hagarapea?
Aige, ma hete ngaia ki na marâ
i pe girara vige tamasi! Iê?
19I page era ngavê tangagamu!
Igamu kamu vi tanga na apinige purua,
kamu vivi, “Rite!”
Se tanga na hê kamu vivi, “Aharaga!”
I hega, ngaia ki girara
i hagagirararagamu renia ta na marâ?
Henaka mu tagarahia ki reoreoga ma ki bâkoro,
ma ngaia ki pe mauri!
20Na Araha ki oga igê na Ruma Apuna iana.
Na enoni hato i maveta ki ararira,
ga munimuni i maana.
Currently Selected:
HABAKUKU 2: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific