BUKA NI TAKOHA 1
1
Na ogaha iana na enoni ki tâ hagâbo
1Ikê na tamasinga iana o karena o Tavite, na mane ni takoha, i maneraha i Jerusaleme.
2Na mane ni takoha ngekana ki vi: “Oga hagâbo! Oga hagâbo! Na ogaha ki tâ hagâbo. Na ara ni marâ ka oga hagâbo! 3Igo ko tagara suria na ogaha iamu hagenani, go tagara bâraha, ma na ta ki vora? 4Na apaparaha ka voravora me ma na apaparaha ka magahuru, ma na maveta ki gâga manga bani hanana. 5Na arito ki akê me, ma na arito ki susu ma ki gaha aporo, hanana i akê me nikâ. 6Na roga ki apariri tanga na gari, ma ki apariri tanga na târagina, ma ki apariri rârâ ki aporo tanga na bani atohana. 7Na ara ni ve ka gogogo tanga na asi, ma ki asa vige vunu na asi, suria na ve ka aporo tangagi na maani, ma ka gogogo aporo ataha. 8Na ara ni marâ ka hagâsi ape, ka hagâsi ape teha ngavê. I asa vige bâsigi na ara ni marâ hato. I asa ngavê vige togo na ogaha. 9Na marâ ga vora me i nago, ngaigi ki page voravora me nikâ. Na marâ ga tanugi i nago, ka page tanugi akê nikâ. I mareha rârâ ta na marâ vige haoru suria na maveta hagenani. 10Ngaira ka vi: ‘Bâ, na marâ i haoru ikê!’ Ma ki mareha. Ngaia ki bani vora me i nago, hagenago ma ka kahu vora me igia. 11I mareha rârâ ta na enoni, vige takusia mênga na marâ i bani vora me i nago. Ma ki mareha rârâ ta na enoni i na matena i muri me, vige page takusia aporo na marâ i voravora me i berarogaterua i ngekê ma i hemuri.
Na takoha mataha ki asa vige tamanigo
12Inê na mane ni takoha kê oga i Jerusaleme ma kê marungia i Isiraele. 13Inê kê togeaga kê haharirigi maninga ma kê hagesuringenigi na ara ni marâ hato ga vora me i maveta ikê. Ngaia nga ka na tagaraha, God i bonasira na enoni renia. Na tagaraha ngekana, e, i hagamangusi ngavê! 14Inê kê haharirigi na marâ hato ga katogi na enoni i maveta. Ma be vi tangagamu, ngaigi hato ka oga hagâbo ma. I tanu manga ga uhungia viga taua na roga. 15Na marâ i aroro ki bara vige otoa aporo. Na marâ ga pe oga, ki asa vige tomanigi. 16Inê kê tako, kê vi: Inê kê vora re na maneraha ma kê tako mataha teharira na ani ga marungia i Jerusaleme hagenago taraku. Inê kê tonga renirerua na takoha mataha ma na giraraha. 17Inê kê togeaga kê tarahua, vi manga i he na giraraha ki tora hegitigi tenia na bonobonoganiha, ma na takoha mataha tenia na bekabekaganiha. Inê kê tarahua ma, vi inê kê uhungia vigê taua na roga. 18Manga na takoha mataha ma ki akê ki akê, hoi, na anumanumaha ki akê ki akê nikâ henia. Ki akê ki akê na giraraha iamu, hoi, na mamasiaganiha iamu ki akê ki akê nikâ henia.
Currently Selected:
BUKA NI TAKOHA 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific