NA MARAMARÊRAVA 31
31
Na hagaotonga tanga na maneraha
1Igê na hagaotonga kenana na maneraha o Lemuele ki vatea renigi:
2“O kareku, o kareku hetakui, inê kê nungia God renigo. Na hagaotonga ta kê vatego renigi? 3Siana ko hagame apemu renira na gete. Siana ko nahu na nahuninga iamu renira, suria rako na maneraha ka vota renira. 4Lemuele, gu karinga. Na maneraha ki pe marisita vige totono bâraha na vaini se vige magêsigi na tonoha. 5Matena ga totono, ngaira ka bonotenigi na tagaraha iata ma ka pe botage renigi na marâ i oto tangara na enoni ga mamasiaga. 6Na tonoha ki marisita na enoni ga sugi meme se tangara na enoni i rugurugu ngavê na obata. 7I ararira ngaira vige totono, hanana ga bonotenigi na matareha ma na mamasiaganiha igê na oganiha iata.
8Ma igo, ki tuguhigo, vigo panepane henira na ani i bara tangara ma ko roherohe pusira igê na tarani ga oto tangara. 9Go roherohe pusira ma ko surira igê na otoha. Go vatera na enoni matareha ma na ani i bara tangara renigi na marâ ga oto tangara hanana viga nahunigi.”
Na gete koro
10Na gete koro, ti ki girara i tarahua?
Ngaia ki teharigi na hê bâkoro i raha na meni
11O vaniana ki hagêguritogo renia.
Ngaia ki page akê me bâkoro renia ngaia kaniana.
12Ngaia ki asa vige hagaera obana o vaniana
igê na ogaha iana hagenani.
Ngaia ki hagakoro obana hete o vaniana
13Ngaia ki aruma tare ki tagarahigi na gahu
renigi na varehuta na sipi ma na sigani na rauga,
suria i manisingenigi maninga na tagaraha ngegana.
14Ngaia ki totora me na ngêra hagatê
mangagi na haka ga totora me na marâ
tenigi na agua hagatê.
15Ngaia ki bani riterite igê na kahuagana na tangiana
hanana i hagamako na ngêra tanga na ruma iana
ma ki ategi na tagaraha tangara na kere gete tagara iana.
16Ngaia ki hahariria na mako i obania
ma ki vuria renigi na haga ga votavota i rimana
ma ki hasihasi vaini igê.
17Ngaia ki tagara bâraha tare,
suria i ramo ma ki asa vige memega.
18Ngaia ki girara vi na tagaraha iana ki akê me bâkoro.
Ngaia ki ama ni tagara nga ki bungibungi raha.
19Ngaia ki poroporogi na sigani na rauga
ma ki hêrigi marena na gahu.
20Ngaia ki mamahata tangara na enoni matareha,
ma ki tamanira na ani i bara tangara.
21Ngaia ki pe magutenia na matena ni maratoha
suria na ruma iana ka nahunigi na gahu ga mahana renigi.
22Ngaia marena ki tagarahigi na aruha bâkoro
ma ki hagesuru renigi na tuguni siki
ma na gahu rotorotoaga memera.
23O vaniana ki rongo raha na atana i hinua.
Ngaia ki na tamata na enoni raha igê.
24Ngaia na gete ki tagarahigi na gahu ma na hogovoro
ma ki hagavuringenigi tangara na enoni ni vuriha.
25Ngaia ki ramo ma na enoni ka hagahigasia
ma ki pe anumanuma renia na matena i muri me.
26Ngaia ki tamasi takotako
ma ka arâ manâhi na hagaotonga iana.
27Ngaia ki aruma tare
ma ki marupea maninga na ruma iana.
28Ngaira na karena ka ageagesia
ma o vaniana ki kasia akê, ki vi:
29“Rako kaniata na mane ga koro
ma igo nga ko teharira ngavê ngaira.”
30Na bâhanana na tauhana na enoni
ki girara i hagaparura na enoni
ma na bâkorohana na enoni ki magahuru râ.
Ma na gete i hagahigasia na Araha
ki ararigia viga kasia akê.
31Naka ke ageagesia na mena na tagaraha iana.
Na hinua hagenani ki araria i hagahigasia.
Currently Selected:
NA MARAMARÊRAVA 31: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific